Health Tips: લગ્નમાં દાબીને ખાધું છે? એસિડિટીથી બચવું હોય તો આ 5 કામ કરી લેજો, પેટ રહેશે સાફ

હાર્ટબર્ન અને અપચાથી બચવા શું કરવું? ડોક્ટરોની સલાહ માનો, સોડા પીવાનું ટાળો અને ચાવીને ખાવાની આદત પાડો.

હાલમાં લગ્નસરા (Wedding Season) પૂરજોશમાં ચાલી રહી છે. લગ્નમાં જમણવારનો આનંદ માણવો દરેકને ગમે છે, પરંતુ ઘણીવાર વધુ પડતું ખાવું (Overeating) સ્વાસ્થ્ય માટે મુસીબત બની જાય છે. તીખું-તળેલું અને વિવિધ પ્રકારનું ભોજન લેવાથી હાર્ટબર્ન (Heartburn), અપચો (Indigestion) અને એસિડિટી (Acidity) જેવી સમસ્યાઓ સતાવે છે. જો તમે પણ લગ્નની મોજ માણવા માંગતા હો અને પેટની તકલીફોથી બચવા માંગતા હો, તો ડોક્ટરો દ્વારા સૂચવવામાં આવેલી આ સરળ ટિપ્સ ચોક્કસ અનુસરો.

લગ્નમાં જાતજાતની વાનગીઓ અને સ્વાદિષ્ટ પકવાનો જોઈને જીભ પર કાબૂ રાખવો મુશ્કેલ બની જાય છે. સ્વાદના ચક્કરમાં લોકો પોતાની પાચનશક્તિ કરતા વધારે જમી લેતા હોય છે. પરિણામે, છાતીમાં બળતરા થવી, પેટ ભારે લાગવું અને ગેસ જેવી ફરિયાદો સામાન્ય બની જાય છે. ડોક્ટરોનું માનવું છે કે થોડી સાવચેતી રાખવામાં આવે તો આ સમસ્યાઓથી સરળતાથી બચી શકાય છે.

1. ધીમે-ધીમે અને ચાવીને ખાવાની આદત પાડો ડોક્ટરોની સૌથી મહત્વની સલાહ એ છે કે લગ્ન કે પાર્ટીમાં ઉતાવળે જમવું નહીં. દરેક કોળિયો ધીમે ધીમે અને સારી રીતે ચાવીને (Chew Well) ખાવો જોઈએ. જ્યારે તમે ખોરાક ચાવો છો ત્યારે લાળ તેમાં ભળે છે, જે પાચન પ્રક્રિયાને સરળ બનાવે છે. આમ કરવાથી પેટ પર લોડ ઓછો આવે છે અને હાર્ટબર્નની શક્યતા ઘટી જાય છે.

2. પ્લેટમાં ડુંગર ન કરો (Portion Control) ઘણા લોકોને આદત હોય છે કે બફેટમાં દેખાતી દરેક વાનગી એકસાથે પ્લેટમાં ભરી લેતા હોય છે. ખાટું, મીઠું અને તીખું બધું એકસાથે મિક્સ થવાથી પેટમાં રાસાયણિક પ્રક્રિયા થાય છે જે અપચો નોંતરે છે. નિષ્ણાતો સલાહ આપે છે કે એકસાથે પ્લેટ ભરવાને બદલે થોડા-થોડા પ્રમાણમાં ખાઓ અને એક જ પ્લેટમાં વિરોધાભાસી ખોરાક ભેગો કરવાનું ટાળો.

3. જમ્યા પછી તરત આરામ ન કરો મોડી રાત સુધી ચાલતા લગ્ન પ્રસંગોમાં લોકો ભરપેટ જમીને તરત જ ખુરશીમાં બેસી જાય છે અથવા ઘરે જઈને સીધા સુઈ જાય છે. આ આદત ખૂબ જ નુકસાનકારક છે. જમ્યા પછી તરત સુઈ જવાથી પેટમાં રહેલો એસિડ અન્નનળી તરફ પાછો આવે છે, જેનાથી એસિડ રિફ્લક્સ (Acid Reflux) અને બળતરા થાય છે. જમ્યા પછી થોડું ચાલવું હિતાવહ છે.

4. સોડા અને કોલ્ડ ડ્રિંક્સથી દૂર રહો પાર્ટીઓમાં ઘણીવાર હેવી નાસ્તા સાથે સોડા કે કાર્બોરેટેડ ડ્રિંક્સ પીરસવામાં આવે છે. લોકોને લાગે છે કે સોડા પીવાથી પાચન થશે, પરંતુ હકીકતમાં તેનાથી પેટમાં ગેસ અને પ્રેશર વધે છે. સોડાને બદલે ગરમ પાણી (Warm Water) અથવા હર્બલ ટી પીવી એ પાચન માટે શ્રેષ્ઠ વિકલ્પ છે.

5. કપડાંની પસંદગી પર ધ્યાન આપો કદાચ તમને નવાઈ લાગશે, પરંતુ તમારા કપડાં પણ એસિડિટીનું કારણ બની શકે છે. લગ્નમાં ખૂબ જ ટાઈટ (Tight) ફીટિંગવાળા કપડાં પહેરવાથી પેટ પર દબાણ આવે છે, જેના કારણે હોજરીમાં રહેલો એસિડ ઉપરની તરફ ધકેલાય છે. તેથી, ફંક્શનમાં આરામદાયક કપડાં પહેરવાનો આગ્રહ રાખો જેથી પેટ પર બિનજરૂરી દબાણ ન આવે.