International Criminal Court: બાંગ્લાદેશના પૂર્વ વડાપ્રધાન શેખ હસીનાના બાંગ્લાદેશ છોડ્યાના ત્રણ મહિના બાદ ત્યાંની રાજકીય સ્થિતિ સ્થિર થઈ નથી. શેખ હસીનાની પાર્ટી અવામી લીગે વચગાળાની સરકારના મુખ્ય સલાહકાર મોહમ્મદ યુનુસ અને 61 અન્ય વિરુદ્ધ નેધરલેન્ડ સ્થિત ઈન્ટરનેશનલ ક્રિમિનલ કોર્ટ (ICC)નો સંપર્ક કર્યો છે.
'આંદોલનના નામે નરસંહાર થયો'
અવામી લીગના નેતા અને સિલહટના પૂર્વ મેયર અનવરુજ્જમાન ચૌધરીએ વીડિયો સંદેશ જારી કરીને કહ્યું, "5થી 8 ઓગસ્ટ સુધી બાંગ્લાદેશમાં વિદ્યાર્થી આંદોલનના નામે ક્રૂર નરસંહાર થયો છે, જેમાં અવામી લીગના નેતા કાર્યકરો અને તેના વિવિધ સહયોગીઓ, બાંગ્લાદેશમાં રહેતા હિન્દુ, ક્રિશ્ચિયન, બૌદ્ધ અને બાંગ્લાદેશના પોલીસ બળને નિશાન બનાવવામાં આવ્યા. આ સંબંધમાં અમે ICCને બધા તથ્યો અને પુરાવા સોંપી દીધા છે."
800 પાનાંનો દસ્તાવેજ ઈન્ટરનેશનલ કોર્ટને મોકલવામાં આવ્યો
મોહમ્મદ યુનુસ ઉપરાંત જે આરોપીઓમાં તેમના મંત્રીમંડળના બધા સભ્યો અને વિરોધ કરી રહેલા વિદ્યાર્થી નેતાઓ સામેલ છે. વીડિયો સંદેશમાં અવામી લીગના નેતાએ જણાવ્યું કે તેમણે ICCને કરેલી ફરિયાદમાં લગભગ 800 પાનાંનો દસ્તાવેજ જોડ્યો છે. તેમણે જણાવ્યું કે ટૂંક સમયમાં ઈન્ટરનેશનલ ક્રિમિનલ કોર્ટમાં 15 હજાર વધુ ફરિયાદો નોંધાવવામાં આવશે, જેની તૈયારી ચાલી રહી છે. તેમણે કહ્યું કે આ હિંસાનો ભોગ બનેલા વ્યક્તિઓ એક એક કરીને ફરિયાદ નોંધાવશે.
અવામી લીગને રેલી યોજવાની મંજૂરી નહીં
બાંગ્લાદેશની વચગાળાની સરકારે શનિવારે (9 નવેમ્બર 2024) અવામી લીગને ફાસીવાદી જાહેર કરતાં કહ્યું કે તે પદભ્રષ્ટ વડાપ્રધાન શેખ હસીનાની પાર્ટીને રવિવારે (10 નવેમ્બર 2024) પ્રસ્તાવિત રેલી યોજવાની મંજૂરી નહીં આપે. મુખ્ય સલાહકાર મુહમ્મદ યુનુસના પ્રેસ સચિવ શફીકુલ આલમે એક ફેસબુક પોસ્ટમાં કહ્યું કે વચગાળાની સરકાર દેશમાં કોઈપણ પ્રકારની હિંસા કે કાયદો અને વ્યવસ્થાને ભંગ કરવાના કોઈપણ પ્રયાસને સહન નહીં કરે.
આલમે ચેતવણી આપતા કહ્યું, "જે કોઈ વ્યક્તિ સામૂહિક હત્યારા અને સરમુખત્યાર શેખ હસીના પાસેથી આદેશ લઈને રેલી, સભા અને જુલુસ યોજવાનો પ્રયાસ કરશે, તેને કાયદો લાગુ કરનારી એજન્સીઓની પૂરી સખતાઈનો સામનો કરવો પડશે."
તમને જણાવી દઈએ કે, આ વર્ષે જૂનમાં બાંગ્લાદેશની સર્વોચ્ચ અદાલતે 2018ના બાંગ્લાદેશ ક્વોટા સુધારણા આંદોલનના જવાબમાં લેવાયેલા સરકારના નિર્ણયને ઉલટાવીને અને સ્વતંત્રતા સેનાનીઓના વંશજો માટે 30 ટકા ક્વોટા પુનઃસ્થાપિત કરવાના વિરોધમાં વિરોધ શરૂ થયો હતો. વિદ્યાર્થીઓને લાગવા માંડ્યું કે મેરિટના આધારે તેમની પાસે મર્યાદિત તકો હશે. આ વિરોધ સરકારી નોકરીઓ માટે પુનઃસ્થાપિત ક્વોટા સિસ્ટમની પ્રતિક્રિયા તરીકે શરૂ થયો હતો. પરંતુ બાદમાં તે હિંસક બનવા લાગ્યો હતો. જે બાદ બાંગ્લાદેશના પીએમ શેખ હસીનાએ 5 ઓગસ્ટે દેશ છોડવો પડ્યો હતો.
આ પણ વાંચોઃ