ગુજરાતમાં આગામી 3 કલાકમાં ગાજવીજ સાથે વરસાદ ભુક્કા બોલાવશે, આ જિલ્લાઓ થશે પાણી પાણી

Gujarat Rain: રાજ્યના મોટાભાગના વિસ્તારોમાં વરસાદની શક્યતા સૌરાષ્ટ્રના દરિયાકાંઠાના વિસ્તારોમાં પણ હળવા ઝાપટાંની આગાહી.

ગુજરાતમાં ચોમાસું બરાબર જામી રહ્યું છે. હવામાન વિભાગ દ્વારા આગામી ત્રણ કલાક માટે જારી કરાયેલા નાઉકાસ્ટ (તાત્કાલિક આગાહી) અનુસાર, રાજ્યના મોટાભાગના વિસ્તારોમાં ગાજવીજ સાથે હળવોથી મધ્યમ વરસાદ પડવાની સંભાવના છે. આ સાથે 41 થી 61 કિલોમીટર પ્રતિ કલાકની ઝડપે પવન ફૂંકાવાની પણ આગાહી કરવામાં આવી છે.

હવામાન વિભાગે જણાવ્યું છે કે, આગામી ત્રણ કલાક દરમિયાન કચ્છ, બનાસકાંઠા, સાબરકાંઠા, મહેસાણા, પાટણ, અરવલ્લી, મહીસાગર, દાહોદ, ગાંધીનગર, છોટાઉદેપુર, અમદાવાદ, ખેડા, આણંદ, પંચમહાલ, વડોદરા, નર્મદા, ભરૂચ, સુરત, તાપી, ડાંગ, વલસાડ, નવસારી, દમણ, દાદરા નગર હવેલી, સુરેન્દ્રનગર, બોટાદ, ભાવનગર, મોરબી, રાજકોટ અને અમરેલી જિલ્લાઓમાં ગાજવીજ સાથે હળવો વરસાદ પડી શકે છે.

આ વિસ્તારોમાં વાતાવરણમાં અચાનક પલટો આવી શકે છે અને વીજળીના કડાકા-ભડાકા સાથે વરસાદી ઝાપટાં પડી શકે છે.

ઉપરાંત, સૌરાષ્ટ્રના દરિયાકાંઠાના કેટલાક વિસ્તારોમાં પણ હળવા વરસાદની શક્યતા વ્યક્ત કરવામાં આવી છે. જેમાં દેવભૂમિ દ્વારકા, જામનગર, પોરબંદર, જૂનાગઢ, ગીર સોમનાથ અને દીવ નો સમાવેશ થાય છે. આ વિસ્તારોમાં પણ છૂટાછવાયા હળવા ઝાપટાં પડી શકે છે.

ચોમાસાની આ ગતિવિધિ રાજ્યના ખેડૂતો અને નાગરિકો માટે રાહતરૂપ છે, પરંતુ પવનની તીવ્ર ગતિ અને ગાજવીજ સાથેના વરસાદને કારણે જરૂરી સાવચેતી રાખવા પણ હવામાન વિભાગ દ્વારા અપીલ કરવામાં આવી છે.

નાગરિકોને સુરક્ષિત સ્થળોએ રહેવા અને હવામાનની પળેપળની માહિતી માટે સ્થાનિક તંત્રનો સંપર્ક કરવા સૂચના અપાઈ છે.