ચોમાસા પહેલા જ સૌરાષ્ટ્રમાં વરસાદની 'ધડબડાટી': રાજકોટ, જામનગર જિલ્લામાં ધોધમાર, પાકને ભારે નુકસાનીનો ભય

Rajkot Rain: ઉપલેટા, ગોંડલ, કોટડા સાંગાણી અને શાપર વેરાવળ સહિતના વિસ્તારોમાં મેઘમહેર, અડદ તલ સહિતના ઉનાળુ પાકને વ્યાપક નુકસાનની ભીતિ સતત ૧૫ દિવસથી કમોસમી માહોલથી ખેડૂતો ચિંતિત

Rain In Saurashtra: સૌરાષ્ટ્રના રાજકોટ અને જામનગર જિલ્લા સહિત અનેક વિસ્તારોમાં કમોસમી વરસાદે ફરી એકવાર હાજરી પૂરી છે. સવારથી ઉકળાટ અને બફારા બાદ અચાનક વાતાવરણમાં પલટો આવ્યો હતો અને ભારે પવન તથા વીજળીના કડાકા ભડાકા સાથે વરસાદ શરૂ થયો હતો. આ અણધાર્યા વરસાદથી ખાસ કરીને ખેડૂતોની ચિંતામાં મોટો વધારો થયો છે.

છેલ્લા ૧૫ દિવસથી કમોસમી વરસાદના કારણે સૌરાષ્ટ્રના ખેડૂતો પરેશાન છે, ત્યારે આજે ફરી એકવાર રાજકોટ અને જામનગર જિલ્લામાં ધોધમાર વરસાદ વરસ્યો હતો.

રાજકોટ શહેરમાં યાજ્ઞિક રોડ, ગોંડલ રોડ, ઢેબર રોડ સહિતના વિસ્તારોમાં વરસાદ શરૂ થતાં વાતાવરણમાં ઠંડક પ્રસરી હતી, પરંતુ ગ્રામ્ય વિસ્તારોમાં વરસેલા વરસાદે ખેડૂતોની મુશ્કેલી વધારી છે.

રાજકોટ જિલ્લાના ઉપલેટા તાલુકામાં ગીંગણી, સીદસર, મોટી પાનેલી અને ધ્રાફા સહિતના ગામડાઓમાં ધોધમાર વરસાદ નોંધાયો હતો. આ ઉપરાંત, રાજકોટ જિલ્લાના ગોંડલ અને આસપાસના ગ્રામ્ય વિસ્તારોમાં પણ વીજળીના કડાકા ભડાકા અને ભારે પવન સાથે વરસાદ પડ્યો હતો.

ગોંડલ ઉપરાંત કોટડા સાંગાણી અને શાપર વેરાવળ સહિતના વિસ્તારોમાં પણ મેઘમહેર જોવા મળી હતી. જામનગર જિલ્લાના કેટલાક ભાગોમાં પણ ભારે વરસાદના અહેવાલ છે.

સતત ૧૫ દિવસથી કમોસમી વરસાદના કારણે ખેડૂતો ચિંતાતુર બન્યા છે. આ કમોસમી વરસાદે અડદ, તલ, મગ સહિતના ઉનાળુ પાક તેમજ બાગાયતી પાકને ભારે નુકસાન પહોંચાડ્યું છે.

ખેડૂતોના ઊભા પાક વરસાદના કારણે પલળી ગયા છે અથવા તો તેને નુકસાન થઈ રહ્યું છે, જેના કારણે તેમને આર્થિક ફટકો પડવાની ભીતિ સેવાઈ રહી છે.

ઉલ્લેખનીય છે કે, બે દિવસ પહેલા પણ ગોંડલ અને આસપાસના ગ્રામ્ય વિસ્તારમાં એકથી દોઢ ઇંચ જેટલો વરસાદ પડ્યો હતો, જેણે ખેડૂતોની ચિંતામાં વધારો કર્યો હતો. આ કમોસમી વરસાદનો દોર હજુ કેટલો લાંબો ચાલશે અને તેની ખેતી પર કેવી અસર થશે, તે જોવું રહ્યું.