ઘરની છત પર સોલાર લગાવતા પહેલાં આ સમાચાર વાંચો, 1 જૂનથી બદલાઈ ગયા છે નિયમો

સરકારે સોલાર ઇન્સ્ટોલેશનના નિયમો કર્યા કડક, હવે 1 કિલોવોટની સિસ્ટમ લગાવવાનો ખર્ચ અંદાજે 3000 રૂપિયા સુધી વધી શકે છે.

ઉનાળાની આકરી ગરમીમાં એસી અને કૂલરના સતત વપરાશને કારણે લોકોના વીજળીના બિલમાં તોતિંગ વધારો થયો છે. આ મોંઘા ખર્ચમાંથી કાયમી છુટકારો મેળવવા માટે મોટાભાગના લોકો હવે પોતાના ઘરની છત પર સોલાર પેનલ લગાવવાનું વધુ પસંદ કરી રહ્યા છે. પરંતુ, જો તમે પણ નજીકના સમયમાં સોલાર પેનલ લગાવવાનું વિચારી રહ્યા છો, તો તમારા માટે એક મહત્વના સમાચાર છે. 1 જૂન 2026 થી સોલાર સિસ્ટમ લગાવવાના સરકારી નિયમોમાં મોટો ફેરફાર થયો છે, જેના કારણે સોલાર પેનલ લગાવવાનો ખર્ચ થોડો વધી શકે છે.

કેન્દ્ર સરકારે સોલાર સેક્ટરને લગતા નિયમોને વધુ કડક બનાવ્યા છે. અત્યાર સુધીના નિયમ મુજબ, માત્ર સોલાર પેનલ જ સરકાર માન્ય ALMM (એપ્રુવ્ડ લિસ્ટ ઓફ મોડેલ્સ એન્ડ મેન્યુફેક્ચરર્સ) યાદીમાં સામેલ હોય તે પૂરતું હતું. પરંતુ 1 જૂનથી અમલમાં આવેલા નવા નિયમ પ્રમાણે, સોલાર પેનલની અંદર વપરાતા 'સોલાર સેલ' (Solar Cells) પણ સરકાર દ્વારા માન્ય કંપનીઓના જ હોવા ફરજિયાત કરવામાં આવ્યા છે. સરકારી સબસિડીવાળી યોજનાઓ હેઠળ હવે માત્ર ALMM લિસ્ટમાં સામેલ કંપનીઓના જ પેનલ અને સેલનો ઉપયોગ કરી શકાશે.

આ નવા નિયમની સીધી અસર ગ્રાહકોના ખિસ્સા પર જોવા મળશે અને સોલાર સિસ્ટમ લગાવવાના પ્રાથમિક ખર્ચમાં થોડો વધારો થશે. એક અંદાજ મુજબ, હવે 1 કિલોવોટની સિસ્ટમ લગાવવાનો ખર્ચ આશરે 3,000 રૂપિયા સુધી વધી શકે છે. તે જ પ્રમાણે, જો તમે 2 કિલોવોટની સિસ્ટમ લગાવશો તો અંદાજે 6,000 રૂપિયા અને 3 કિલોવોટની સિસ્ટમ માટે આશરે 9,000 રૂપિયા જેટલો વધારે ખર્ચ ચૂકવવો પડી શકે છે.

જોકે, આ બધા વચ્ચે સામાન્ય જનતા માટે રાહતની વાત એ છે કે, સરકારની લોકપ્રિય 'પીએમ સૂર્ય ઘર યોજના' હેઠળ મળતી સરકારી સબસિડીમાં કોઈ ઘટાડો કરવામાં આવ્યો નથી. ગ્રાહકોને જે સબસિડી પહેલા મળતી હતી, તે આ નવા નિયમ બાદ પણ પહેલાની જેમ જ મળતી રહેશે. એટલે કે, શરૂઆતનો ઇન્સ્ટોલેશન ખર્ચ થોડો વધવા છતાં સબસિડીનો લાભ યથાવત રહેશે.

સરકાર દ્વારા આ કડક નિયમ લાવવા પાછળનું મુખ્ય લક્ષ્ય દેશમાં 'મેક ઇન ઇન્ડિયા' (Make in India) અભિયાનને મોટું પ્રોત્સાહન આપવાનું છે. અત્યાર સુધી સોલાર સેલ માટે વિદેશી આયાત પર મોટી નિર્ભરતા રાખવી પડતી હતી, જે હવે આ નિયમ આવવાથી ઘટશે. દેશમાં જ બનેલા સોલાર સેલનો ઉપયોગ વધવાથી ભારતીય મેન્યુફેક્ચરિંગ ઉદ્યોગ મજબૂત બનશે.

શરૂઆતમાં ગ્રાહકોને ભલે આ ખર્ચ થોડો વધારે લાગે, પરંતુ તેનાથી લાંબા ગાળે મોટો ફાયદો થશે. સરકાર માન્ય લિસ્ટના સોલાર સેલનો ઉપયોગ થવાથી ગ્રાહકોને ખૂબ જ સારી ગુણવત્તાવાળા અને લાંબો સમય ટકનારા દેશી ઉપકરણો મળશે. આ ગુણવત્તાયુક્ત પેનલ્સ લાંબા સમયે વધુ વીજળી ઉત્પન્ન કરશે, જે ગ્રાહકો અને દેશ બંનેના હિતમાં સાબિત થશે.

Continues below advertisement

છેલ્લે, જો તમે પણ ઘરમાં સોલાર પેનલ લગાવવાનું આયોજન કરી રહ્યા હોવ, તો કેટલીક બાબતો ખાસ ધ્યાનમાં રાખવી જરૂરી છે. ફક્ત સસ્તી કિંમતની લાલચમાં આવીને ક્યારેય હલકી ગુણવત્તાની સોલાર પેનલ ન ખરીદો. સૌથી પહેલા તમારા ઘરનો માસિક વીજળી વપરાશ અને બજેટ નક્કી કરો. તમારી ભવિષ્યની જરૂરિયાતોને ધ્યાનમાં રાખીને હંમેશા લાંબી વોરંટી આપતી ભરોસાપાત્ર કંપનીની જ પેનલ પસંદ કરવી હિતાવહ છે.