સુરત : કોરોના સંક્રમણે ફરી ફૂંફાડો માર્યો છે. શહેર-જિલ્લામાં કોરોનાએ ફરીથી અજગરી ભરડો કસવાનું શરૂ કર્યું છે. સુરતમાં ફરી એક વખત કોરોના બેકાબૂ બન્યો છે અને છેલ્લા થોડા દિવસોથી અમદાવાદ કરતાં વધુ કેસ નોંધાઈ રહ્યા છે. સુરતમાં ડાયમંડ અને ટેક્સટાઇલ ઉદ્યોગમાં ફરી કોરોના કેસ વધી રહ્યા છે. એક મહિનામાં 400 જેટલા પોઝિટિવ કેસ આ બંને ક્ષેત્રમાં નોંધાતા ફફડી ઉઠેલા તંત્રએ ટેકસટાઇલ અને ડાયમંડ ઉદ્યોગના કામદારો અઠવાડિયામાં ફરજીયાત ટેસ્ટ કરાવવાની અપીલ કરી હતી.
મહારાષ્ટ્રથી સુરત આવતાં લોકોમાં સંક્રમણનું વધુ પ્રમાણ
સુરતમાં બહાર થી આવતા લોકો સૌથી વધારે પોઝિટિવ નોંધાઈ રહ્યા છે. સુરતની બોર્ડર પર પાલિકાના આરોગ્ય વિભાગ દ્વારા ટેસ્ટિંગ ચાલુ છે જેમાં ચોંકાવનારા આંકડા સામે આવી રહ્યા છે. સુરતના સાયન ખાતે 25 પોઝિટિવ અને મરેજ ખાતે 10 પોઝિટિવ મળી આવ્યા છે. ખાસ કરીને મહારાષ્ટ્ર પ્રવાસ કરી સુરત પરત આવતા લોકો કોરોના સંક્રમિત જોવા મળી રહ્યા છે. 300 જેટલા ટેસ્ટ કરાય છે, તેમાંથી 35 થી વધુ પોઝિટિવ કેસ મળી રહ્યા છે.
સરુતના શહેરીજનોને મનપા કમિશ્રરે ઓડિયો મેસેજ જાહેર કરીને અપીલ કરી હતી. તેમણે કહ્યું, શહેરમાં કોરોનાની સ્થિતિ વકરી રહી છે અને બહારથી આવતા લોકો ક્વોરન્ટાઈન રહે. ધનવંતરી રથ દ્વારા જાણવામાં આવેલ છે કે જે કોવિડના કેસો આવે છે તેમાં કોરોના અને તાવનો ત્રણ ગણો વધારો થયેલ છે જે ચિંતાજનક બાબત છે. આજે પણ સ્કૂલ કોલેજમાં 39 કેસ નોંધાયા છે.
મહિલાઓમાં પોઝિટિવિટી રેશિયો પહેલા 30 ટકા હતો જે વધીને 45 ટકા થયો છે. અત્યારે કોવિડ 19ના લક્ષણો બદલાયા છે. હાલ ડાયરીયા, માથામાં દુખાવો, નબળાઈ જેવા લક્ષણો જોવા મળ્યા છે. હાલ રસીકરણ વધારે કરી રહ્યા છીએ. 111 સ્થળો પર રસીકરણ ચાલુ છે.
6 દિવસમાં 1200થી વધુ કેસ
16 માર્ચે સુરત કોર્પોરેશનમાં 263 કેસ, સોમવાર, 15 માર્ચે 240 કેસ નોંધાયા હતા. જ્યારે ગત રવિવાર, 14 માર્ચે 217 કેસ, શનિવાર, 13 માર્ચે 188 કેસ, શુક્રવાર, 12 માર્ચે 183 કેસ, ગુરુવાર, 11 માર્ચે 171 કેસ નોંધાયા હતા. સુરત કોર્પોરેશનમાં કોરોના કુલ પોઝિટિવ કેસની સંખ્યા42સ979 પરપહોંચી છે. જ્યારે સુરત શહેર અને જિલ્લામાં મળીને કુલ 1140 લોકોના મોત થયા છે. હાલ એક્ટિવ કેસની સંખ્યા 1391 છે.