Vadodara Girl Death: ગુજરાતની સંસ્કારી નગરી વડોદરામાં એક અત્યંત હૃદયદ્રાવક અને કાળજું કંપાવનારી ઘટના સામે આવી છે. તાજેતરમાં વડોદરાના જવાહરનગર વિસ્તારમાં એક એપાર્ટમેન્ટના ત્રીજા માળે આવેલી ઘરની બાલ્કનીમાં કપડાં સૂકવી રહેલી શાલુ યાદવ નામની માસૂમ સગીરાનું ત્રીજા માળેથી નીચે પટકાવાના કારણે ઘટનાસ્થળે જ કરુણ મોત નિપજ્યું છે.
ઊંચાઈ પર દોરી સુધી હાથ ન પહોંચતો હોવાથી તે બાલ્કનીમાં એક ટેબલ પર ચઢીને કપડાં સૂકવવાનો પ્રયાસ કરી રહી હતી. જે દરમિયાન અચાનક સંતુલન ગુમાવી બેસતા તે સીધી ત્રીજા માળેથી નીચે જમીન પર પટકાઈ હતી. આ આકસ્મિક અને ગમખ્વાર દુર્ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને વ્હાલસોયી દીકરીના અકાળે અવસાનથી પરિવાર પર આભ તૂટી પડ્યું છે.
સ્થાનિકો અને પોલીસ પાસેથી મળતી માહિતી અનુસાર, આ ઘટના વડોદરાના જવાહરનગર પોલીસ સ્ટેશનની હદમાં આવેલા રહેણાંક વિસ્તારમાં બની હતી. સગીરા શાલુ યાદવ રોજિંદા કામના ભાગરૂપે બાલ્કનીમાં ધોયેલા કપડાં સૂકવવા માટે ગઈ હતી. બાલ્કનીમાં બાંધેલી દોરી ઊંચી હોવાને કારણે તેણે નીચે એક ટેબલ મૂક્યું હતું. શાલુ જેવી ટેબલ પર ચઢીને કપડાં ફેલાવવાનો પ્રયત્ન કરવા ગઈ, કે તુરંત જ તેનો પગ લપસ્યો હતો અથવા ટેબલ હલી જતાં તેણે પોતાનું શારીરિક સંતુલન ગુમાવી દીધું હતું.
ત્રીજા માળેથી શાલુ સીધી નીચે સિમેન્ટના રોડ પર પટકાતા તેને માથાના તેમજ શરીરના અન્ય ભાગે ગંભીર અને જીવલેણ ઈજાઓ પહોંચી હતી. લોહીલુહાણ હાલતમાં સ્થાનિક લોકો અને પરિવાજનો તેને બચાવવા દોડ્યા હતા, પરંતુ ગંભીર ઈજાઓના કારણે તેણે ઘટનાસ્થળે જ દમ તોડી દીધો હતો. પોતાની આંખો સામે એકની એક વ્હાલસોયી દીકરીને ગુમાવી દેતા માતાનો કરુણ આક્રંદ જોઈને ત્યાં હાજર તમામ લોકોની આંખો ભીની થઈ ગઈ હતી. ઘટનાની જાણ થતાં જ જવાહરનગર પોલીસનો કાફલો તાત્કાલિક સ્થળ પર પહોંચી ગયો હતો. પોલીસે મૃતદેહને પોસ્ટમોર્ટમ અર્થે હોસ્પિટલ ખસેડી, અકસ્માતે મોતનો ગુનો નોંધીને કાયદેસરની આગળની તપાસ હાથ ધરી છે. આ ઘટનાએ ફરી એકવાર ઊંચા બિલ્ડિંગોની બાલ્કનીમાં કામ કરતી વખતે રાખવામાં આવતી સાવચેતી અંગે મોટી ચિંતા જગાવી છે.