સુરત: બોટાદમાં થયેલા કેમિકલ કાંડ બાદ પોલીસ દ્વારા સમગ્ર રાજ્યમાં કડક તપાસ શરૂ કરવામાં આવી છે. ઘણા વિસ્તારોમાં દેશી દારુના અડ્ડા પર કાર્યવાહી કરવામાં આવી છે. જેના કારણે દારુના બંધાણીઓ પરેશાન થઈ રહયા છે. હવે વાત સામે આવી છે કે, સુરતના પાંડેસરામાં દારૂ નહીં મળતા એક યુવકનું મોત થયું છે. 35 વર્ષીય શ્યામ નામદેવ કાલખેરનું મોત દારુ ન મળવાથી થયું છે. મૃતક પાંડેસરા પ્રેમનગરનો રહેવાસી છે. છેલ્લા 5 દિવસથી દારૂ ન મળતા યુવકનું મોત થયું હોવાની વાત પરિવારે કરી છે. આ અંગે પરિવારનું કહેવું છે કે, દારૂ ન મળતા યુવક મગજથી અસ્થિર જેવી હાલતમાં આવી ગયો હતો. કોઈ મારવા આવે છે એમ ભ્રમમાં આવી ભાગમ ભાગ કરતો હતો. આજે યુવકને નવી સિવિલ હોસ્પિટલમાં સારવાર અર્થે ખસેડાયો હતો. જો કે, તેને બચાવી શકાયો ન હતો. યુવાનના મોતથી પરિવારમાં શોકનો માહોલ છવાયો છે.
આણંદમાં મંદ બુદ્ધીની યુવતી પર બળાત્કાર
આણંદ તાલુકાના મોગર ગામની મંદ બુધ્ધિની યુવતી પર દુષ્કર્મ આચરવામાં આવ્યું છે. જેના કારણે મંદ બુધ્ધિની યુવતી 8 માસની ગર્ભવતી બની છે. પૂર્વ સમાજ કલ્યાણ બોર્ડ રાજ્ય સરકારના મહિલા ચેરમેન તેમજ જય ભારતી નારી સુરક્ષાનાં ચેરમેન હંસા કુંવરબા રાજને જાણ થતાં તેમણે વાસદ પોલીસને આ અંગે જાણ કરી છે. જે બાદ વાસદ પોલીસે એ યુવતીની કરી પૂછપરછ શરૂ કરી છે. હંસા કુંવરબા રાજ દ્વારા વાસદ પોલીસને મંદ બુધ્ધિની પીડિતાને ન્યાય અપાવવા મદદ કરી છે.
RFOએ મહિલા પર 25 વાર બળાત્કાર કર્યાના ગંભીર આક્ષેપ
ગીર સોમનાથ જિલ્લામાં વેરાવળના રેંજ ફોરેસ્ટ ઓફિસર વિરુદ્ધ બળાત્કારનો ગુન્હો નોંધાતા વનવિભાગમાં ખળભળાટ મચી ગયો છે. સુત્રાપાડાની એક પરણીતાએ નોંધાવી ફરિયાદ વેરાવળના રેંજ ફોરેસ્ટ ઓફિસર હરેશ ગલચર પર અનેક વાર બળાત્કાર ગુજાર્યાનો આક્ષેપ કર્યો છે. મહિલાએ ત્યાં સુધી ગંભીર આક્ષેપો કર્યા કે RFO હરેશ ગલચરે વેરાવળ ફોરેસ્ટ ઓફીસ તેમજ ફોરેસ્ટ ક્વાર્ટરમાં બોલાવી તેના પર અનેક વાર દુષ્કર્મ આચર્યું હતું. આ સમગ્ર મામલે ગુન્હામાં મદદગારી કરનાર દાનીશ પંજા અને રાજ ગલચર વિરુદ્ધ પણ ગુન્હો દાખલ કરવામાં આવ્યો છે. RFO હરેશ ગલચર વિરુદ્ધ ગુન્હો નોંધાતા વન વિભાગ માં ખળભળાટ મચી ગયો છે.
મહિલા પર બળાત્કાર 25 વાર ગુજાર્યાના આરોપ
વેરાવળ પોલીસ સ્ટેશનમાં સુત્રાપાડાના એક ગામની પરણીતાએ વેરાવળ રેંજ ફોરેસ્ટ ઓફિસર પર બળાત્કારના ગંભીર આક્ષેપ સાથે ફરિયાદ નોંધાવતા ખળભળાટ મચી ગયો છે.આ અંગે ગીર સોમનાથ જિલ્લા એ.એસ.પી. ઓમપ્રકાશ જાટ દ્વારા મીડિયાને માહિતી આપતા જણાવેલ કે, આ ઘટનાની પીડિત મહિલાના સંબંધી ગેરકાયદે લાયનશોમાં પકડાયેલ જેને છોડાવવા પીડિતા તેના પતિ સાથે RFO હરેશ ગલચર ને મળ્યા હતા. સંપર્કમાં આવેલ પીડિતાના મોબાઈલ નંબર મેળવી તેને મદદની લાલચ આપી શરીર સબંધ બાંધ્યો હતો. ત્યારબાદ પીડિતાના કહેવા મુજબધાકધમકી આપી ફોરેસ્ટ ક્વાર્ટર અને કચેરીમાં 25 વખત બળજબરીથી બળાત્કાર ગુજાર્યો હતો.