UK Visa News: ભારતના ઘણા શહેરોના રહેવાસીઓ માટે હવે યૂકેના વિઝા મેળવવું આસાન બની ગયું છે. હવે આ શહેરોના લોકોને યૂકેના વિઝા માટે અરજી કરવા એમ્બેસીમાં જવાની જરૂર નહીં પડે. હવે આ કામ નજીકની કેટલીક હૉટલમાંથી જ થઈ શકશે.
આ 3 હૉટલોમાં શરૂ થઇ ફેસિલિટી -
VFS ગ્લૉબલે (VFS Global) આ માટે ટાટા ગ્રુપની ઈન્ડિયન હૉટેલ્સ કંપની (Indian Hotels Company) અને રેડિસન હૉટેલ ગ્રુપ (Radisson Hotel Group) સાથે જોડાણ કર્યું છે. આ કરાર બાદ હવે બેંગ્લૉર, મેંગલૉર અને વિશાખાપટ્ટનમમાં રહેતા લોકો પોતાની નજીકની તાજ હૉટેલમાં UK વિઝા માટે અરજી કરી શકશે. આ સુવિધા વિવંતા બેંગલુરુ (Vivanta Bengaluru), વ્હાઇટફિલ્ડ, વિવંતા મેંગલૉર (Vivanta Manglore), ઓલ્ડ પૉર્ટ રૉડ અને ધ ગેટવે હૉટેલ (The Gateway Hotel), વિશાખાપટ્ટનમમાં પહેલેથી જ શરૂ થઈ ગઈ છે.
વીએફએક્સ ગ્લૉબલએ આપ્યુ અપડેટ -
VFS ગ્લૉબલ એક વૈશ્વિક કંપની છે, જે વિઝાથી લઈને પાસપૉર્ટ અને ફૉરેક્સ સુધીની તમામ સેવાઓ પૂરી પાડે છે. કંપનીએ સોશ્યલ મીડિયા પૉસ્ટમાં આ અંગેની માહિતી આપી હતી. તેમને કહ્યું, 'ભારતના બેંગ્લૉર, મેંગલૉર અને વિશાખાપટ્ટનમ શહેરોના યૂકે વિઝા અરજદારો માટે અપડેટ છે. તમે હવે અમારા પ્રીમિયમ એપ્લિકેશન કેન્દ્રો દ્વારા UK વિઝા માટે તમારી નજીકની તાજ હૉટેલની મુલાકાત લઈ શકો છો.
આ હૉટલો પર પણ સુવિધા ઉપલબ્ધ -
આ ત્રણ શહેરો ઉપરાંત અમૃતસર, મોહાલી, લુધિયાણા અને નોઈડાના લોકો માટે પણ આ આસાન સુવિધા શરૂ કરવામાં આવી છે. VFS ગ્લૉબલના જણાવ્યા મુજબ, રેડિસન બ્લૂ હૉટેલ અમૃતસર (Radisson Blu Hotel Amritsar), રેડિસન રેડ ચંદીગઢ મોહાલી (Radisson RED Chandigarh Mohali), પાર્ક પ્લાઝા લુધિયાણા (Park Plaza Ludhiana) અને રેડિસન નોઈડા (Radisson Noida) વિઝા ખાતે સ્થિત પ્રીમિયમ એપ્લિકેશન કેન્દ્રો દ્વારા અરજી કરી શકાય છે.
આ છે અરજી કરવાની પ્રૉસેસ -
જો તમે પણ યૂકેના વિઝા મેળવવા માંગો છો, તો આ માટે તમારે પહેલા એપૉઇન્ટમેન્ટ બુક કરવી પડશે. તમારી ઑનલાઇન વિઝા અરજી સબમિટ કર્યા પછી તમારી પાસે બાયૉમેટ્રિક્સ પ્રદાન કરવા અને અરજી પ્રક્રિયા પૂર્ણ કરવા માટે 240 દિવસ સુધીનો સમય હશે. તમે 24 કલાક અગાઉ એપૉઇન્ટમેન્ટ બદલી શકો છો અને નવી તારીખ નક્કી કરી શકો છો. જો તમે તમારી અરજી સબમિટ કર્યાના 240 દિવસની અંદર બાયૉમેટ્રિક આપી શકતા નથી, પરંતુ હજુ પણ વિઝા મેળવવામાં રસ ધરાવો છો, તો તમારે UKVI નો સંપર્ક કરવો પડશે.