Gujarat Rain: દેવભૂમિ દ્વારકા, ભાવનગર અને સુરતમાં ભારે વરસાદને લઈ રેડ એલર્ટ જાહેર

Gujarat Rain: દેવભૂમિ દ્વારકા, ભાવનગર અને સુરતમાં ભારે વરસાદને લઈ રેડ એલર્ટ જાહેર

પ્રતિકાત્મક તસવીર

અમદાવાદ: આ વર્ષે રાજ્યમાં ચોમાસું ખૂબ જ વહેલું સક્રિય થયું છે. ઘણા દિવસોથી રાજ્યના તમામ જિલ્લાઓમાં ધોધમાર વરસાદ વરસી રહ્યો છે. રાજ્યના હવામાન વિભાગ દ્વારા આજે પણ વરસાદને લઈ આગાહી કરવામાં આવી છે. હવામાન વિભાગની આગાહી મુજબ દેવભૂમિ દ્વારાક, ભાવનગર અને સુરતમાં ભારે વરસાદની આગાહી છે.

દેવભૂમિ દ્વારકા, ભાવનગર અને સુરતમાં ભારે વરસાદને લઈ હવામાન વિભાગ દ્વારા રેડ એલર્ટ જાહેર કરવામાં આવ્યું છે. આ સિવાયના જિલ્લાઓમાં પણ આજે ધોધમાર વરસાદનું અનુમાન હવામાન વિભાગે વ્યક્ત કર્યું છે.

હવામાન વિભાગે આજે કચ્છ, સાબરકાંઠા, અરવલ્લી, પંચમાહાલ, દાહોદ, છોટા ઉદેપુર, વડોદરા, નર્મદા, ભરુચ, તાપી, ડાંગ, નવસારી, વલસાડ, દમણ, દાદરા અને નગર હવેલી, જામનગર, પોરબંદર, જૂનાગઢ, ગીર સોમનાથ, અમરેલી અને રાજકોટમાં વરસાદને લઈ ઓરેન્જ એલર્ટ આપ્યું છે.

હવામાન વિભાગે આગામી 7 દિવસ માટે રાજ્યમાં વરસાદની આગાહી કરી છે. હવામાન વિભાગના વૈજ્ઞાનિક રામાશ્રય યાદવના જણાવ્યા અનુસાર, આજથી 3 દિવસ સુધી ભારેથી અતિભારે વરસાદની શક્યતા છે.

આવતીકાલે રાજ્યના સાબરકાંઠા અને અરવલ્લી જિલ્લામાં ભારેથી અતિભારે વરસાદને લઈને ઓરેન્જ એલર્ટ આપવામાં આવ્યું છે. જ્યારે બનાસકાંઠા, મહેસાણા, મહીસાગર, પંચમહાલ, દાહોદ, અમરેલી, ભાવનગર, સુરત, તાપી, નવસારી, ડાંગ, વલસાડ, દમણ અને દાદરા નગર હવેલી માં ભારે વરસાદને લઈને યલો એલર્ટ જાહેર કરવામાં આવ્યું છે.

આ આગાહીને પગલે સ્થાનિક વહીવટીતંત્ર અને નાગરિકોને સાવચેતી રાખવા અપીલ કરવામાં આવી છે. આ વર્ષે મેઘરાજા મહેરબાન થયા છે. અનેક જિલ્લાઓમાં છેલ્લા એક સપ્તાહથી ધોધમાર વરસાદ વરસી રહ્યો છે.