અમેરિકાના ટેક્સાસમાં ડલાસ પોલીસના ત્રણ અધિકારીઓને ગુરુવારે રાત્રે ઇસ્ટ લેડબેટર ડ્રાઇવના 900 બ્લોકમાં ગોળી મારી દેવામાં આવી હતી. સીબીએસ ન્યૂઝ ટેક્સાસના સૂત્રોના જણાવ્યા અનુસાર હુમલાખોરને પણ ઠાર મારવામાં આવ્યો હતો. ઘાયલોને તાત્કાલિક સ્થાનિક હોસ્પિટલમાં દાખલ કરવામાં આવ્યા હતા. બેલેયર યુનિવર્સિટી મેડિકલ સેન્ટર ખાતે ભારે પોલીસ દળ તૈનાત છે. અધિકારીઓની સ્થિતિ વિશે તાત્કાલિક કોઈ માહિતી ઉપલબ્ધ નથી. પોલીસ આ મામલે તપાસ કરી રહી છે. આ ઘટનાએ ડલ્લાસ શહેરમાં સુરક્ષાને લઈને ચિંતા ઊભી કરી છે અને તમામની નજર પોલીસની તપાસ પર છે.
અમેરિકામાં ગોળીબારની આટલી બધી ઘટનાઓ કેમ બને છે?
અમેરિકામાં ગોળીબારની વધતી જતી ઘટનાઓ ચિંતાનો વિષય બની ગઈ છે. તાજેતરના અહેવાલો અને વિશ્લેષણ દર્શાવે છે કે આ સ્થિતિનું મુખ્ય કારણ દેશના દરેક બીજા ઘરોમાં બંદૂકો છે. રિપોર્ટ્સ અનુસાર અમેરિકામાં 100માંથી 88 લોકો પાસે બંદૂક છે. 2019 અને 2021ની વચ્ચે યુએસમાં 7.5 મિલિયનથી વધુ લોકોએ પ્રથમ વખત બંદૂક ખરીદી હતી.
અમેરિકામાં ગોળીબારના કારણે મોત
અમેરિકામાં ગોળીબારના કારણે મોતનો આંકડો ચિંતાજનક છે. 2017 સુધીમાં અમેરિકામાં ગોળીબારના કારણે 1.5 મિલિયનથી વધુ લોકો મૃત્યુ પામ્યા છે. આ આંકડો 1775માં અમેરિકાના સ્વતંત્રતા યુદ્ધ દરમિયાન માર્યા ગયેલા લોકોની સંખ્યા પછી સૌથી વધુ છે. માત્ર 2020માં જ ગોળીબારના કારણે 45,000થી વધુ લોકોના મોત થયા છે.
તેનું નિયંત્રણ કેમ નથી થતું?
અમેરિકામાં બંદૂક નિયંત્રણના અભાવ પાછળનું મુખ્ય કારણ રાજકારણ છે. અમેરિકામાં એક મોટું લૉબી ગ્રુપ છે જે બંદૂકના અધિકારોને સમર્થન આપે છે. મોટી સંખ્યામાં લોકો તેને પોતાનો અધિકાર માને છે અને તેનું સમર્થન કરે છે. ચૂંટણીના રાજકારણમાં આ મુદ્દો એટલો મહત્વનો છે કે કોઈ પણ સરકાર તેના પર પ્રતિબંધ મૂકવા માટે નક્કર પગલાં લેવાની હિંમત કરતી નથી.
નેશનલ રાઇફલ એસોસિએશન (એનઆરએ) પણ એક વિશાળ લૉબી ગ્રુપ છે જે બંદૂકની માલિકીના અધિકારોના સમર્થનમાં એક્ટિવ છે. આ યુનિયન પાસે એટલી નાણાકીય શક્તિ છે કે તે અમેરિકાની ચૂંટણીઓને પણ પ્રભાવિત કરી શકે છે.
અમેરિકામાં ઘણા લોકો માને છે કે હિંસક વિડિયો ગેમ્સ પણ ગોળીબારની ઘટનાઓનું કારણ છે. ભૂતપૂર્વ રાષ્ટ્રપતિ ડોનાલ્ડ ટ્રમ્પે પણ એક વખત નિવેદન આપ્યું હતું કે જો ગોળીબાર બંધ કરવો હોય તો હિંસાને પ્રોત્સાહન આપતી વીડિયો ગેમ્સ પર પ્રતિબંધ મૂકવો પડશે.