લોકોને પોતાનું ઈન્કમ ટેક્સ રિફંડ ક્યાં સુધી મળશે? આવકવેરા વિભાગે આપી જાણકારી

ITR Filing: જો તમે સમયસર તમારું આવકવેરા રિટર્ન ફાઇલ કર્યું છે અને હવે તમારા રિફંડની રાહ જોઈ રહ્યા છો તો તમારા માટે સારા સમાચાર છે.

ITR Filing: જો તમે સમયસર તમારું આવકવેરા રિટર્ન ફાઇલ કર્યું છે અને હવે તમારા રિફંડની રાહ જોઈ રહ્યા છો તો તમારા માટે સારા સમાચાર છે. આવકવેરા વિભાગે જણાવ્યું છે કે ITR પ્રક્રિયા કર્યા પછી ટેક્સ રિફંડ 4 થી 5 અઠવાડિયામાં તમારા બેન્ક ખાતામાં જમા થઈ જાય છે. જોકે, આ સમય તમામ કરદાતાના મામલામાં બદલાઈ શકે છે.

આવકવેરા વિભાગ અનુસાર, રિટર્ન પ્રક્રિયા કર્યા પછી જો કરદાતાનું રિફંડ બાકી હોય તો તે સીધું તેમના પ્રી-વેલિ઼ડેટેડ બેન્ક એકાઉન્ટ્સમાં મોકલવામાં આવે છે. આમાં સામાન્ય રીતે 4 થી 5 અઠવાડિયા લાગે છે. જો તમારા દસ્તાવેજો સાચા હોય અને કોઈ ચકાસણીની જરૂર ન હોય તો રિફંડ વહેલા આવી શકે છે.

જો ITR અને AIS, ફોર્મ 26AS, અથવા TDS માં આપવામાં આવેલી માહિતી વચ્ચે વિસંગતતા હોય અથવા જો બેન્ક એકાઉન્ટ પ્રી-વેલિ઼ડેટેડ ન હોય અથવા તમે તમારા રિટર્નનું ઈ-વેરિફાઈડ ન કર્યું હોય તો રિફંડમાં વિલંબ થઈ શકે છે. વધુમાં કેટલાક કિસ્સાઓમાં વધારાની ચકાસણી પ્રક્રિયા સમય વધારી શકે છે.

કરદાતાઓ આવકવેરા ઈ-ફાઇલિંગ પોર્ટલમાં લોગ ઇન કરીને અને "ફાઇલ્ડ રિટર્ન" અથવા "રિફંડ સ્ટેટ્સ" વિભાગમાં જઈને તેમના રિફંડની સ્થિતિ ચકાસી શકે છે. વધુમાં, તમારા PAN અને આકારણી વર્ષનો ઉપયોગ કરીને રિફંડની સ્થિતિ ઓનલાઈન પણ ચકાસી શકાય છે.

જો 4-5 અઠવાડિયા પછી રિફંડ ન આવે તો પહેલા ઈ-ફાઇલિંગ પોર્ટલ પર તેનું સ્ટેટ્સ તપાસો. જો સ્થિતિ ભૂલ સૂચવે છે અથવા રિફંડમાં વિલંબ થયો છે તો તમારી બેન્ક વિગતો અપડેટ કરો. વૈકલ્પિક રીતે આવકવેરા વિભાગના હેલ્પ ડેસ્કનો સંપર્ક કરો.