વિશ્વ આરોગ્ય સંસ્થાએ પ્રથમ વખત પુષ્ટિ કરી છે કે, મંકીપોક્સ જાતીય સંપર્ક દ્વારા પણ ફેલાય છે. તમને જણાવી દઈએ કે, આફ્રિકન દેશ કોંગોમાં આ દિવસોમાં મંકીપોક્સનું સંક્રમણ મોટા પાયે ફેલાઈ રહ્યું છે. આફ્રિકન વૈજ્ઞાનિકોએ ચેતવણી આપી છે કે, જો હવે તેને કાબૂમાં લેવામાં નહીં આવે તો તે અત્યંત જોખમી બની શકે છે. WHOએ ગુરુવારે પુષ્ટિ કરી હતી કે મંકીપોક્સ જાતીય સંભોગ દ્વારા પણ ફેલાય છે.
મંકીપોક્સ જાતીય સંભોગ દ્વારા પણ ફેલાય છે
WHOએ જણાવ્યું હતું કે, બેલ્જિયમના એક વ્યક્તિ માર્ચમાં કોંગોની મુલાકાતે ગયો હતો અને મંકીપોક્સનો તેનો પોઝિટિવ રિપોર્ટ આવ્યો હતો. WHOએ કહ્યું કે સંક્રમિત વ્યક્તિ ગે છે અને તેણે કોંગોમાં ઘણા લોકો સાથે શારીરિક સંબંધો બાંધ્યા હતા. WHOએ કહ્યું કે બેલ્જિયમના વ્યક્તિ સાથે શારીરિક સંબંધો ધરાવતા અન્ય પાંચ લોકો પણ મંકીપોક્સથી સંક્રમિત જોવા મળ્યા છે. તેના આધારે ડબ્લ્યુએચઓએ પુષ્ટિ કરી છે કે મંકીપોક્સ ચેપ જાતીય સંબંધો દ્વારા પણ ફેલાય છે.
મંકીપોક્સનો ચેપ વધવાનું જોખમ
વૈજ્ઞાનિકોનું કહેવું છે કે, મંકીપોક્સ જાતીય સંબંધો દ્વારા ફેલાય છે, તે દર્શાવતો આ પહેલો પુરાવો છે, જોકે અગાઉ આ દાવાને ફગાવી દેવામાં આવ્યો હતો. મંકીપોક્સ છેલ્લા ઘણા દાયકાઓથી મધ્ય અને પશ્ચિમ આફ્રિકામાં તેનો કેર વધ્યો છે અને તે સામાન્ય રીતે ઉંદરોથી માણસોમાં ફેલાય છે. ગયા વર્ષે, યુરોપ સહિત 100 થી વધુ દેશોમાં મંકીપોક્સના કેસ નોંધાયા હતા અને WHOએ તેને વૈશ્વિક કટોકટી જાહેર કરી હતી. અત્યાર સુધીમાં મંકીપોક્સથી સંક્રમિત લોકોની સંખ્યા 91 હજારને વટાવી ગઈ છે. એકલા કોંગોમાં આ વર્ષે મંકીપોક્સના 12500 કેસ નોંધાયા છે અને 580 દર્દીઓ મૃત્યુ પામ્યા છે અને તેના કારણે તે મહામારી બની ગયો છે.
મંકીપોક્સ શું છે અને તેના ચેપના લક્ષણો કેવા છે?
મંકીપોક્સ અથવા એમપોક્સ એ વાયરસ ચેપ રોગ છે, જે ચેપગ્રસ્ત વ્યક્તિ અને પ્રાણીના સંપર્ક દ્વારા ફેલાય છે. તે ઓર્થોપોક્સ વાયરસથી સંબંધિત છે અને તેના શીતળા જેવા લક્ષણો છે. તેના લક્ષણો સામાન્ય રીતે ચેપના એક અઠવાડિયામાં દેખાવા લાગે છે. આ રોગમાં સંક્રમિત વ્યક્તિને તાવ આવે છે. શરીર પર ફોલ્લીઓ દેખાય છે, ઉપરાંત દર્દીને ગળામાં દુખાવો, માથાનો દુખાવો, સ્નાયુઓમાં દુખાવો, કમરનો દુખાવો જેવી સમસ્યાઓ અનુભવાય છે.