Tomorrow weather 9 June 2026: આવતીકાલના હવામાનને લઈને હવામાન વિભાગે (IMD) દેશભરમાં એક મોટું અને ચિંતાજનક એલર્ટ જાહેર કર્યું છે. 9 જૂન એટલે કે આવતીકાલે દેશના 15 જેટલા રાજ્યોમાં મુસળધાર વરસાદની સાથે ભયંકર વાવાઝોડાની ગંભીર આગાહી કરવામાં આવી છે. આ કુદરતી આપત્તિ દરમિયાન પવનની ગતિ 85 થી 90 કિલોમીટર પ્રતિ કલાક જેટલી પ્રચંડ રહેવાની આશંકા સેવાઈ રહી છે.
હવામાન વિભાગના જણાવ્યા અનુસાર, પૂર્વીય રાજ્યોથી લઈને ઉત્તર અને દક્ષિણ ભારતના વિસ્તારોમાં પણ આ ખતરનાક આંધી-તોફાનની વ્યાપક અસર જોવા મળી શકે છે. ભારે પવનના કારણે મોટા વૃક્ષો અને વીજળીના થાંભલા ધરાશાયી થવાનું તેમજ ખેતરોમાં ઉભા પાકને મોટું નુકસાન થવાનું જોખમ હોવાથી ખેડૂતો અને સામાન્ય જનતાને ખાસ સાવચેતી રાખવાની સલાહ અપાઈ છે.
આ ભયંકર વાવાઝોડાની અસરમાં આવનારા 15 રાજ્યોમાં ઉત્તર પ્રદેશ, બિહાર, દિલ્હી, હિમાચલ પ્રદેશ, ઉત્તરાખંડ, પંજાબ, રાજસ્થાન, જમ્મુ અને કાશ્મીર, ઝારખંડ, પશ્ચિમ બંગાળ, ઓડિશા, છત્તીસગઢ, મધ્ય પ્રદેશ, આસામ અને કેરળનો સમાવેશ થાય છે. પહાડી રાજ્યોમાં ભારે પવન સાથે કરા પડવાની સંભાવના છે, જ્યારે દરિયાકાંઠાના વિસ્તારોમાં માછીમારોને દરિયામાં ન જવાની કડક સૂચના અપાઈ છે.
રાજધાની દિલ્હીમાં 9 થી 11 જૂન દરમિયાન 70 થી 75 કિમીની ઝડપે પવન ફૂંકાશે અને ભારે વરસાદ પડશે, જ્યાં મહત્તમ તાપમાન 42°C અને લઘુત્તમ 32°C રહેશે. ઉત્તર પ્રદેશમાં 9 થી 14 જૂન દરમિયાન મેરઠ, કાનપુર, વારાણસી અને પ્રયાગરાજમાં 80 થી 85 કિમીની ઝડપે પવન ફૂંકાશે, જ્યારે લખનૌમાં તાપમાન 42°C અને 30°C ની આસપાસ નોંધાશે.
આ પણ વાંચોઃ 12 રાજ્યોમાં ચોમાસું પહોંચ્યું, આ તારીખ પછી ગુજરાતમાં હવામાન બદલાશે; 7 દિવસ વરસાદની આગાહી
બિહારમાં 9 અને 10 જૂને પટના, ગયા અને ભાગલપુરમાં ભારે વાવાઝોડાના એલર્ટ વચ્ચે લોકોને ઘરમાં રહેવા અપીલ કરાઈ છે, અહીં પટનાનું તાપમાન 40°C અને 28°C રહેશે. બીજી તરફ, ઝારખંડના રાંચી અને જમશેદપુરમાં 60 થી 70 કિમીની ઝડપે પવન ફૂંકાશે, જ્યારે ઉત્તરાખંડ અને હિમાચલના પહાડી વિસ્તારોમાં 60 થી 65 કિમીની ઝડપે પવન વચ્ચે મનાલીમાં પારો ગગડીને 4°C સુધી પહોંચી શકે છે.
જમ્મુ-કાશ્મીરના શ્રીનગર અને અનંતનાગમાં 9 થી 14 જૂન દરમિયાન ભારે વરસાદની આગાહી છે અને શ્રીનગરમાં તાપમાન 29°C થી 14°C વચ્ચે રહેશે. રાજસ્થાનના જયપુર અને અજમેરમાં 9-10 જૂને 70 થી 80 કિમીની ઝડપે આંધી ફૂંકાશે, જ્યારે પંજાબમાં 10-11 જૂને 60 થી 65 કિમીની ઝડપે પવન ફૂંકાવાની શક્યતા હવામાન વિભાગે દર્શાવી છે.
મધ્ય પ્રદેશના ભોપાલ અને ઇન્દોરમાં 9-10 જૂને 70 થી 75 કિમીની ઝડપે પવન સાથે ભારે વરસાદનું એલર્ટ આપવામાં આવ્યું છે. આ જ ગતિએ એટલે કે 70 થી 75 કિમીની ઝડપે પશ્ચિમ બંગાળના કોલકાતા અને આસામના ગુવાહાટી સહિતના વિસ્તારોમાં પણ જોરદાર પવન ફૂંકાશે, જેના કારણે તંત્રને એલર્ટ મોડ પર રાખવામાં આવ્યું છે.
આ પણ વાંચોઃ ગુજરાતના 9 જિલ્લામાં વરસાદની આગાહી, ચોમાસું ક્યાં પહોંચ્યું? જુઓ વિગત
દક્ષિણ ભારતમાં કેરળ અને તમિલનાડુના ચેન્નાઈ તથા તિરુવનંતપુરમ સહિતના વિસ્તારોમાં ચોમાસાના ભારે વરસાદની સાથે 65 થી 70 કિમીની ઝડપે પવન ફૂંકાવાની ચેતવણી જારી કરાઈ છે. હવામાનમાં આવી રહેલા આ આકસ્મિક અને મોટા ફેરફારને પગલે તમામ અસરગ્રસ્ત રાજ્યોના વહીવટી તંત્રે નાગરિકોને સુરક્ષિત સ્થાનો પર રહેવા અને કટોકટીના સમયે જ બહાર નીકળવા તાકીદ કરી છે.