ગુજરાતમાં આગામી પાંચ દિવસ ગરમીનો પ્રકોપ: સૌરાષ્ટ્ર-કચ્છમાં યલો એલર્ટ જાહેર!

Gujarat weather: હવામાન વિભાગે સૌરાષ્ટ્ર અને કચ્છ માટે આગામી પાંચ દિવસ માટે ગરમીનું યલો એલર્ટ જાહેર કર્યું છે.

વિભાગ દ્વારા આગાહી કરવામાં આવી છે કે આગામી દિવસોમાં આ વિસ્તારોમાં રહેતા લોકોને ભારે ગરમીનો સામનો કરવો પડશે. એટલું જ નહીં, પરંતુ હવામાન વિભાગે માર્ચ મહિનાની શરૂઆતમાં જ આગાહી કરી હતી કે માર્ચ 2025માં રાજ્યમાં ગરમી સામાન્ય કરતાં વધુ રહેશે અને હીટવેવના દિવસો પણ વધી શકે છે.

હવામાન વિભાગ અનુસાર આગામી સાત દિવસ સુધી ગુજરાતનું વાતાવરણ સૂકું રહેશે. ખાસ કરીને, આગામી પાંચ દિવસ કચ્છ અને સૌરાષ્ટ્રના કેટલાક વિસ્તારોમાં અતિશય ગરમી પડવાની સંભાવના છે, જેના કારણે યલો એલર્ટ જાહેર કરવામાં આવ્યું છે. બનાસકાંઠા જિલ્લામાં પણ 10 થી 12 માર્ચ દરમિયાન હીટવેવની શક્યતાને ધ્યાનમાં રાખીને યલો એલર્ટ આપવામાં આવ્યું છે.

ગરમી વધવાનું કારણ જણાવતા હવામાન વિભાગે કહ્યું છે કે ગુજરાતમાં હાલમાં ઉત્તર-પશ્ચિમ અને ઉત્તર દિશા તરફથી ગરમ પવનો આવી રહ્યા છે. આ ગરમ પવનોના કારણે તાપમાનમાં વધારો થયો છે અને હીટવેવની શક્યતાઓ વધી ગઈ છે.

માત્ર સૌરાષ્ટ્ર-કચ્છ જ નહીં, પરંતુ ગુજરાતના દરિયાકાંઠા વિસ્તારોમાં પણ ગરમ અને ભેજવાળા પવનો ફૂંકાશે, જેના કારણે લોકોને બફારો અનુભવાશે. આ દરિયાકાંઠા વિસ્તારો માટે પણ યલો વોર્નિંગ જાહેર કરવામાં આવી છે. આગામી પાંચ દિવસ રાજ્યના મોટાભાગના જિલ્લાઓમાં ગરમીનું પ્રમાણ ખૂબ જ વધી જશે.

છેલ્લા 24 કલાકની વાત કરીએ તો, ગુજરાતમાં સૌથી વધુ તાપમાન કચ્છના ભુજ શહેરમાં 39.5 ડિગ્રી નોંધાયું હતું. રાજ્યના મુખ્ય શહેરોમાં પણ ગરમી વધી છે. અમદાવાદમાં મહત્તમ તાપમાન 37.6 ડિગ્રી, વડોદરામાં 37 ડિગ્રી, સુરતમાં 36.1 ડિગ્રી અને રાજકોટમાં 38.8 ડિગ્રી નોંધાયું હતું.

હવામાન વિભાગે વધુમાં જણાવ્યું છે કે આગામી પાંચ દિવસ દરમિયાન રાજ્યના તમામ જિલ્લાઓમાં મહત્તમ અને લઘુત્તમ તાપમાનમાં 3 થી 5 ડિગ્રીનો વધારો થઈ શકે છે. જેના કારણે રાજ્યના કેટલાક વિસ્તારોમાં તાપમાન 40 ડિગ્રીને પણ વટાવી શકે છે.