Gujarat cold: કડકડતી ઠંડીમાં ઠૂંઠવાયું ગુજરાત, સિઝનમાં પ્રથમ વાર નલિયામાં 4.8 ડિગ્રી

Gujarat cold: કડકડતી ઠંડીમાં ઠૂંઠવાયું ગુજરાત, સિઝનમાં પ્રથમ વાર નલિયામાં 4.8 ડિગ્રી

પ્રતિકાત્મક તસવીર

ગાંધીનગર: રાજ્યમાં છેલ્લા એક સપ્તાહથી કાતિલ ઠંડી પડી રહી છે. તાપમાનનો પારો સતત નીચે જઈ રહ્યો છે. છેલ્લા 24 કલાકમાં લઘુતમ તાપમાનમાં ત્રણથી ચાર ડિગ્રીનો ઘટાડો થયો છે. ઉત્તર-પૂર્વના પવન ફુંકાતા હાલ રાજ્યમાં કડકડતી ઠંડીનો અનુભવ થઈ રહ્યો છે.

હવામાન વિભાગે આગામી 48 કલાક સુધી તાપમાનમાં કોઈ ફેરફાર ન થવાની આગાહી કરી છે. સિઝનમાં પ્રથમ વાર નલિયામાં તાપમાનનો પારો 4.8 ડિગ્રી પર પહોંચી ગયો છે.

જ્યારે અમરેલીમાં 8.6 ડિગ્રી, રાજકોટમાં 9.4 ડિગ્રી તાપમાન નોંધાયું છે. ગાંધીનગરમાં 10.8 ડિગ્રી, ભુજમાં 11.2 ડિગ્રી અને અમદાવાદમાં તાપમાનનો પારો 11.7 ડિગ્રી પર પહોંચ્યો છે.

પોરબંદરમાં 12.8 ડિગ્રી, ભાવનગરમાં 13.8 ડિગ્રી, વડોદરામાં 14 અને સુરતમાં 15 ડિગ્રી તાપમાન નોંધાયું છે. કડકડતી ઠંડીની વચ્ચે રાજ્યના અલગ અલગ જિલ્લામાં વહેલી સવારે ધુમ્મસની ચાદરમાં લપેટાયેલા જોવા મળ્યા.

મહીસાગર, દાહોદમાં વહેલી સવારે ધુમ્મસ ભર્યુ વાતાવરણ રહેતા વિઝિબિલિટી ઘટી હતી. વલસાડના ઉમરગામ તાલુકામાં પણ ગાઢ ધુમ્મસથી હાઈવે પર વાહન ચાલકો હેડ લાઈટ ચાલુ રાખવા મજબુર બન્યા હતા.

Continues below advertisement

હવામાન વિભાગની આગાહી મુજબ, રાજ્યમાં હજુ આગામી 48 કલાક સુધી કાતિલ ઠંડીનો ચમકારો યથાવત રહેશે. જોકે, આ સમયગાળા બાદ લઘુતમ તાપમાનમાં 2 થી 3 ડિગ્રીનો વધારો થવાની શક્યતા છે.