સંયુક્ત આરબ અમીરાતે મંગળવારે જાહેરાત કરી હતી કે તે યમનમાંથી તેના સૈનિકોને પાછા બોલાવી રહ્યું છે. આ નિર્ણય સાઉદી અરેબિયા દ્વારા 24 કલાકની અંદર યમન છોડવાની અમીરાતી દળોની માંગને સમર્થન વચ્ચે લેવામાં આવ્યો છે. આને ખાડી ક્ષેત્રની બે મોટી શક્તિઓ અને તેલ ઉત્પાદક દેશો વચ્ચે એક મોટા સંકટ તરીકે જોવામાં આવી રહ્યું છે.
કલાકો પહેલા સાઉદીના નેતૃત્વ હેઠળના ગઠબંધને યમનના દક્ષિણ બંદર શહેર મુકલ્લા પર હવાઈ હુમલો કર્યો હતો. રિયાધે દાવો કર્યો હતો કે આ હુમલો અમીરાતના હથિયારોના શિપમેન્ટને લક્ષ્ય બનાવીને કરવામાં આવ્યો હતો. આ હુમલો સાઉદી અરેબિયા અને યુએઈ વચ્ચે વધતા મતભેદોમાં અત્યાર સુધીનો સૌથી મોટો તણાવ માનવામાં આવે છે.
યુએઈ 'સ્વૈચ્છિક રીતે' મિશન સમાપ્ત કર્યું
એક સમયે પ્રાદેશિક સુરક્ષાના બે મજબૂત સ્તંભ માનવામાં આવતા બંને દેશો હવે તેલ ઉત્પાદનથી લઈને ભૂરાજકીય પ્રભાવ સુધીના અનેક મુદ્દાઓ પર અલગ રીતે આગળ વધી રહ્યા હોય તેવું લાગે છે. યુએઈના સંરક્ષણ મંત્રાલયે કહ્યું કે તેણે યમનમાં તૈનાત તેના આતંકવાદ વિરોધી ટુકડીઓના મિશનને સ્વેચ્છાએ સમાપ્ત કરી દીધું છે. આ તેના છેલ્લા સૈનિકો હતા, કારણ કે યુએઈએ 2019માં ઔપચારિક રીતે તેની લશ્કરી હાજરીનો અંત લાવ્યો હતો.
મંત્રાલય અનુસાર, ત્યાં હાજર દળો મર્યાદિત આતંકવાદ વિરોધી ભૂમિકામાં આંતરરાષ્ટ્રીય ભાગીદારો સાથે ફક્ત સંકલન કરી રહ્યા હતા. સરકારી સમાચાર એજન્સી અનુસાર, તાજેતરના વિકાસને ધ્યાનમાં રાખીને સમગ્ર પરિસ્થિતિની વ્યાપક સમીક્ષા કર્યા પછી આ નિર્ણય લેવામાં આવ્યો હતો.
યુએઈ સામે સાઉદી અરેબિયાના આરોપો
સાઉદી અરેબિયાએ યુએઈ પર યમનના અલગતાવાદી સંગઠન સાઉધર્ન ટ્રાન્ઝિશન કાઉન્સિલ પર સાઉદી સરહદ તરફ આગળ વધવા માટે દબાણ કરવાનો આરોપ મૂક્યો હતો. રિયાધે આને તેની રાષ્ટ્રીય સુરક્ષા માટે રેડ લાઈન ગણાવી હતી. જો કે, યમનમાંથી બાકીના યુએઈ સૈનિકોની પાછી ખેંચી લેવાથી હાલ પૂરતો તણાવ ઓછો થઈ શકે છે. ઈઝરાયેલ-હમાસ સંઘર્ષની વચ્ચે હવે બે શક્તિશાળી આરબ દેશો, સાઉદી અરેબિયા અને સંયુક્ત આરબ અમીરાત (UAE), આમને-સામને આવી ગયા છે. સાઉદી અરેબિયાએ યમનના દરિયાકિનારે લંગરાયેલા યુએઈના બે જહાજો પર હવાઈ હુમલો (Airstrike) કર્યો છે. સાઉદીનો દાવો છે કે આ જહાજોમાં રહેલો સૈન્ય સામાન તેમની રાષ્ટ્રીય સુરક્ષા માટે જોખમરૂપ હતો. આ ઘટના બાદ સાઉદીએ યુએઈને સૈન્ય પાછું ખેંચવા માટે 24 કલાકનું અલ્ટીમેટમ પણ આપ્યું હતું.