આ દેશમાં ઓફિસમાં કેમ સૂઇ રહ્યા છે કર્મચારી? એક રાત કામ કરવાના મળી રહ્યા છે 23 હજાર રૂપિયા

કેટલીક કંપનીઓ કર્મચારીઓને સૂવાના પલંગ, ભોજનથી લઇને સાબુ પણ આપી રહી છે.

Coronavirus Lockdown in China: ચીનમાં બેંકો અને ઇન્વેસ્ટમેન્ટ ફર્મ્સ તેમના કર્મચારીઓને ઓફિસમાં બોલાવી રહી છે અને સાથે જ તેમને ઓફિસમાં જ રહેવા માટે કહી રહી છે. જેના કારણે કર્મચારીઓને ઓફિસની અંદર જ સૂવું પડે છે. આ પાછળનું મુખ્ય કારણ ચીનમાં વધી રહેલા કોરોનાના વધતા કેસ અને લોકડાઉન છે.

નોંધનીય છે કે હાલમાં ચીનના મુખ્ય શહેર શાંઘાઈમાં લોકડાઉન છે. ચીનના આ શહેરમાં 1 હજારથી વધુ નાણાકીય સંસ્થાઓ છે. ચીનનું સૌથી મહત્વપૂર્ણ સ્ટોક એક્સચેન્જ પણ શાંઘાઈમાં છે. 'CNN'ના એક રિપોર્ટમાં આ જાણકારી આપવામાં આવી છે. રિપોર્ટમાં એક વ્યક્તિને ટાંકીને લખવામાં આવ્યું હતું કે વેપારીઓ અને ફંડ મેનેજરને રાત્રિ રોકાણ માટે (પ્રતિ નાઇટ) 6 હજારથી 23 હજાર રૂપિયા મળી રહ્યા છે. ઘણી કંપનીઓએ કર્મચારીઓના ડેસ્કની નજીક ફોલ્ડિંગ બેડ પણ લગાવ્યા છે. કેટલીક કંપનીઓ કર્મચારીઓને સૂવાના પલંગ, ભોજનથી લઇને સાબુ પણ આપી રહી છે.

ઓફિસની અંદર બેડ

Zhong Ou એસેટ મેનેજમેન્ટ એક ચીની ફર્મ છે. તેમની પાસે 74 હજાર કરોડથી વધુની સંપત્તિનું સંચાલન છે. ફર્મે કહ્યું કે તેના ઘણા ઇન્વેસ્ટમેન્ટ ડાયરેક્ટર્સ અને ફંડ મેનેજરોએ આ મહિનાની શરૂઆતથી રાત્રે ઓફિસમાં રહેવાનું શરૂ કર્યું છે. એક કારોબારી જે ઓનસાઇટ ચીફ છે, તે છેલ્લા 15 દિવસથી ઓફિસમાં જ છે. કંપનીએ સોમવારે WeChat પર આ માહિતી શેર કરી છે. ફોરસાઇટ ફંડ નામની બીજી ફર્મ તેના કર્મચારીઓને 16 માર્ચથી ઓફિસમાં રોકી રહી છે.

તાજેતરમાં ચીનના સોશિયલ મીડિયા પ્લેટફોર્મ વેક્સિન પર એક ફૂટેજ સામે આવ્યા છે. જ્યાં કેટલાક કર્મચારીઓ ગાદલા પર સૂતા જોવા મળ્યા હતા. જો કે, આમાં સૂતી વખતે કેટલાક લોકોને અન્ય સમસ્યાઓનો પણ સામનો કરવો પડી રહ્યો છે. કેટલાક લોકોને માર્બલ ફ્લોર અને સ્લીપિંગ બેગ પર સૂવું મુશ્કેલ લાગી રહ્યું છે.

એક મહિલાએ કહ્યું, 'કેટલાક દિવસો ઘણી તકલીફ હતી, કેટલીકવાર તેઓ રાત્રે 2 થી 3 વાગ્યા સુધી સૂઈ શકતા ન હતા.' આ મહિલાએ એમ પણ જણાવ્યું કે ઘણા સહકર્મીઓ સૂતી વખતે નસકોરા પણ લેતા હતા, આવી સ્થિતિમાં આ લોકોને મીટિંગ રૂમમાં શિફ્ટ કરવામાં આવ્યા હતા.

ચીનમાં શાંઘાઈ છેલ્લા કેટલાક દિવસોમાં દેશમાં કોરોનાનું નવું કેન્દ્ર બની ગયું છે. સીએનએનના અહેવાલ મુજબ, 1 માર્ચથી અત્યાર સુધીમાં 25 હજારથી વધુ કેસ રિપોર્ટ્સ થયા છે.સોમવારથી લોકડાઉન શરૂ થયું છે. જેના કારણે શાંઘાઈના પૂર્વ ભાગમાં આવેલા પુડોંગ શહેરમાં 1 કરોડથી વધુ લોકો પ્રભાવિત થયા છે. લોકોને 4 દિવસ ઘરની અંદર રહેવા માટે કહેવામાં આવ્યું છે.