Vastu Tips: ભૂલથી પણ રાત્રે કપડાં ન ધોતા! ઘરમાં આવશે દરિદ્રતા અને નકારાત્મક ઊર્જા, જાણો વાસ્તુ શાસ્ત્રનું ચોંકાવનારૂં સત્ય

શાસ્ત્રો અને જ્યોતિષમાં સૂર્યાસ્ત પછી કપડાં ધોવાને માનવામાં આવે છે અશુભ, જાણો તેના પાછળના 5 મુખ્ય કારણો.

આજના ભાગદોડભર્યા જીવનમાં સમયના અભાવે ઘણા લોકો રાત્રે ઓફિસથી આવીને ઘરકામ પતાવતા હોય છે, જેમાં કપડાં ધોવાનો પણ સમાવેશ થાય છે.

જોકે, જ્યોતિષ અને વાસ્તુ શાસ્ત્રની દ્રષ્ટિએ રાત્રિના સમયે કપડાં ધોવાને વર્જિત અને અશુભ માનવામાં આવે છે. શાસ્ત્રો મુજબ, સૂર્યાસ્ત પછી કરવામાં આવતી આ પ્રવૃત્તિ ઘરની સુખ-શાંતિ હણી શકે છે અને નકારાત્મક ઉર્જાને આમંત્રણ આપે છે. આ લેખમાં આપણે જાણીશું કે રાત્રે કપડાં કેમ ન ધોવા જોઈએ અને તેની વ્યક્તિના જીવન તેમજ આર્થિક સ્થિતિ પર શું ગંભીર અસર પડી શકે છે.

હિન્દુ ધર્મની પરંપરાઓ અને શાસ્ત્રો અનુસાર, દિવસનો સમય કર્મ અને પુરુષાર્થ માટે છે, જ્યારે રાત્રિનો સમય આરામ અને ઈશ્વરની આરાધના માટે છે. સૂર્યાસ્ત બાદ વાતાવરણમાં દૈવી શક્તિઓનો પ્રભાવ ઓછો થાય છે અને નકારાત્મક શક્તિઓ વધુ સક્રિય બને છે. રાત્રે કપડાં ધોવાથી ઘરની પવિત્રતા અને સકારાત્મક ઉર્જામાં વિક્ષેપ પડે છે. ગૃ સફાઈના કાર્યો રાત્રે કરવાથી ઘરમાં ક્લેશ અને અશાંતિનું વાતાવરણ સર્જાઈ શકે છે.

જ્યોતિષ શાસ્ત્રમાં ચંદ્રને 'મન' અને 'પાણી'નો કારક માનવામાં આવે છે. રાત્રિના સમયે ચંદ્રનો પ્રભાવ પૃથ્વી પર સૌથી વધુ હોય છે. એવી માન્યતા છે કે રાત્રે પાણીનો વધુ પડતો વ્યય કરવાથી અથવા કપડાં ધોવાથી ચંદ્ર નબળો પડે છે. આના કારણે વ્યક્તિમાં માનસિક અસ્થિરતા, વધુ પડતા વિચારો, તણાવ અને બેચેની જેવી સમસ્યાઓ ઉભી થાય છે. પાણી સાથે જોડાયેલું આ કાર્ય રાત્રે કરવાથી મનની શાંતિ હણાઈ શકે છે.

ધાર્મિક દ્રષ્ટિકોણથી જોઈએ તો, એવું માનવામાં આવે છે કે જે ઘરમાં રાત્રે કપડાં ધોવાતા હોય ત્યાં દેવી લક્ષ્મીનો વાસ ટકતો નથી. પ્રાચીન સમયથી ચાલી આવતી માન્યતા મુજબ, સૂર્યાસ્ત પછી ભીના કપડાં ઘરમાં રાખવા કે બહાર સૂકવવા એ દરિદ્રતાને આમંત્રણ આપવા સમાન છે. આર્થિક સમૃદ્ધિ જાળવી રાખવા માટે ઘરના વડીલો હંમેશા સવારના સમયે અથવા બપોર સુધીમાં કપડાં ધોવાનો આગ્રહ રાખતા હતા.

શાસ્ત્રોમાં સવારના સમયને સાત્વિક અને રાત્રિના સમયને તામસિક ગણવામાં આવ્યો છે. રાત્રે કપડાં ધોવા એ એક તામસિક પ્રવૃત્તિ ગણાય છે. કેટલાક જ્યોતિષીઓના મતે, રાત્રે ગંદકી અને પાણીનો સંપર્ક રાહુ અને કેતુ જેવા પાપી ગ્રહોના નકારાત્મક પ્રભાવને સક્રિય કરી શકે છે. આ પ્રકારના દોષને કારણે પરિવારના સભ્યોના સ્વાસ્થ્ય પર પણ વિપરીત અસર પડી શકે છે.

Continues below advertisement

આ પરંપરા પાછળ એક વ્યવહારિક કારણ પણ જવાબદાર છે. દિવસ દરમિયાન સૂર્યના તાપમાં કપડાં સુકવવાથી તેમાં રહેલા હાનિકારક બેક્ટેરિયા અને કીટાણુઓ નાશ પામે છે. રાત્રે સૂર્યપ્રકાશના અભાવે કપડાંમાં ભેજ રહી જાય છે, જે જીવાણુઓને પેદા કરી શકે છે અને ચામડીના રોગોનું કારણ બની શકે છે. ભલે સમય બદલાયો હોય, પરંતુ સ્વાસ્થ્ય અને સમૃદ્ધિ માટે આ પ્રાચીન નિયમોનું પાલન કરવું હિતાવહ છે.