Donald Trump tariff war: અમેરિકાના પ્રમુખ ડોનાલ્ડ ટ્રમ્પ તાજેતરમાં ટેરિફના મુદ્દે અમેરિકન કોર્ટના સંભવિત નિર્ણયથી ચિંતિત જણાઈ રહ્યા છે. તેમણે શુક્રવારે કોર્ટને વોર્નિંગ આપી હતી કે ઇન્ટરનેશનલ ઇમર્જન્સી ઇકોનોમી પાવર્સ એક્ટ (IEEPA) ને નબળો ન પાડવો જોઈએ. ટ્રમ્પનો દાવો છે કે આ કાયદાનો ઉપયોગ કરીને લાદવામાં આવેલા ટેરિફથી અમેરિકાને આર્થિક ફાયદો થઈ રહ્યો છે. જો કોર્ટ આ કાયદા હેઠળ ટ્રમ્પના નિર્ણયોને ઉલટાવી દેશે, તો તે તેમના માટે એક મોટો આંચકો હશે.

અમેરિકાના પ્રમુખ ડોનાલ્ડ ટ્રમ્પે IEEPA કાયદાના ઉપયોગ અંગે કોર્ટને વોર્નિંગ આપી છે. તેમણે કહ્યું કે જો આ કાયદાને નબળો પાડવામાં આવશે તો 1929 જેવી મહામંદી આવી શકે છે, જે અમેરિકાના અર્થતંત્રને નષ્ટ કરી નાખશે. ટ્રમ્પે દાવો કર્યો કે ટેરિફને કારણે શેરબજારમાં રેકોર્ડ બની રહ્યા છે અને દેશના ખજાનામાં સેંકડો અબજ ડોલર આવી રહ્યા છે. ઘણા કાનૂની નિષ્ણાતો માને છે કે IEEPA નો ઉપયોગ વેપાર નીતિ માટે તેના મૂળ હેતુથી વિરુદ્ધ છે. જો કોર્ટ આ ટેરિફના નિર્ણયને ઉલટાવી દે, તો ટ્રમ્પની વેપાર નીતિઓને મોટો ફટકો પડશે.

ટ્રમ્પની વોર્નિંગ અને દાવો

ટ્રમ્પે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર પોસ્ટ કરીને IEEPA કાયદાનું મહત્ત્વ સમજાવ્યું. તેમણે કહ્યું કે આ કાયદો પ્રમુખને આર્થિક વ્યવહારો પર વિશેષ સત્તા આપે છે. ટ્રમ્પે દાવો કર્યો કે તેમના ટેરિફના કારણે અમેરિકાને ઘણો આર્થિક લાભ થઈ રહ્યો છે. "ટેરિફનો શેરબજાર પર ભારે હકારાત્મક અસર પડી રહી છે. લગભગ દરરોજ નવા રેકોર્ડ બની રહ્યા છે. આ ઉપરાંત, આપણા દેશના ખજાનામાં સેંકડો અબજો ડોલર આવી રહ્યા છે."

તેમણે કોર્ટને સ્પષ્ટપણે વોર્નિંગ આપી કે જો IEEPA કાયદાનો ઉપયોગ નબળો પાડવામાં આવશે તો 1929 જેવી મહામંદી આવશે. 1929 ની મહામંદી આધુનિક ઇતિહાસની સૌથી ગંભીર આર્થિક મંદી હતી, જેના કારણે બેંકો નાદાર થઈ હતી અને બેરોજગારી ચરમસીમાએ પહોંચી હતી. ટ્રમ્પનું કહેવું છે કે આવા કોઈ પણ ન્યાયિક નિર્ણયથી અમેરિકાનું અર્થતંત્ર ખરાબ રીતે પ્રભાવિત થશે.

શા માટે ટ્રમ્પ ચિંતિત છે?

ડોનાલ્ડ ટ્રમ્પ રાષ્ટ્રીય સુરક્ષાની ચિંતાઓના બહાને વેપાર પ્રતિબંધો લાદવા માટે વારંવાર IEEPA નો ઉપયોગ કરે છે. જોકે, ઘણા કાનૂની નિષ્ણાતો અને વિરોધ પક્ષના નેતાઓ દલીલ કરી રહ્યા છે કે આ કાયદાનો ઉપયોગ વેપાર નીતિ માટે તેના મૂળ હેતુથી વિરુદ્ધ છે. તેઓ માને છે કે IEEPA નો ઉપયોગ રાષ્ટ્રીય કટોકટી જેવી પરિસ્થિતિઓમાં જ થવો જોઈએ, વેપાર ટેરિફ લાદવા માટે નહીં.

આ મુદ્દો હવે અમેરિકન કોર્ટમાં છે. જો કોર્ટ ટ્રમ્પના ટેરિફને ગેરકાયદેસર ઠેરવે અથવા IEEPA હેઠળ પ્રમુખની સત્તાઓ પર મર્યાદા લાદે, તો તે ટ્રમ્પની વેપાર નીતિ માટે એક મોટો કાનૂની અને રાજકીય આંચકો હશે. ટ્રમ્પની આ વોર્નિંગ દર્શાવે છે કે તેઓ આ સંભવિત કાનૂની હારથી ડરી રહ્યા છે.