Corona Virus: છેલ્લા ત્રણ મહિનામાં કૉવિડ-19નું નવું વેરિએન્ટ BA.2.86 અમેરિકામાં ફેલાઈ રહ્યું હોવાના અહેવાલ છે. હાલ અમેરિકામાં આ નવા વેરિએન્ટથી દર્દીઓની સંખ્યામાં ઝડપથી વધારો થઇ રહ્યો છે. પરંતુ નિષ્ણાતો માને છે કે તેના ગંભીર પરિણામો નથી. યૂએસ સેન્ટર્સ ફોર ડિસીઝ કંટ્રોલ એન્ડ પ્રિવેન્શન (CDC) મુજબ, BA.2.86 એ Omicron BA.2 નું સબ વેરિએન્ટ છે. અત્યારે અમેરિકામાં આ પ્રકારના 10 ટકા કેસ છે.
જોકે, આ વેરિઅન્ટના કેસ વધી રહ્યા હોવાનું જાણવા મળ્યું છે. બે અઠવાડિયા પહેલા અમેરિકામાં BA.2.86 વેરિઅન્ટના માત્ર 3 ટકા કેસ જોવા મળ્યા હતા.
'બીજા વેરિએન્ટની લઇ રહ્યાં છે જગ્યા'સીડીસી અનુસાર, BA.2.86 વેરિઅન્ટના વધતા જતા કેસોનો અર્થ એ નથી કે કોવિડના કેસ વધી રહ્યા છે અથવા આ પ્રકાર અગાઉના વેરિઅન્ટ કરતાં વધુ ખતરનાક છે. CDC એ કહ્યું, "એવું લાગે છે કે BA.2.86 કૉવિડ કેસોની સંખ્યામાં વધારો કરી રહ્યું નથી પરંતુ અન્ય પ્રકારોને બદલી રહ્યું છે."
CDC એ વિશ્વ આરોગ્ય સંસ્થા (WHO) દ્વારા BA.2.86 અંગે આપવામાં આવેલા તાજેતરના અહેવાલ સાથે સહમત છે. WHO એ BA.2.86 ને અન્ય કોઈપણ પ્રકાર કરતા ઓછું જોખમ ધરાવતા પ્રકાર તરીકે વર્ણવ્યું છે. સંગઠને કહ્યું છે કે આ પ્રકારો વ્યાપક નુકસાન પહોંચાડી શકતા નથી, તેથી તેમના તરફથી કોઈ ખતરો નથી.
BA.2.86 વેરિએન્ટથી કેટલું નુકસાન ?અમેરિકામાં તાજેતરના સમયમાં કૉવિડના દર્દીઓની સંખ્યામાં વધારો થયો છે. 18 નવેમ્બરના રોજ CDC દ્વારા આપવામાં આવેલી માહિતી અનુસાર, તે અઠવાડિયે 18,119 કૉવિડ દર્દીઓને હોસ્પિટલમાં દાખલ કરવામાં આવ્યા હતા. આ અઠવાડિયે કૉવિડને કારણે 506 મૃત્યુ પણ થયા છે. આ સિવાય ઓહાયો કાઉન્ટી અને મેસેચ્યૂસેટ્સમાં બાળકોમાં ન્યૂમૉનિયાના કેસમાં વધારો જોવા મળ્યો છે. ઉલ્લેખનીય છે કે ચીનમાં પણ છેલ્લા અઠવાડિયાથી બાળકોમાં ન્યુમોનિયાના કેસ ઝડપથી વધી રહ્યા છે.