Gujarat Rain: ચોમાસાની વિદાય વચ્ચે સાત દિવસ આ જિલ્લાઓમાં તૂટી પડશે વરસાદ, જાણો શું છે આગાહી

Gujarat Rain: ચોમાસાની વિદાય વચ્ચે સાત દિવસ આ જિલ્લાઓમાં તૂટી પડશે વરસાદ, જાણો શું છે આગાહી

પ્રતિકાત્મક તસવીર

અમદાવાદ: રાજ્યમાંથી ધીમે ધીમે ચોમાસાની વિદાય થઈ રહી છે.ત્યારે ચોમાસાની વિદાય વચ્ચે આગામી સાત દિવસ રાજ્યમાં હળવાથી મધ્યમ વરસાદની હવામાન વિભાગે આગાહી વ્યક્ત કરી છે. સાત પૈકી પાંચ દિવસ 30થી 40 કિલોમીટર પ્રતિ કલાકની ઝડપે પવન ફુંકાઈ શકે છે.

આજે સૌરાષ્ટ્ર, મધ્ય ગુજરાત અને દક્ષિણ ગુજરાતના તમામ જિલ્લામાં હળવોથી મધ્યમ વરસાદ વરસી શકે છે. અમદાવાદમાં પણ આજે ગાજવીજ સાથે હળવા વરસાદની હવામાન વિભાગે આગાહી કરી છે.

આવતીકાલે સૌરાષ્ટ્રના દેવભૂમિ દ્વારકા, પોરબંદર, જૂનાગઢ, ગીર સોમનાથની સાથે જામનગર, રાજકોટ, મોરબી, બોટાદ, અમરેલી, ભાવનગર, મોરબી અને સુરેન્દ્રનગર જિલ્લામાં યલો એલર્ટ આપવામાં આવ્યું છે.

જ્યારે અમદાવાદ, ગાંધીનગર, સાબરકાંઠા, અરવલ્લીમાં પણ વરસાદનું યલો એલર્ટ જાહેર કરાયું છે. મધ્ય ગુજરાતના મહીસાગર, આણંદ, ખેડા, વડોદરા, પંચમહાલ, દાહોદ અને છોટા ઉદેપુર જિલ્લામાં પણ હળવોથી મધ્યમ વરસાદ વરસી શકે છે.

દક્ષિણ ગુજરાતના ભરૂચ, નર્મદા, સુરત, તાપી, નવસારી, ડાંગ અને વલસાડમાં પણ વરસાદનું યલો એલર્ટ જાહેર કરાયું છે. સંઘ પ્રદેશ દીવ, દમણ અને દાદરાનગર હવેલીમાં પણ વરસાદનું યલો એલર્ટ આપવામાં આવ્યું છે.

ચાલુ વર્ષમાં અત્યાર સુધીમાં સારો વરસાદ વરસ્યો છે. સરેરાશની સામે 108 ટકા વરસાદ પડી ગયો છે. સૌરાષ્ટ્રમાં વરસાદની થોડી ઘટ છે બાકીના તમામ ભાગોમાં સામાન્ય કરતા વધુ વરસાદ પડ્યો છે.