રાજકોટમાં નકલી પત્રકાર બની તોડ કરવા ગયેલા પાંચ શખ્સોને ઝડપી લેવામાં આવ્યા છે. ગાંધીગ્રામ પોલીસે પત્રકાર બની સ્પાના સંચાલક પાસે તોડ કરવા ગયેલા શખ્સોને ઝડપી વધુ કાર્યવાહી હાથધરી છે. આરોપીઓએ સ્પાના સંચાલક પાસે દોઢ લાખ રૂપિયા માંગ્યાની પોલીસ ફરિયાદ નોંધાઈ છે. સ્પાનાં નામે ગોરખધંધા થતા હોવાનું છટકું ગોઠવીને આ ટોળકી તોડ કરવાનો પ્રયાસ કરતી હતી. એટલું જ નહિં આ ટોળકી સોનાનો ચેઇન ચોરી થયો હોવાની ખોટી ફરીયાદ કરી હતી.
આ શખ્સો ગત 5 તારીખનાં રોજ રાજકોટનાં યુનિવર્સિટી રોડ પર આવેલા અરિવા વેલનેશ એન્ડ હેલ્થકેર સ્પામાં મસાજ કરાવવા માટે પહોંચ્યા હતા. દરમિયાન થેરાપી લીધા બાદ આ ટોળકીનાં એક સદસ્યએ પોતાનો સોનાનો ચેઇન ચોરી થયો છે તેવી વાત કરી સ્પાનાં સંચાલકને પોલીસની ધમકી આપી હતી. ત્યારબાદ પોતે પત્રકાર હોવાનું કહિને ત્યાં અન્ય સાથીઓને બોલાવી સ્પામાં ગોરખધંધા ચાલતા હોવાનું કહિને તેની પાસેથી રૂપીયા દોઢ લાખની ખંડણી માંગી હતી. જોકે પોતે રચેલી જાળમાં આ ટોળકી પોતે જ ફસાઇ અને સોનાનાં ચેઇનની ચોરીની ફરીયાદ કરવા પોલીસ સ્ટેશન પહોંચતા પોલીસને આ વાત ગળે ન ઉતરી અને આ ટોળકીની ઉલટ તપાસ કરતા આખો ભાંડો ફુટી ગયો.
પોલીસનાં કહેવા પ્રમાણે આ ટોળકી મિડીયાનાં નામે અનેક જગ્યા પર આ રીતે બદનામ કરવાનો ડર બતાવી સોશ્યલ મિડીયા પર લાઇવ કરીને રૂપીયા પડાવતા હોવાનું સામે આવ્યું છે. આ કિસ્સામાં પણ આ ટોળકીએ ન્યુઝ ચેનલનાં નામે સોશ્યલ મિડીયા પર લાઇવ કરી સ્પા સંચાલકને બ્લેકમેલ કર્યા હતા. પોલીસની તપાસમાં એવી પણ ચોંકાવનારી વિગતો સામે આવી છે કે, આ નકલી પત્રકારોનું કાર્ડ માત્ર 2500 રૂપીયામાં કાઢીને આ ટોળકી આ પ્રકારનો ગોરખધંધો શરૂ કર્યો હતો.
પોલીસે આ શખ્સો ધરપકડ કરી તેની સામે કાયદાનો ગાળીયો મજબુત કર્યો છે. આ ટોળકીએ અત્યાર સુધીમાં કેટલા લોકો પાસેથી રૂપીયા ખંખેર્યા છે. કેટલા લોકોને બ્લેક મેલ કર્યા છે અને આ ટોળકી સાથે હજું કોણ કોણ સામેલ છે તે દિશામાં તપાસ શરૂ કરી છે. પોલીસને આ ટોળકી પાસેથી એનએન ન્યૂઝના આઈકાર્ડ મળી આવ્યા છે.