China COVID 19 Situation: કોરોનાને કારણે ચીનમાં સ્થિતિ સતત ખરાબ થઈ રહી છે. સ્થિતિ એવી છે કે હોસ્પિટલોમાં દર્દીઓને બેડ મળી રહ્યા નથી. સમગ્ર વ્યવસ્થા પડી ભાંગી છે. આ દરમિયાન ચીનમાં પણ લોકોનો ગુસ્સો વધી રહ્યો છે. એવા ઘણા વીડિયો સામે આવ્યા છે જેમાં લોકો સરકારનો વિરોધ કરી રહ્યા છે. આ સાથે લોકો શી જિનપિંગના રાજીનામાની પણ માંગ કરી રહ્યા છે. ચીનના લોકોનું કહેવું છે કે જિનપિંગ કોવિડ નીતિમાં સંપૂર્ણપણે નિષ્ફળ ગયા છે, તેથી જ તેમણે રાજીનામું આપવું જોઈએ. જોકે, જિનપિંગ વિરોધના અવાજને દબાવવાનો પૂરો પ્રયાસ કરી રહ્યા છે.
જિનપિંગ અને તેમની પાર્ટી વિરુદ્ધ ઉગ્ર સૂત્રોચ્ચાર
કોરોનાને લઈને ચીનમાં ખૂબ જ કડક નિયંત્રણો લાદવામાં આવ્યા છે. લોકોને ઘણી જગ્યાએ બંધ રાખવામાં આવ્યા છે અને તેમને બહાર જવા દેવામાં આવી રહ્યા નથી. આઇસોલેશન સ્થળોએ પોલીસ તૈનાત છે. આવી સ્થિતિમાં લોકોનો ગુસ્સો સતત વધી રહ્યો છે. જિનપિંગના રાજીનામા ઉપરાંત લોકો ચીનની કમ્યુનિસ્ટ પાર્ટીના વન પાર્ટી વન રૂલને નાબૂદ કરવાની પણ માંગ કરી રહ્યા છે. જે અંતર્ગત આવનારા ઘણા વર્ષો સુધી ચીનમાં માત્ર શી જિનપિંગ જ સત્તામાં રહેશે.
સરકારમાં પણ જિનપિંગની સરમુખત્યારશાહી ચાલે છે. જિનપિંગ ચીનમાં લોકો પર સતત મનમાની કરી રહ્યા છે, જેના કારણે તેમને લાંબા સમયથી વિરોધનો સામનો કરવો પડી રહ્યો છે. જિનપિંગ ફરીથી રાષ્ટ્રપતિ તરીકે ચૂંટાઈ રહ્યા હતા ત્યારે પણ ચીનમાં ઉગ્ર દેખાવો થયા હતા. જેમને દબાવવા માટે સરકારે પુરી તાકાતનો ઉપયોગ કર્યો હતો.
ચીનમાં કોરોનાના વધતા કેસ અને મોતને લઈને હોબાળો મચી ગયો છે. હોસ્પિટલોમાં લોકોની ભીડ વધી રહી છે અને ક્વોરેન્ટાઇન સેન્ટરો લોકોથી ભરેલા છે. તબીબોની અછતને જોતા વિવિધ જગ્યાએથી તબીબો અને કર્મચારીઓને બોલાવવામાં આવી રહ્યા છે. પૂર્વ પ્રાંતના સેંકડો ડોકટરો અને નર્સોને રાજધાનીમાં ફરજ પર બોલાવવામાં આવ્યા હતા. લોકો કહે છે કે નાના પ્રાંતો પણ કોરોનાની અસરનો સામનો કરી રહ્યા છે, આવી સ્થિતિમાં સરકાર ત્યાંથી ડોક્ટરોને બળજબરીથી હટાવી રહી છે.
ચીનમાં લાખો લોકોના મોતનો ડર
ચીનમાં કોરોનાના કેસ વધતા જોઈને અનેક અટકળો પણ લગાવવામાં આવી રહી છે. એક અંદાજમાં કહેવામાં આવ્યું છે કે ચીનમાં કોરોનાને કારણે લગભગ 10-15 લાખ લોકોના મોત થઈ શકે છે. 'ધ ઇકોનોમિસ્ટ'માં પ્રકાશિત થયેલા તાજેતરના અહેવાલ અનુસાર, લોકોના કોરોના સંક્રમણના દર અને અન્ય સંજોગોના અભ્યાસના આધારે લગભગ 1.5 મિલિયન ચીની નાગરિકોના મૃત્યુની આગાહી કરવામાં આવી છે. 'ધ લેન્સેટ'ના રિપોર્ટમાં કહેવામાં આવ્યું છે કે, "મૃત્યુની સંખ્યાનો અંદાજ લગાવવો મુશ્કેલ છે. વૃદ્ધો અને નબળા લોકોને આપવામાં આવતી એન્ટી-કોવિડ રસીની સંખ્યા પર ઘણું નિર્ભર રહેશે.