માંડવી નજીક કાજુ ભરેલો ટેમ્પો પલટ્યો: મદદને બદલે લોકોએ ચલાવી કાજુની લૂંટ

ટાયર ફાટતા અકસ્માત સર્જાયો, રોડ પર પથરાયેલા કાજુ રાહદારીઓ અને વાહનચાલકોએ ખિસ્સા ભર્યા.

Cashew loot Mandvi: માંડવી તાલુકાના નોગામા ગામ નજીક એક દુઃખદ ઘટનામાં કાજુ ભરેલો એક ટેમ્પો પલટી મારી ગયો હતો.

આ અકસ્માતમાં જાનહાનિ થઈ નહોતી, પરંતુ અકસ્માત બાદ લોકો દ્વારા જે દ્રશ્યો સર્જાયા તે માનવતા અને નાગરિકતા પર સવાલ ઉભા કરનારા હતા.

મદદ કરવાને બદલે, રાહદારીઓ અને વાહનચાલકોએ રોડ પર પથરાયેલા કાજુની લૂંટ ચલાવી હતી.

પ્રાથમિક માહિતી મુજબ, માંડવી નજીક નોગામા ગામ પાસેથી પસાર થઈ રહેલા કાજુ ભરેલા એક ટેમ્પોનું અચાનક ટાયર ફાટ્યું હતું.

ટાયર ફાટવાને કારણે ટેમ્પો ચાલકે વાહન પરનો કાબૂ ગુમાવ્યો અને ટેમ્પો રોડ પર પલટી મારી ગયો હતો.

ટેમ્પો પલટી મારી જતા તેમાં ભરેલા કાજુના કેરેટ રોડ પર વેરવિખેર થઈ ગયા હતા અને હજારો કિલો કાજુ રોડ પર પથરાયા હતા.