EPFO New Rules: વર્ષમાં અને મહિનામાં કેટલી વાર ઉપાડી શકાય PF ના પૈસા? જાણી લો નવો નિયમ

નિવૃત્તિ પહેલાં ફંડ ઉપાડવાની પ્રક્રિયામાં ફેરફાર જાણો દાવો કરતા પહેલા કઈ બાબતોનું ધ્યાન રાખવું જરૂરી છે અને 30 જૂન સુધી કેમ બંધ છે ઓનલાઈન પોર્ટલ.

નોકરીયાત વર્ગ માટે ભવિષ્ય નિધિ (PF) એ નિવૃત્તિ પછીનો મુખ્ય નાણાકીય આધાર છે, પરંતુ ઘણીવાર અણધારી કટોકટીના સમયે કર્મચારીઓને નિવૃત્તિ પહેલાં જ PF ના નાણાં ઉપાડવાની જરૂર પડે છે. કર્મચારી ભવિષ્ય નિધિ સંગઠન (EPFO) દ્વારા 2026 માં લોકોની સુવિધા અને ભવિષ્યની સુરક્ષાને ધ્યાનમાં રાખીને PF ઉપાડના નિયમોમાં મહત્વના ફેરફારો કરવામાં આવ્યા છે.

નવી માર્ગદર્શિકા મુજબ કર્મચારીઓ હવે અત્યંત કટોકટીના સંજોગોમાં જ PF ફંડ ઉપાડી શકશે. સાથે જ, 30 જૂન સુધી સિસ્ટમ અપગ્રેડેશનના કારણે ઓનલાઈન પોર્ટલ બંધ રાખવામાં આવ્યું હોવાથી હાલ દાવાઓ કરી શકાશે નહીં.

EPFO ના નવા નિયમો અનુસાર, સામાન્ય સંજોગોમાં અને ચોક્કસ શ્રેણીઓ હેઠળ સભ્યો વર્ષમાં માત્ર 1 વખત દાવો કરી શકે છે. જો કે, મેડિકલ ઈમરજન્સી (તબીબી કટોકટી) જેવી ગંભીર પરિસ્થિતિઓમાં સભ્યો મહિનામાં 2 થી 4 વખત દાવો કરી શકે છે. જોકે, દરેક દાવો અને તેની મંજૂરી તમારા PF ખાતામાં જમા રહેલા બેલેન્સ પર આધારિત હોય છે. આ ઉપરાંત, કર્મચારી પોતાના સમગ્ર સેવાકાળ દરમિયાન ઉચ્ચ શિક્ષણ હેતુ માટે મહત્તમ 10 વખત અને લગ્ન પ્રસંગ માટે 5 વખત PF ના નાણાં ઉપાડવા માટે દાવો કરી શકે છે.

જ્યારે કોઈ કર્મચારી નોકરી બદલે છે, ત્યારે PF ના પૈસા ઉપાડવાને બદલે તેને નવા ખાતામાં ટ્રાન્સફર કરવા એ વધુ સમજદારીભર્યો નિર્ણય માનવામાં આવે છે. પૈસા ઉપાડી લેવાથી તમારા સેવાકાળ (Service Tenure) નો સળંગ રેકોર્ડ તૂટી જાય છે, જેની સીધી અસર તમારા ભવિષ્યના પેન્શન અને કર મુક્તિ (Tax Exemption) પર પડે છે.

વધુમાં, જો કોઈ કર્મચારી 5 વર્ષની સેવા પૂર્ણ કર્યા પહેલા જ પોતાના PF ખાતામાંથી ₹50,000 થી વધુની રકમ ઉપાડે છે, તો તેને TDS કપાતનું જોખમ રહે છે. જેના પરિણામે મહેનતની કમાણીનો એક મોટો હિસ્સો ટેક્સ તરીકે કપાઈ શકે છે. નિષ્ણાતોના મતે વારંવાર PF ના નાણાં ઉપાડવા ભવિષ્ય માટે નુકસાનકારક સાબિત થઈ શકે છે.

હાલમાં જે કર્મચારીઓ PF નો દાવો કરવા ઈચ્છે છે, તેમના માટે વિભાગ દ્વારા એક અગત્યની સૂચના જારી કરવામાં આવી છે. EPFO વિભાગે મોટા સિસ્ટમ માઈગ્રેશન, ડેટાબેઝ એકત્રીકરણ અને સોફ્ટવેર અપગ્રેડેશનના કામને પગલે 30 જૂન સુધી પોતાનું ઓનલાઈન દાવા પ્રક્રિયા પોર્ટલ સંપૂર્ણપણે બંધ કરી દીધું છે.

Continues below advertisement

આ સમયગાળા દરમિયાન પોર્ટલ પર મળતી તમામ ઓનલાઈન સેવાઓ, જેવી કે PF ઉપાડની અરજી, દાવાની પ્રક્રિયા, PF ટ્રાન્સફર, ઈ-પાસબુક ઍક્સેસ અને UAN લિંકિંગ જેવી કામગીરી સંપૂર્ણપણે ખોરવાયેલી રહેશે. આ કામગીરી પૂર્ણ થયા બાદ જ ગ્રાહકો ફરીથી ઓનલાઈન સુવિધાઓનો લાભ લઈ શકશે.