V Senthil Balaji News: તમિલનાડુના રાજ્યપાલ આર.એન. રવિએ ગુરુવારે જેલમાં બંધ વી. સેંથિલ બાલાજીને મંત્રી પરિષદમાંથી તાત્કાલિક અસરથી સસ્પેન્ડ કરી દીધા છે. તમિલનાડુ રાજભવને એક નિવેદન જારી કરીને કહ્યું હતું કે, મંત્રી વી સેંથિલ બાલાજી નોકરીના બદલામાં પૈસા લેવાના અને મની લોન્ડરિંગ સહિત ભ્રષ્ટાચારના અનેક કેસોમાં ગંભીર ફોજદારી કાર્યવાહીનો સામનો કરી રહ્યા છે. આ સંજોગોમાં રાજ્યપાલે તેમને તાત્કાલિક અસરથી મંત્રી પરિષદમાંથી બરતરફ કરી દીધા છે.
નિવેદનમાં વધુમાં કહેવામાં આવ્યું છે કે, મંત્રી થિરુ વી. સેંથિલ બાલાજી, મંત્રી તરીકેના તેમના હોદ્દાનો દુરુપયોગ કરીને તપાસને પ્રભાવિત કરી રહ્યા છે અને કાયદા અને ન્યાયની યોગ્ય પ્રક્રિયાને અવરોધે છે. એન્ફોર્સમેન્ટ ડિરેક્ટોરેટ દ્વારા તપાસ કરવામાં આવતા ફોજદારી કેસમાં તે હાલમાં ન્યાયિક કસ્ટડીમાં છે. તેની સામે ભ્રષ્ટાચાર નિવારણ અધિનિયમ અને ભારતીય દંડ સંહિતા હેઠળ કેટલાક વધુ ફોજદારી કેસોની તપાસ રાજ્ય પોલીસ દ્વારા કરવામાં આવી રહી છે.
રાજભવન વતી એવું કહેવામાં આવ્યું હતું કે, એવી આશંકા છે કે મંત્રી પરિષદમાં થિરુ વી. સેંથિલ બાલાજી પદ પર યથાવત રહેવાથી ન્યાયી તપાસ સહિત કાયદાની યોગ્ય પ્રક્રિયાને પ્રતિકૂળ અસર થશે. જે રાજ્યમાં બંધારણીય તંત્રને તોડી શકે છે. આ સંજોગોમાં રાજ્યપાલે થિરુ વી. સેંથિલ બાલાજીને તાત્કાલિક અસરથી મંત્રી પરિષદમાંથી બરતરફ કર્યા છે.
એન્ફોર્સમેન્ટ ડિરેક્ટોરેટ (ED) એ 14 જૂનના રોજ પ્રિવેન્શન ઓફ મની લોન્ડરિંગ એક્ટ (PMLA) હેઠળ સેંથિલ બાલાજીની ધરપકડ કરી હતી. તેના એક દિવસ પહેલા બુધવારે તમિલનાડુની ચેન્નઈ કોર્ટે મની લોન્ડરિંગ કેસમાં ધરપકડ કરાયેલ તમિલનાડુના મંત્રી સેંથિલ બાલાજીની ન્યાયિક કસ્ટડી 12 જુલાઈ સુધી લંબાવી હતી. પ્રિન્સિપાલ સેશન્સ કોર્ટના જજ એસ.કે. અલી સમક્ષ હાજર થયા હતા. ન્યાયાધીશે ધરપકડ કરાયેલા મંત્રીના સ્વાસ્થ્ય વિશે પૂછપરછ કરી અને તેની કસ્ટડી 12 જુલાઈ સુધી લંબાવી હતી.
બાદમાં ચેક-અપ દરમિયાન તેમણે અસ્વસ્થતા અને છાતીમાં દુખાવોની ફરિયાદ કર્યા પછી તેમને અહીં ઓમન્દુર સરકારી હોસ્પિટલમાં દાખલ કરવામાં આવ્યા હતા. પ્રિન્સિપલ સેશન્સ કોર્ટના જજે તેને 14 દિવસની જ્યુડિશિયલ કસ્ટડીમાં મોકલવાનો આદેશ કર્યો હતો. ત્યારબાદ સેંથિલ બાલાજીને કાવેરી હોસ્પિટલમાં દાખલ કરવામાં આવ્યા હતા, જ્યાં તેમની બાયપાસ સર્જરી કરવામાં આવી હતી.