UAE Missile Threat Alert: મધ્ય પૂર્વમાં ફરી એકવાર તણાવનો માહોલ જોવા મળી રહ્યો છે. છેલ્લા કેટલાક મહિનાઓની શાંતિ બાદ UAE (યુનાઈટેડ આરબ અમીરાત) દ્વારા દેશના નાગરિકો માટે 1 ગંભીર ચેતવણી બહાર પાડવામાં આવી છે. દેશ પર 'સંભવિત મિસાઈલ હુમલા' નો ખતરો હોવાનું જણાવીને લોકોને તાત્કાલિક સલામત સ્થળે આશ્રય લેવા માટે કહેવામાં આવ્યું છે.
એર ડિફેન્સ સિસ્ટમે પકડ્યો ખતરો
દેશની નેશનલ ઈમરજન્સી ક્રાઈસિસ એન્ડ ડિઝાસ્ટર મેનેજમેન્ટ ઓથોરિટી (NCEMA) એ સોશિયલ મીડિયા પ્લેટફોર્મ 'X' પર 1 સત્તાવાર નિવેદન જાહેર કર્યું છે. તેમાં જણાવાયું છે કે, તેમની અત્યાધુનિક એર ડિફેન્સ સિસ્ટમે દેશને નિશાન બનાવી રહેલા 1 મોટા મિસાઈલ ખતરાને ડિટેક્ટ કર્યો (શોધી કાઢ્યો) છે.
ઓથોરિટીએ સ્પષ્ટ શબ્દોમાં લખ્યું છે કે, "UAE ની હવાઈ સંરક્ષણ પ્રણાલીઓએ દેશ પર તોળાઈ રહેલા મિસાઈલ ખતરાની ઓળખ કરી છે. મહેરબાની કરીને સલામત સ્થળે જતા રહો અને માત્ર સત્તાવાર ચેનલો દ્વારા આપવામાં આવતી ચેતવણીઓ અને અપડેટ્સનું જ પાલન કરો."
અમેરિકા-ઈરાન કરાર પૂરો થતા જ એલર્ટ
ખાસ નોંધનીય બાબત એ છે કે, આ એલર્ટ એવા સમયે સામે આવ્યું છે જ્યારે મધ્ય પૂર્વમાં ચાલી રહેલી લડાઈને શાંત કરવાના હેતુથી અમેરિકા (US) અને ઈરાન વચ્ચે થયેલો સમજૂતી કરાર (MoU) સોમવારે જ પૂરો થઈ ગયો છે. આ કરાર સમાપ્ત થયાના બરાબર 1 દિવસ પછી જ આ મિસાઈલ ખતરાની ચેતવણી આપવામાં આવતા અનેક તર્ક-વિતર્ક સર્જાયા છે.
ગૃહ મંત્રાલયની પણ કડક સૂચના
આ ગંભીર પરિસ્થિતિને ધ્યાનમાં રાખીને, ગૃહ મંત્રાલયે પણ લોકોને એલર્ટ કર્યા છે. મંત્રાલયે સૂચના આપી છે કે વર્તમાન પરિસ્થિતિ અને 'સંભવિત મિસાઈલ ખતરા' ને જોતા, દરેક વ્યક્તિએ પોતાની આસપાસની "સૌથી નજીકની સુરક્ષિત ઈમારત" માં જઈને પોતાનો બચાવ કરવો જોઈએ.
અગાઉ જૂનમાં વાગ્યું હતું ખોટું એલાર્મ
અત્રે ઉલ્લેખનીય છે કે, દેશમાં આ અગાઉ છેલ્લે મે મહિનામાં મિસાઈલની ચેતવણી આપવામાં આવી હતી. ત્યારબાદ, જૂન મહિનામાં નેશનલ અર્લી વોર્નિંગ સિસ્ટમમાં કોઈ ટેક્નિકલ ખામી સર્જાઈ હતી. આ ખામીને કારણે દેશના રહેવાસીઓના ફોન પર ભૂલથી સંભવિત મિસાઈલ ખતરા અંગેના ફેક એલર્ટ (ખોટા મેસેજ) પહોંચી ગયા હતા, જેનાથી થોડો સમય અફરાતફરીનો માહોલ સર્જાયો હતો.