પશ્ચિમ બંગાળમાં વિધાનસભા ચૂંટણી 2026 નો શંખનાદ ફૂંકાઈ ગયો છે અને રાજકીય માહોલ ગરમાયો છે. મંગળવારે, 17 માર્ચ, 2026 ના રોજ શાસક પક્ષ તૃણમૂલ કોંગ્રેસ (TMC) એ પોતાના ઉમેદવારોની યાદી જાહેર કરીને મોટો ધડાકો કર્યો છે. મુખ્યમંત્રી અને પાર્ટી સુપ્રીમો મમતા બેનર્જીએ જાહેરાત કરી છે કે TMC રાજ્યની કુલ 294 વિધાનસભા બેઠકોમાંથી 291 બેઠકો પર પોતાના ઉમેદવારો ઉતારશે. બાકીની 3 બેઠકો અનિત થાપાના નેતૃત્વવાળા ભારતીય ગોરખા પ્રજાતંત્ર મોરચા (BGPM) માટે છોડવામાં આવી છે. આ યાદીમાં સૌથી વધુ ચર્ચા મમતા દીદીની ભવાનીપુર બેઠક, લઘુમતી (મુસ્લિમ) ઉમેદવારોની સંખ્યા અને વિવાદિત નેતા હુમાયુ કબીરની ટિકિટ કપાવા બાબતે થઈ રહી છે.
TMC ની યાદીમાં કોને મળ્યું કેટલું પ્રતિનિધિત્વ?
પાર્ટીના મહાસચિવ અભિષેક બેનર્જીએ ઉમેદવારોની યાદીનું ગણિત સમજાવતા જણાવ્યું કે TMC એ આ વખતે તમામ વર્ગોને સાચવવાનો પ્રયાસ કર્યો છે. જાહેર કરાયેલા કુલ 291 ઉમેદવારોમાંથી:
52 મહિલા ઉમેદવારો છે.
95 ઉમેદવારો અનુસૂચિત જાતિ (SC) અને જનજાતિ (ST) માંથી આવે છે.
47 ઉમેદવારો લઘુમતી (મુસ્લિમ) સમાજના છે.
ભવાનીપુરમાં ખેલાશે હાઇ-વોલ્ટેજ મુકાબલો
આ વખતની ચૂંટણીમાં સૌથી મોટો મુકાબલો ભવાનીપુર બેઠક પર જોવા મળશે. ખુદ CM મમતા બેનર્જી આ બેઠક પરથી ચૂંટણી લડી રહ્યા છે, જ્યાં તેમનો સીધો સામનો ભાજપના દિગ્ગજ નેતા સુવેન્દુ અધિકારી સામે થશે. રસપ્રદ વાત એ છે કે ભાજપે સુવેન્દુ અધિકારીને ભવાનીપુર ઉપરાંત નંદીગ્રામ બેઠક પરથી પણ મેદાનમાં ઉતાર્યા છે. નંદીગ્રામમાં તેમને ટક્કર આપવા માટે TMC એ તાજેતરમાં જ પાર્ટીમાં જોડાયેલા પવિત્રા કરને ટિકિટ આપી છે.
અન્ય કયા મોટા માથાઓ ક્યાંથી લડશે?
TMC એ પોતાના દિગ્ગજ નેતાઓને મહત્વની બેઠકો પરથી ઉતાર્યા છે.
કોલકાતા પોર્ટથી ફરહાદ હાકિમ
બેલેઘાટાથી કુણાલ ઘોષ
હાબરાથી જ્યોતિપ્રિયા મલ્લિક
સુજાપુરથી સબીના યાસ્મીન
જાંગીપુરથી ઝાકિર હુસૈન
સાગરદિઘીથી બાયરન બિસ્વાસ
દિનહાટાથી ઉદયન ગુહા
મુસ્લિમ વોટબેંક અને હુમાયુ કબીરની કપાયેલી ટિકિટ
પશ્ચિમ બંગાળમાં મુસ્લિમ મતદારોનો પ્રભાવ ખૂબ મોટો છે. રાજ્યની 294 બેઠકોમાંથી આશરે 40 થી 45 બેઠકો એવી છે જ્યાં મુસ્લિમ મતદારો નિર્ણાયક સાબિત થાય છે. ખાસ કરીને માલદા, બીરભૂમ, મુર્શિદાબાદ, ઉત્તર દિનાજપુર અને દક્ષિણ 24 પરગણા જેવા જિલ્લાઓમાં મુસ્લિમ વસ્તી અડધોઅડધ કરતા પણ વધુ છે.
આ ચૂંટણીમાં મુર્શિદાબાદ જિલ્લાની ભરતપુર બેઠક ચર્ચામાં છે. આ બેઠક પરથી અગાઉ TMC ના ધારાસભ્ય હુમાયુ કબીર હતા. પરંતુ, તેમણે બાબરી મસ્જિદના નિર્માણની વિવાદિત જાહેરાત કરતા ભારે હોબાળો મચ્યો હતો, જેના પગલે TMC એ તેમને પાર્ટીમાંથી સસ્પેન્ડ કરી દીધા હતા. હવે આ બેઠક પર હુમાયુ કબીરનું પત્તું કાપીને TMC એ મુસ્તફિઝુર રહેમાનને મેદાનમાં ઉતાર્યા છે.
ટિકિટ ન મળનારા નેતાઓને દીદીનું આશ્વાસન
આ ચૂંટણીમાં મમતા બેનર્જીએ પૂરા આત્મવિશ્વાસ સાથે 226 થી વધુ બેઠકો જીતવાનો દાવો કર્યો છે. સાથે જ, જે નેતાઓ કે કાર્યકરોના નામ આ યાદીમાં નથી આવી શક્યા તેમને નિરાશ ન થવા અપીલ કરી છે. દીદીએ ખાતરી આપી છે કે ટિકિટ ન મેળવી શકનાર વફાદાર નેતાઓને ચૂંટણી બાદ પાર્ટી સંગઠનમાં યોગ્ય સ્થાન આપીને સાચવી લેવામાં આવશે.