Gujarat Rain: આગામી સાત દિવસ સુધી રાજ્યમાં રહેશે વરસાદી માહોલ, જાણો લેટેસ્ટ અપડેટ

Gujarat Rain: આગામી સાત દિવસ સુધી રાજ્યમાં રહેશે વરસાદી માહોલ, જાણો લેટેસ્ટ અપડેટ

પ્રતિકાત્મક તસવીર

અમદાવાદ: રાજ્યમાં વરસાદને લઈ ફરી એક વખત હવામાન વિભાગ દ્વારા આગાહી કરવામાં આવી છે. હવામાન વિભાગ મજુબ આગામી સાત દિવસ રાજ્યમાં હળવાથી મધ્યમ વરસાદની શક્યતા છે. હવામાન વિભાગ મુજબ ગુજરાત પર હાલ કોઈ સિસ્ટમ સક્રિય નથી. ઉત્તર દિશા તરફથી ફુંકાતા પવનને લીધે રાજ્યમાં લઘુતમ તાપમાન વધ્યુ છે.

જો કે આજથી 12 જુન સુધી દરિયાકાંઠાના વિસ્તારોમાં વરસાદી માહોલ રહેશે. જ્યારે 12થી 18 જુન વચ્ચે રાજ્યના કેટલાક જિલ્લામાં હળવાથી મધ્યમ વરસાદ વરસી શકે છે.

18 જુન બાદ કેટલાક જિલ્લામાં અતિભારે વરસાદની હવામાન વિભાગે શક્યતા વ્યક્ત કરી છે. હવામાન વિભાગ મુજબ આજે 12 જિલ્લા અને ત્રણેય સંઘ પ્રદેશમાં હળવાથી મધ્યમ વરસાદની આગાહી કરવામાં આવી છે.

જ્યારે આવતીકાલે સૌરાષ્ટ્રના ગીર સોમનાથ, અમરેલી, ભાવનગર, તો દક્ષિણ ગુજરાતના તાપી, નવસારી, ડાંગ અને વલસાડમાં હળવાથી મધ્યમ વરસાદ વરસી શકે છે. સંઘ પ્રદેશ દીવ, દમણ અને દાદરાનગર હવેલીમાં પણ હળવાથી મધ્યમ વરસાદની હવામાન વિભાગે આગાહી વ્યક્ત કરી છે.

ચાલુ માસમાં દેશના કેટલાક ભાગોમાં મુશળધાર વરસાદનું અનુમાન હવામાન નિષ્ણાંત અંબાલાલ પટેલે વ્યક્ત કર્યુ છે. 12 જુન સુધી મુંબઈ સહિત મહારાષ્ટ્ર અને 12 જુન બાદ દેશના અન્ય ભાગોમાં ભારેથી અતિભારે વરસાદનું અંબાલાલ પટેલે અનુમાન વ્યક્ત કર્યુ છે.

રાજ્યમાં 12થી 15 જુન વચ્ચે દક્ષિણ ગુજરાત,દક્ષિણ સૌરાષ્ટ્ર અને મધ્ય ગુજરાતમાં વરસાદ વરસી શકે છે. 15 જુનથી 22 જુન વચ્ચે સુરત, નવસારી, ભરૂચ,જંબુસર અને વડોદરામાં ભારેથી અતિભારે વરસાદ વરસી શકે છે. જ્યારે પંચમહાલ, દાહોદ, લીમખેડા, અમદાવાદ, ગાંધીનગર, કચ્છમાં પણ વરસાદનું અંબાલાલ પટેલે અનુમાન વ્યક્ત કર્યુ. અંબાલાલ પટેલના અનુમાન મુજબ 11 જુલાઈએ બંગાળના ઉપસાગરમાં બનનાર સિસ્ટમથી જુલાઈમાં પણ સારો વરસાદ વરસી શકે છે.