કાવાસાકીએ ભારતમાં લોન્ચ કરી નવી નિન્જા ૬૫૦, શાનદાર લૂક સાથે કિંમતમાં થયો વધારો

kawasaki ninja 650 2025 - નવા લાઇમ ગ્રીન કલરમાં રજૂ કરાઈ, જૂના મોડેલ પર ₹૨૫ હજારનું ડિસ્કાઉન્ટ પણ ઉપલબ્ધ.

પ્રીમિયમ બાઇક નિર્માતા કંપની કાવાસાકીએ ભારતીય બજારમાં તેની લોકપ્રિય મિડ-સાઇઝ સ્પોર્ટ ટુરિંગ બાઇક, નિન્જા ૬૫૦નું નવું વર્ઝન લોન્ચ કર્યું છે.

કંપનીએ આ બાઇકને નવા અને આકર્ષક લાઇમ ગ્રીન કલરમાં રજૂ કરી છે. નવા મોડેલના લોન્ચિંગ સાથે કંપનીએ તેની કિંમતમાં પણ વધારો કર્યો છે. આ નવી નિન્જા ૬૫૦ હવે તેના પહેલા વર્ઝન કરતાં ₹૧૧ હજાર વધુ મોંઘી થઈ ગઈ છે.

નવી Kawasaki Ninja 650 બાઇકને તેના નવા વર્ઝનમાં ખૂબ જ આકર્ષક અને બોલ્ડ લૂક સાથે રજૂ કરવામાં આવી છે. જોકે, બાઇકના બોડીવર્કમાં મુખ્યત્વે કલરમાં બદલાવ જોવા મળ્યો છે.

બાઇકના બોડીવર્કમાં ગ્રીન કલરનો મુખ્ય ઉપયોગ કરવામાં આવ્યો છે, જેમાં લીલાની સાથે સફેદ, પીળો અને બ્લેક કલર સ્ટ્રીપ્સ આપવામાં આવી છે, જે તેને સ્પોર્ટી અને ફ્રેશ લૂક આપે છે.

જે ગ્રાહકો જૂનું મોડેલ ખરીદવા ઇચ્છે છે તેમના માટે સારા સમાચાર છે. કાવાસાકીના કેટલાક ડીલરો પાસે હજુ પણ જૂના મોડેલની બાઇક સ્ટોકમાં બાકી છે. આવા ગ્રાહકોને આકર્ષવા માટે કંપની બાઇકના જૂના વર્ઝનની ખરીદી પર ₹૨૫ હજારનું બમ્પર ડિસ્કાઉન્ટ આપી રહી છે. આ ડિસ્કાઉન્ટ બાદ હવે આ બાઇકના જૂના વર્ઝનની એક્સ-શોરૂમ કિંમત ₹૬.૯૧ લાખ નક્કી કરવામાં આવી છે.

નવા Kawasaki Ninja ૬૫૦ના સ્પેસિફિકેશન વિશે વાત કરીએ તો તેના ટેક્નિકલ ફીચર્સ અગાઉના મોડેલ જેવા જ રાખવામાં આવ્યા છે. તે ૬૪૯ સીસી સમાંતર-ટ્વીન, લિક્વિડ-કૂલ્ડ એન્જિનથી સજ્જ છે. આ એન્જિન ૮૦૦૦ rpm પર ૬૭ bhpનો પાવર અને ૬૭૦૦ rpm પર ૬૪ Nmનો પીક ટોર્ક જનરેટ કરે છે.

નવા વર્ઝનમાં પણ ૬-સ્પીડ ગિયરબોક્સ આપવામાં આવ્યું છે. નવી બાઇકનું વજન ૧૯૬ કિલો છે અને તે ૪૧ mm ટેલિસ્કોપિક ફોર્ક અને પ્રી-લોડ એડજસ્ટેબલ મોનોશોક સાથે ૧૭-ઇંચના એલોય વ્હીલ્સ પર ચાલે છે. આ ફિચર્સ તેને સ્પોર્ટ ટુરિંગ માટે યોગ્ય બનાવે છે.

આમ, નવા કલર અને થોડા ભાવ વધારા સાથે કાવાસાકી નિન્જા ૬૫૦ ભારતીય બજારમાં ઉપલબ્ધ છે, જ્યારે જૂના મોડેલ પર ડિસ્કાઉન્ટનો લાભ પણ ગ્રાહકો મેળવી શકે છે.