રાજકોટ: આજે રાજ્યના મોટાભાગના વિસ્તારોમાં સાર્વત્રિક વરસાદની આગાહી કરવામાં આવી છે. દક્ષિણ ગુજરાત, મધ્ય ગુજરાત અને સૌરાષ્ટ્રના અનેક જિલ્લાઓમાં ભારેથી અતિભારે વરસાદની સંભાવનાને ધ્યાનમાં રાખીને રેડ એલર્ટ જાહેર કરવામાં આવ્યું છે. હવામાન વિભાગે આવતીકાલે પણ સૌરાષ્ટ્રના 4 જિલ્લાઓમાં ભારે વરસાદને લઈ રેડ એલર્ટ જાહેર કર્યું છે.
આવતીકાલે પણ અમદાવાદમાં રેડ એલર્ટ યથાવત
હવામાન વિભાગના અનુમાન મુજબ આવતીકાલે પણ અમદાવાદમાં રેડ એલર્ટ રહેશે. અમદાવાદ શહેરમાં ભારે વરસાદનું અનુમાન હવામાન વિભાગે વ્યક્ત કર્યું છે. અમદાવાદ અને ગાંધીનગરમાં ધોધમાર વરસાદ વરસી શકે છે. રેડ એલર્ટ વચ્ચે આજે પણ અમદાવાદમાં ધોધમાર વરસાદની શરુઆત થઈ છે. આ ઉપરાંત સૌરાષ્ટ્રના ભાવનગર, બોટાદ, રાજકોટ અને સુરેન્દ્રનગર જિલ્લામાં પણ રેડ એલર્ટ જાહેર કરવામાં આવ્યું છે. આણંદ જિલ્લામાં પણ ભારે વરસાદની શક્યતાને ધ્યાનમાં રાખીને રેડ એલર્ટ જારી રહેશે.
દક્ષિણ અને મધ્ય ગુજરાતમાં આવતીકાલથી વરસાદનું જોર ઘટી શકે
હવામાન વિભાગના અનુમાન પ્રમાણે આવતીકાલથી દક્ષિણ ગુજરાત અને મધ્ય ગુજરાતમાં વરસાદનું પ્રમાણ ધીમે ધીમે ઘટી શકે છે. જોકે કેટલાક વિસ્તારોમાં હળવાથી મધ્યમ વરસાદ ચાલુ રહેવાની શક્યતા છે. તંત્રએ નાગરિકોને હવામાન વિભાગની સત્તાવાર આગાહીઓ પર નજર રાખવા અને ભારે વરસાદ દરમિયાન જરૂરી સાવચેતી રાખવાની અપીલ કરી છે.
આજે 13 જિલ્લાઓમાં વરસાદનું રેડ એલર્ટ
હવામાન વિભાગે આજે અમદાવાદ, આણંદ, વડોદરા, છોટાઉદેપુર, નર્મદા, ભરૂચ, સુરત, તાપી, નવસારી, ડાંગ, વલસાડ, ભાવનગર અને બોટાદ જિલ્લામાં રેડ એલર્ટ જાહેર કર્યું છે. ઉપરાંત કેન્દ્રશાસિત પ્રદેશ દમણ અને દાદરા-નગર હવેલીમાં પણ ભારેથી અતિભારે વરસાદની સંભાવના વ્યક્ત કરવામાં આવી છે.
આ પણ વાંચો- Ahmedabad Rain: અમદાવાદ શહેરમાં રેડ એલર્ટ વચ્ચે ધોધમાર વરસાદ શરુ
6 જિલ્લાઓમાં ઓરેન્જ એલર્ટ, અનેક વિસ્તારોમાં યલો એલર્ટ
આજે અમરેલી, રાજકોટ, સુરેન્દ્રનગર, ગાંધીનગર, પંચમહાલ અને દાહોદ જિલ્લામાં ઓરેન્જ એલર્ટ જાહેર કરવામાં આવ્યું છે. જ્યારે ગીર સોમનાથ, જૂનાગઢ, પોરબંદર, દેવભૂમિ દ્વારકા, જામનગર, મોરબી, કચ્છ, પાટણ, મહેસાણા, મહીસાગર, અરવલ્લી, સાબરકાંઠા, બનાસકાંઠા તેમજ વાવ-થરાદ વિસ્તારમાં યલો એલર્ટ જાહેર કરવામાં આવ્યું છે.
અમદાવાદ શહેરમાં ધોધમાર વરસાદ
અમદાવાદમાં બપોર બાદ હવામાનમાં અચાનક પલટો આવ્યો અને શહેરના અનેક વિસ્તારોમાં ધોધમાર વરસાદ શરૂ થયો. વરસાદ શરૂ થતાં અનેક માર્ગો પર પાણી ફરી વળ્યા છે, જ્યારે કેટલાક નીચાણવાળા વિસ્તારોમાં પાણી ભરાવાની શરૂઆત થઈ છે. હવામાન વિભાગે અગાઉ જ શહેરમાં ભારે વરસાદને લઈ રેડ એલર્ટની આગાહી કરી હતી, જેના પગલે વહીવટી તંત્ર પણ એલર્ટ મોડ પર છે.