શું સોનાની તેજી પૂરી થઈ ગઈ? DSP ના CEO એ કરી મોટી આગાહી, રોકાણકારો ચિંતામાં

Gold Investment: સોના અને ચાંદીનું વેલ્યુએશન નક્કી કરવું કેમ મુશ્કેલ? હવે મોટા રોકાણ માટે સમય અનુકૂળ નથી. પોર્ટફોલિયોમાં સંતુલન અને જોખમ ઘટાડવા સોનું જરૂરી.

gold investment opportunity: છેલ્લા કેટલાક સમયથી સોનું સતત નવા રેકોર્ડ બનાવી રહ્યું છે અને અન્ય એસેટ ક્લાસ કરતા સારું વળતર આપી રહ્યું છે. પરંતુ હવે ડીએસપી મ્યુચ્યુઅલ ફંડના એમડી અને સીઈઓ કલ્પેશ પારેખે રોકાણકારોને ચેતવ્યા છે. તેમના મતે, સોનામાં હવે 'મોટા રોકાણ' કરવાનો સુવર્ણ સમય પૂરો થઈ ગયો છે. સોનું અને ચાંદી હાલમાં તેમના વાજબી મૂલ્ય (Fair Value) ની નજીક છે, તેથી હવે તેમાં સુરક્ષાનો માર્જિન ઓછો છે. જોકે, પોર્ટફોલિયોના વૈવિધ્યકરણ માટે સોનું હજુ પણ જરૂરી છે.

વર્તમાન સમયમાં સોનું એક અગ્રણી સંપત્તિ વર્ગ (Asset Class) બની ગયું છે. લગભગ તમામ ઉભરતા બજારોમાં સોનાએ શેરબજાર કરતા પણ વધારે વળતર આપ્યું છે અને તે નવી ઊંચાઈઓ સર કરી રહ્યું છે. જોકે, આ તેજી વચ્ચે ડીએસપી મ્યુચ્યુઅલ ફંડના એમડી અને સીઈઓ કલ્પેશ પારેખે એક પોડકાસ્ટમાં સોનાના ભવિષ્ય અંગે તટસ્થ વલણ અપનાવ્યું છે અને રોકાણકારોને મહત્વની સલાહ આપી છે.

કલ્પેશ પારેખના મતે, સોના અને ચાંદીનું ચોક્કસ મૂલ્ય નક્કી કરવું કોઈ સરળ કામ નથી. તેનું મુખ્ય કારણ એ છે કે આ બંને ધાતુઓ કોઈ 'રોકડ પ્રવાહ' (Cash Flow) ઉત્પન્ન કરતી નથી, જેમ કે કોઈ કંપની ડિવિડન્ડ આપે છે. આથી, તેમણે મૂલ્યાંકન માટે એક ખાસ સંદર્ભ માળખું તૈયાર કર્યું છે.

આ ગણતરી માટે તેઓ મની સપ્લાય (નાણાં પુરવઠા) નો ઉપયોગ કરે છે, ખાસ કરીને અમેરિકા અને યુરોઝોનના M2 મની સપ્લાયને ધ્યાનમાં લેવામાં આવે છે. લાંબા ગાળાના ટ્રેક રેકોર્ડ મુજબ, જ્યારે નાણાં પુરવઠો વધે છે ત્યારે સોનાના ભાવ વધે છે.

તેમણે વધુમાં સમજાવ્યું કે તેમના ફ્રેમવર્ક મુજબ, હાલમાં સોનાનો ભાવ તેના 'વાજબી મૂલ્ય' ની એકદમ નજીક પહોંચી ગયો છે. મોડેલ મુજબ સોનાનું વાજબી મૂલ્ય પ્રતિ ઔંસ આશરે $3,300 અને ચાંદીનું $63 ની આસપાસ છે (જ્યારે ચાંદીનો વર્તમાન ભાવ $55 ની આસપાસ છે). આનો અર્થ એ છે કે હવે ભાવમાં વધારા માટે બહુ મોટો અવકાશ કે 'સેફ્ટી માર્જિન' બચ્યો નથી. આથી જ તેમણે કહ્યું છે કે, "સોનામાં જંગી રોકાણ કરવાનો સમય હવે પૂરો થઈ ગયો છે." તેમણે તેમના મલ્ટી-એસેટ ફંડમાં સોના-ચાંદીનો હિસ્સો 22% થી ઘટાડીને 13-14% કરી દીધો છે.

ભલે મોટા વળતરની અપેક્ષા ઓછી હોય, પરંતુ પોર્ટફોલિયોને સુરક્ષિત રાખવા માટે સોનું અનિવાર્ય છે. ભારતીય શેરબજારોએ લાંબા ગાળે આશરે 12% વળતર આપ્યું છે, જ્યારે સોનાએ 11% વળતર આપ્યું છે. પારેખની સલાહ મુજબ, જો તમે ઈક્વિટી અને ગોલ્ડનું 50-50 સંતુલન રાખો તો પોર્ટફોલિયોનું જોખમ (Volatility) 35-40% સુધી ઘટી જાય છે. શેરબજારનું જોખમ 16% અને સોનાનું 18-22% હોય છે, પણ બંને સાથે હોય તો તે ઘટીને 12% થઈ જાય છે.

Continues below advertisement