8મું પગાર પંચ: બેઝિક પગાર સીધો ₹66,240 થશે? કર્મચારીઓની સરકારે વધારી દીધી આશા

જમ્મુ-કાશ્મીરના કર્મચારી સંગઠનોએ પગાર પંચ સમક્ષ 3.68 ફિટમેન્ટ ફેક્ટરની માંગણી કરી, પેન્શન અને HRA સહિતના અન્ય લાભો વધારવા પણ કરી રજૂઆત.

8મા પગાર પંચને લઈને દેશભરના સરકારી કર્મચારીઓ અને પેન્શનરોમાં મોટી આશાઓ સેવાઈ રહી છે. આ દરમિયાન, જમ્મુ-કાશ્મીરના કર્મચારી સંગઠનોએ પગાર પંચ સમક્ષ એક એવો પ્રસ્તાવ રજૂ કર્યો છે, જે જો મંજૂર થાય તો લાખો કર્મચારીઓને મોટી આર્થિક રાહત મળી શકે તેમ છે.

સંગઠનોએ પંચ સમક્ષ માંગ કરી છે કે ફિટમેન્ટ ફેક્ટરને 2.86 થી લઈને 3.68 ની વચ્ચે સેટ કરવામાં આવે. જો કમિશન દ્વારા 3.68 ની આ માંગ સ્વીકારવામાં આવશે, તો કર્મચારીઓનો લઘુત્તમ બેઝિક પગાર જે અત્યારે ₹18,000 છે, તે સીધો જ વધીને ₹66,240 સુધી પહોંચી શકે છે.

જમ્મુ અને કાશ્મીરના ઓલ એમ્પ્લોયીઝ જોઈન્ટ એસોસિએશન અને ઓલ શીખ માઈનોરિટી એમ્પ્લોયીઝ એસોસિએશને ભેગા મળીને 8મા પગાર પંચને પોતાનો આ સંયુક્ત રિપોર્ટ સોંપ્યો છે. આ અહેવાલમાં તેમણે 2.86, 3.0 અને 3.68 ના ફિટમેન્ટ ફેક્ટર પર ગંભીરતાથી વિચાર કરવા માટે મજબૂત રજૂઆત કરી છે.

કર્મચારીઓનું કહેવું છે કે દેશમાં મોંઘવારી એટલી હદે વધી ગઈ છે કે સામાન્ય ઘર ચલાવવું અને જીવનનિર્વાહ કરવો મુશ્કેલ બન્યો છે. આ સંજોગોમાં કર્મચારીઓની ખરીદશક્તિ (Purchasing Power) ટકાવી રાખવા માટે ફિટમેન્ટ ફેક્ટરમાં મોટો વધારો કરવો હવે સમયની માંગ છે.

જો ફિટમેન્ટ ફેક્ટર અલગ-અલગ સ્તરે નક્કી થાય તો લઘુત્તમ પગારની ગણતરી આ મુજબ રહેશે: 2.57 ફેક્ટર પર ₹46,260, જ્યારે 2.86 ફેક્ટર પર ₹51,480 થશે. તે જ રીતે જો 3.0 ફેક્ટર મંજૂર થાય તો ₹54,000 અને 3.68 ફેક્ટર લાગુ થતાં જ લઘુત્તમ પગાર ₹66,240 થઈ જશે.

કર્મચારીઓએ માત્ર પગાર વધારા પૂરતી જ વાત નથી રાખી, પણ પેન્શનરો માટે સમાન પેન્શન સિસ્ટમ અને બેઝિકમાં મોંઘવારી ભથ્થું (DA) ઉમેરવાની પણ માંગ કરી છે. આ ઉપરાંત, શહેરો અને સરહદી વિસ્તારોમાં નોકરી કરતા કર્મચારીઓ માટે HRA (હાઉસ રેન્ટ એલાઉન્સ) ની વધુ સારી સિસ્ટમ તેમજ પ્રમોશન અને ટેક્સમાં મોટી રાહત આપવા ભલામણ કરાઈ છે.

જમ્મુ-કાશ્મીરના કર્મચારીઓએ પંચને જણાવ્યું કે તેઓ સરહદી, દુર્ગમ અને પર્વતીય વિસ્તારોમાં ખૂબ જ કપરા સંજોગોમાં કામ કરે છે. ખરાબ હવામાન, મોંઘું ટ્રાન્સપોર્ટેશન અને સુરક્ષાના પડકારો વચ્ચે વિશેષ લાભ આપવા અનિવાર્ય છે. હવે જ્યારે કમિશન પોતાની અંતિમ ભલામણો સરકારને સોંપશે, ત્યારે જ ચિત્ર સ્પષ્ટ થશે.