Amreli Rain: સાવરકુંડલામાં ધોધમાર વરસાદ, રસ્તાઓ પર નદી વહેતી હોય તેવા દ્રશ્યો

હવામાન વિભાગની વરસાદની આગાહી વચ્ચે આજે વહેલી સવારથી જ અમરેલી જિલ્લામાં ભારે વરસાદ વરસી રહ્યો છે.

સાવરકુંડલામાં ધોધમાર વરસાદ

અમરેલી: હવામાન વિભાગની વરસાદની આગાહી વચ્ચે આજે અમરેલી જિલ્લામાં ધોધમાર વરસાદ વરસ્યો છે. અમરેલી જિલ્લાના સાવરકુંડલા, રાજુલા, જાફરાબાદ, ધારીમાં ધોધમાર વરસાદ વરસી રહ્યો છે. સાવરકુંડલા પંથકમાં ધોધમાર વરસાદ પડી રહ્યો છે.

શહેરમાં અનેક વિસ્તારોમાં નદી માફક વરસાદી પાણી વહેતા થયાં છે. ભારે વરસાદને પગલે રસ્તાઓ પર નદી વહેતી હોય તેવા દ્રશ્યો જોવા મળી રહ્યા છે.

સાવરકુંડલા શહેરના પટેલ સોસાયટી, મંગલમ સોસાયટી, જેસર રોડ સહિતના વિસ્તારોમાં ગોઠણ સમા પાણી ભરાઈ ગયા છે. પાણી ભરાઈ જતા લોકો મુશ્કેલીમાં મૂકાયા છે.

ગ્રામ્યના મોટા જિંજુડા, પીઠવડી, સેંજળ મેવાસા નાળ પિયાવા, વંડા સહિતના વિસ્તારો પણ ભારે વરસાદ વરસી રહ્યો છે. સાવરકુંડલા પંથકમાં સાર્વત્રિક વરસાદ પડતા ખેડૂતોમાં ખુશીનો માહોલ છે.

અમરેલી જિલ્લામાં ધોધમાર વરસાદથી જળબંબાકાર જેવી સ્થિતિ છે. સાવરકુંડલા-મહુવા નેશનલ હાઈવે બંધ થયો છે. ડાયવર્ઝનની કામગીરીને પગલે પાણી ફરી વળ્યા છે. સાવરકુંડલા-મહુવા હાઈવે બંધ થતા વાહન ચાલકો અટવાયા હતા.

રાજ્યના હવામાન વિભાગ દ્વારા આજે ભારે વરસાદની આગાહીને પગલે અમરેલી જિલ્લામાં રેડ એલર્ટ આપવામાં આવ્યું છે. અમેરલી જિલ્લામાં આજે ભારેથી અતિભારે વરસાદની આગાહી છે.