Waqf Bill in Rajya Sabha Live: વકફ સંશોધન બિલ પર ચર્ચા દરમિયાન રાજ્યસભામાં રિજિજૂએ કહ્યુ- 'આ બિલ કોઇ ધર્મની વિરુદ્ધ નથી'

Waqf Bill in Rajya Sabha Live: લોકસભામાં આ બિલ પર 12 કલાકની ચર્ચા થઈ ત્યારબાદ તેના સમર્થનમાં 288 મત અને વિરોધમાં 232 મતો સાથે પસાર કરવામાં આવ્યું હતું

બ્રેકગ્રાઉન્ડ

Waqf Amendment Bill in Rajya Sabha Live: વકફ (સંશોધન બિલ, 2025 ટૂંક સમયમાં રાજ્યસભામાં રજૂ કરવામાં આવશે. એક દિવસ પહેલા જ તે લોકસભામાં બહુમતીથી પસાર થયું હતું. બુધવાર, 2 એપ્રિલના રોજ, લોકસભામાં આ બિલ પર 12 કલાકની ચર્ચા થઈ ત્યારબાદ તેના સમર્થનમાં 288 મત અને વિરોધમાં 232 મતો સાથે પસાર કરવામાં આવ્યું હતું. આજે ભાજપ અધ્યક્ષ જેપી નડ્ડા બપોરે 1 વાગ્યે રાજ્યસભામાં આ બિલ પર ભાષણ આપશે.આ બિલનો ઉદ્દેશ્ય વકફ મિલકતોના વહીવટમાં સુધારો કરવાનો, તેમનું તકનીકી રીતે સંચાલન કરવાનો, જટિલતાઓને દૂર કરવાનો અને પારદર્શિતા સુનિશ્ચિત કરવાનો છે. લોકસભામાં ચર્ચા દરમિયાન ગૃહમંત્રી અમિત શાહે કોંગ્રેસ પર આ બિલ વિશે ખોટી માહિતી ફેલાવવાનો આરોપ લગાવ્યો હતો.તેમણે એ પણ સ્પષ્ટ કર્યું કે આ બિલ મુસ્લિમોના ધાર્મિક મામલાઓમાં દખલ કરતું નથી. તેમણે કહ્યું હતું કે, 'વક્ફ બિલને મુસ્લિમોના ધાર્મિક બાબતો અને તેમના દ્વારા દાનમાં આપવામાં આવેલી મિલકતોમાં દખલગીરી માનવું એ વોટ બેન્કના રાજકારણ માટે ભય ફેલાવવાનો પ્રયાસ છે.'

03/04/2025 14:48:51

1995માં ભાજપ વકફ બિલને સમર્થન આપી રહ્યું હતું - કોંગ્રેસના સાંસદ સૈયદ નાસીર હુસૈન

રાજ્યસભામાં કોંગ્રેસના સાંસદ સૈયદ નસીર હુસૈને કહ્યું કે 1995માં તત્કાલીન વક્ફ બિલને ભારતીય જનતા પાર્ટીએ પણ સમર્થન આપ્યું હતું. જો આ કોઈ ચોક્કસ સમુદાયને ખુશ કરવા માટે હતું તો પછી તમે તેને કેમ ટેકો આપ્યો? ભાજપ પર નિશાન સાધતા તેમણે કહ્યું કે 2014 થી 2024 સુધી પણ તેઓ સમજી શક્યા નહીં કે આ એક કઠોર કાયદો છે?

મને 2024માં યાદ આવ્યું કારણ કે 400નો નારા આપ્યા પછી તેઓ 240 સુધી પહોંચી શક્યા હતા. તેઓ સમજી શકતા નથી કે તેમની વોટ બેન્ક કેવી રીતે વધારવી. તમે જે રાજ્યોમાં શાસન કરો છો ત્યાં વકફ બોર્ડ ચલાવતા નથી. તમે હંમેશા ગેરમાર્ગે દોરવાનો પ્રયાસ કર્યો છે.

03/04/2025 14:48:24

રિજિજુએ કહ્યું- વક્ફમાં કોઈપણ બિન-મુસ્લિમનો હસ્તક્ષેપ નથી

રાજ્યસભામાં વકફ બિલ પર ચર્ચા દરમિયાન સંસદીય બાબતોના મંત્રી કિરેન રિજિજુએ કહ્યું કે અમે સારા ઇરાદા સાથે આ બિલ લાવ્યા છીએ. કાયદા ન્યાય માટે છે, લડાઈ માટે નહીં. વકફનું સંચાલન ફક્ત મુસ્લિમોના હાથમાં રહેશે. મુસ્લિમોના રિવાજોમાં કોઈ દખલગીરી કરવામાં આવશે નહીં. શિયા, સુન્ની, બોહરા બધા જ બોર્ડમાં હશે. વિપક્ષના તમામ આરોપો પાયાવિહોણા છે.

03/04/2025 14:48:04

નિશિકાંત દુબેએ કોંગ્રેસ પર સાધ્યું નિશાન

વકફ સુધારા બિલ 2025 પર ચર્ચા દરમિયાન ભાજપના સાંસદ નિશિકાંત દુબેએ કોંગ્રેસ પર પ્રહાર કરતા કહ્યું કે (કોંગ્રેસ) પાકિસ્તાનના નિર્માણ માટે ઝીણાને જવાબદાર માને છે કે નહીં, જો તેઓ ઝીણાને માને છે તો હું તમને જણાવી દઉં કે 1910માં કોંગ્રેસ પાર્ટીએ ઝીણાને મુસ્લિમો માટે અનામત બેઠક પરથી મુંબઈથી સંસદ સભ્ય બનાવ્યા હતા અને 1911માં તેમણે મુસ્લિમ વકફ બોર્ડ બનાવ્યું હતું, એક ખાનગી વ્યક્તિએ બનાવ્યું, જેનાથી પાકિસ્તાન બન્યું અને આજે ફરીથી તેઓ વકફના નામે આ દેશનું વિભાજન કરવા માંગે છે.

03/04/2025 13:31:43

અમે આ બિલ વિરુદ્ધ કોર્ટમાં જઈશું અને રસ્તાઓ પર વિરોધ કરીશું - સાંસદ ચંદ્રશેખર આઝાદ

લોકસભામાં વક્ફ સુધારા બિલ પસાર થવા પર આઝાદ સમાજ પાર્ટીના પ્રમુખ અને સાંસદ ચંદ્રશેખર આઝાદે કહ્યું હતું કે "... આ બિલ લોકસભામાં પસાર થઇ ગયું છે તો ઠીક છે કારણ કે સરકાર પાસે લોકસભામાં બહુમતી છે. પરંતુ અમારી ફરજ હતી કે જે ખોટું થઇ રહ્યું છે તેની વિરુદ્ધ અમે અંતિમ સમય સુધી લડીએ. હવે અમે તેની સામે કોર્ટમાં જઈશું અને રસ્તાઓ પર વિરોધ કરીશું."

03/04/2025 13:42:36

જેપીસીએ જેટલું કામ કર્યું છે તેટલું કોઈએ કર્યું નથી - કિરેન રિજિજુ

રાજ્યસભામાં વક્ફ સંશોધન બિલ 2025 રજૂ કરતી વખતે લઘુમતી બાબતોના મંત્રી કિરેન રિજિજુએ કહ્યું કે આ બિલ ઘણી ચર્ચા પછી તૈયાર કરવામાં આવ્યું છે. ત્યારબાદ તેને JPCમાં મોકલવામાં આવ્યું.

તેમણે વધુમાં કહ્યું હતું કે, વક્ફ પર જેટલું કામ JPCએ કર્યું તેટલું કોઈ સમિતિએ કર્યું નથી. 2 એપ્રિલના રોજ મોડી રાત સુધી ચર્ચા બાદ આજે સવારે લોકસભામાં આ બિલ પસાર કરવામાં આવ્યું. ઘણા સભ્યોએ કહ્યું કે તેમને સુધારા માટે જેટલો સમય મળવો જોઈએ તેટલો સમય મળ્યો નથી.

બિઝનેસ એડવાઇઝરી કમિટીએ આજે ​​જ તેને ચર્ચા માટે લેવાનું નક્કી કર્યું હતું. તેમણે કોંગ્રેસ સરકાર દરમિયાન રચાયેલી સમિતિઓ અને સચ્ચર સમિતિની ભલામણોનો પણ ગૃહમાં ઉલ્લેખ કર્યો હતો

03/04/2025 13:31:08

રાજ્યસભામાં વક્ફ બિલ રજૂ

લોકસભા બાદ આજે રાજ્યસભામાં વકફ સુધારા બિલ રજૂ કરવામાં આવ્યું છે. આ અંગે ચર્ચા દરમિયાન કિરેન રિજિજુએ કહ્યું કે હું આ મહત્વપૂર્ણ બિલ લઈને ગૃહમાં આવ્યો છું તેથી હું કેટલીક વાતો કહેવા માંગુ છું જેથી ગૃહની ગરિમા પણ જળવાઈ રહે. સમિતિની રચના પહેલાં લોકોએ કહ્યું હતું કે તેની પરામર્શ જેટલી થવી જોઈતી હતી તેટલી થઈ નથી. અમે દેશભરના તમામ હિસ્સેદારો, વક્ફ બોર્ડના અધિકારીઓ અને ધાર્મિક સંગઠનોના પ્રતિનિધિઓ સાથે વાત કર્યા પછી તેને સંસદમાં રજૂ કર્યું. જેપીસી દ્વારા કરવામાં આવેલું કાર્ય આનાથી વધુ વ્યાપક ક્યારેય નહોતું.

વિવિધ ક્ષેત્રોના લોકોએ પોતાના મંતવ્યો રજૂ કર્યા અને 97 લાખથી વધુ પત્રો સહિત એક કરોડથી વધુ લોકોએ તેમના મેમોરેન્ડમ સુપરત કર્યા હતા. એક બિલને એક કરોડથી વધુ સૂચનો મળ્યા તે ઐતિહાસિક છે.