Surat ACB raid: સુરતમાં રાજ્ય વેરા વિભાગનો એક અધિકારી લાંચ લેતા એન્ટી કરપ્શન બ્યુરો (ACB)ના હાથે ઝડપાઈ ગયો છે. નિલેશભાઈ બચુભાઈ પટેલ નામના આ અધિકારીને ACBએ ₹15,000ની લાંચ લેતા રંગેહાથ પકડી પાડ્યા છે. આ ઘટનાથી સરકારી વિભાગમાં ભ્રષ્ટાચાર સામે ચાલી રહેલી કાર્યવાહી વધુ મજબૂત બની છે.


પ્રાપ્ત માહિતી અનુસાર, આ કેસના ફરિયાદી એક દુકાન ધરાવીને વેપાર કરે છે અને તેઓ નિયમિત રીતે વેપાર વેરો ભરતા આવ્યા છે. ફરિયાદીને કાયદેસર રીતે વેપાર વેરાનું રિફંડ મળવાનું નીકળતું હતું. આ રિફંડની રકમ પરત કરવાની કાર્યવાહી કરવાના બદલામાં આરોપી નિલેશભાઈ પટેલે ફરિયાદી પાસેથી ₹15,000ની લાંચની માંગણી કરી હતી.


ફરિયાદી લાંચ આપવા માંગતા ન હોવાથી તેમણે તાત્કાલિક ACBનો સંપર્ક કર્યો હતો અને પોતાની ફરિયાદ નોંધાવી હતી. ACBએ ફરિયાદીની ફરિયાદને ગંભીરતાથી લઈને લાંચના છટકાનું આયોજન કર્યું હતું. તા. ૨૦/૦૩/૨૦૨૫ના રોજ ACBની ટીમે રાજ્યકર ભવન ખાતે છટકું ગોઠવ્યું હતું. આ દરમિયાન આરોપી નિલેશભાઈ પટેલે ફરિયાદી સાથે હેતુલક્ષી વાતચીત કરીને લાંચની રકમ ₹15,000 સ્વીકારી લીધી હતી, અને તરત જ ACBની ટીમે તેમને રંગેહાથ પકડી પાડ્યા હતા.


આરોપી નિલેશભાઈ પટેલ રાજ્યવેરા વિભાગમાં વર્ગ-૨ના અધિકારી તરીકે ફરજ બજાવતા હતા અને તેમનો માસિક પગાર ₹86,000 જેટલો છે. તેમ છતાં તેઓ ₹15,000ની લાંચ લેતા ઝડપાતા સરકારી કર્મચારીઓમાં પણ ખળભળાટ મચી ગયો છે.


આ સફળ ટ્રેપિંગની કાર્યવાહી શ્રી આર.કે.સોલંકી, પોલીસ ઇન્સ્પેકટર, સુરત ગ્રામ્ય એ.સી.બી. પો.સ્ટે. તથા એ.સી.બી. સ્ટાફ દ્વારા કરવામાં આવી હતી. આ સમગ્ર કામગીરીનું સુપરવિઝન શ્રી આર.આર.ચૌધરી, મદદનીશ નિયામક, એ.સી.બી. સુરત એકમ, સુરત દ્વારા કરવામાં આવ્યું હતું.


બહુચરાજી મામલતદાર કચેરીનો કર્મચારી ₹10,000ની લાંચ લેતા ACBના હાથે ઝડપાયો


મહેસાણા જિલ્લાના બહુચરાજી મામલતદાર કચેરીમાં ફરજ બજાવતા એક કર્મચારી ભ્રષ્ટાચાર વિરોધી બ્યુરો (ACB)ના હાથે લાંચ લેતા ઝડપાઈ ગયા છે. ભૂપેન્દ્ર ભાઈ પી પરમાર નામના આ કર્મચારીને અરજદાર પાસેથી ₹10,000ની લાંચ લેતા ACBએ તેમની જ ચેમ્બરમાંથી રંગેહાથ પકડી પાડ્યા છે. આ ઘટનાથી મહેસાણાના રેવન્યુ વિભાગમાં ખળભળાટ મચી ગયો છે.


પ્રાપ્ત માહિતી અનુસાર, એક અરજદાર પોતાની જમીનમાં પોતાના ભાઈનું નામ દાખલ કરાવવા માટે મામલતદાર કચેરીમાં ગયા હતા. આ કામ માટે સર્કલ અધિકારીએ અરજદાર પાસેથી ₹50,000ની લાંચની માંગણી કરી હતી. અરજદારે લાંચની રકમ વધારે લાગતા રકઝક કરી હતી, જેના અંતે અધિકારી ₹10,000માં કામ કરી આપવા માટે રાજી થયા હતા.


લાંચની રકમ નક્કી થયા બાદ અરજદાર લાંચ આપવા માંગતા ન હતા, તેથી તેમણે મહેસાણા ACBનો સંપર્ક કર્યો અને સમગ્ર ઘટનાની જાણ કરી. ACBની ટીમે તાત્કાલિક કાર્યવાહી હાથ ધરી અને મામલતદાર કચેરીમાં છટકું ગોઠવ્યું. આજે જ્યારે અરજદાર નક્કી કરેલી રકમમાંથી ₹7,500 આપવા માટે ગયા ત્યારે જ મહેસાણા ACBની ટીમે ભૂપેન્દ્ર ભાઈ પી પરમારને રંગેહાથ ઝડપી લીધા.


આ ઘટનાને પગલે બહુચરાજી મામલતદાર કચેરીમાં સન્નાટો છવાઈ ગયો હતો. સરકારી કચેરીમાં ભ્રષ્ટાચાર આચરી રહેલા આવા કર્મચારીઓ સામે ACBની કાર્યવાહીથી અન્ય કર્મચારીઓમાં પણ ફફડાટ જોવા મળી રહ્યો છે. હાલમાં ACB દ્વારા આ સમગ્ર મામલે વધુ તપાસ હાથ ધરવામાં આવી છે અને આરોપી કર્મચારી સામે કાયદેસરની કાર્યવાહી કરવામાં આવશે. આ ઘટના મહેસાણા જિલ્લામાં સરકારી કચેરીઓમાં ભ્રષ્ટાચારને ડામવાની ACBની સતત પ્રયાસોનું પરિણામ છે.