મોબાઈલથી જાતે જ બનાવો આયુષ્માન કાર્ડ: દર વર્ષે ₹5 લાખની મફત સારવારનો મળશે સીધો લાભ

ભારત સરકારની આયુષ્માન ભારત યોજના હેઠળ ગરીબ અને જરૂરિયાતમંદ પરિવારોને હોસ્પિટલમાં ₹5 લાખ સુધીની મફત સારવાર આપવામાં આવે છે. જાણો ઘરે બેઠા તમારા સ્માર્ટફોનથી આ કાર્ડ માટે કેવી રીતે ઓનલાઈન અરજી કરી શકાય.

આજના મોંઘવારીના સમયમાં બીમારીનો અણધાર્યો ખર્ચ કોઈ પણ સામાન્ય કે ગરીબ પરિવારને આર્થિક રીતે તોડી શકે છે. આ મોટી ચિંતા દૂર કરવા માટે ભારત સરકારે 'આયુષ્માન ભારત પ્રધાનમંત્રી જન આરોગ્ય યોજના (PM-JAY)' શરૂ કરી છે. આ યોજનાનો મુખ્ય હેતુ એ છે કે પૈસાના અભાવે કોઈ પણ ગરીબ દર્દીની સારવાર અટકવી ન જોઈએ, જે અંતર્ગત પાત્રતા ધરાવતા પરિવારોને દર વર્ષે 5 લાખ રૂપિયા સુધીની મફત અને કેશલેસ સારવારની સુવિધા મળે છે.

આયુષ્માન કાર્ડ એ કોઈ સામાન્ય કાર્ડ નથી, પણ PM-JAY હેઠળ આપવામાં આવતું એક સ્માર્ટ ડિજિટલ હેલ્થ કાર્ડ છે. જો તમે આ યોજનાના લાભાર્થી છો, તો આ કાર્ડ દેશની હજારો સરકારી અને પ્રાઈવેટ હોસ્પિટલોમાં મફત સારવાર મેળવવાની ચાવી સમાન છે. આ કાર્ડ તમારા આધાર કાર્ડ સાથે સીધું જોડાયેલું હોવાથી કાગળિયાની કોઈ લાંબી ઝંઝટ વગર હોસ્પિટલમાં ઝડપથી એડમિશન મળી જાય છે. જો તમારી પાસે આ કાર્ડ છે, તો તમારા પરિવારને દર વર્ષે 5 લાખ રૂપિયા સુધીની સંપૂર્ણ કેશલેસ અને પેપરલેસ સારવારનું મજબૂત સુરક્ષા કવચ મળી જાય છે. આ કવરેજમાં માત્ર નાની બીમારીઓ જ નહીં, પણ સર્જરી, હોસ્પિટલમાં દાખલ થવાનો ખર્ચ, મોંઘી દવાઓ, મેડિકલ રિપોર્ટ્સ અને ડિસ્ચાર્જ પછીની સંભાળનો પણ સમાવેશ થાય છે. સૌથી મોટી રાહતની વાત એ છે કે પરિવારમાં સભ્યોની સંખ્યા કેટલી છે કે તેમની ઉંમર કેટલી છે, તેનો કોઈ જ બાધ આ યોજનામાં રાખવામાં આવ્યો નથી.

આ યોજના ખાસ કરીને અત્યંત નબળી આર્થિક સ્થિતિ ધરાવતા પરિવારો માટે બનાવવામાં આવી છે. સરકારે વર્ષ 2011 ની સામાજિક-આર્થિક જાતિ વસ્તી ગણતરી (SECC) અને અન્ય સરકારી ડેટાના આધારે લાભાર્થીઓનું એક લિસ્ટ તૈયાર કર્યું છે, જેમાં રેશનકાર્ડ ધારકો અને BPL પરિવારોનો સમાવેશ થાય છે. જોકે, અહી એ ખાસ નોંધવું જરૂરી છે કે માત્ર BPL કાર્ડ હોવું જ પૂરતું નથી, આ મફત સારવાર મેળવવા માટે તમારું નામ સરકારની લાભાર્થી યાદીમાં હોવું ફરજિયાત છે.

હવે આ કાર્ડ કઢાવવા માટે સાયબર કાફેમાં જઈને પૈસા બગાડવાની કે ક્યાંય ધક્કા ખાવાની જરૂર નથી. અરજી કરતા પહેલા તમારું આધાર કાર્ડ, આધાર સાથે લિંક થયેલો ચાલુ મોબાઈલ નંબર અને રેશનકાર્ડ કે ફેમિલી આઈડી તૈયાર રાખો. સૌથી પહેલા PM-JAY ની સત્તાવાર વેબસાઈટ પર જઈને તમારું નામ લિસ્ટમાં છે કે નહીં તે ચેક કરો અને ત્યારબાદ તમારા મોબાઈલના પ્લે સ્ટોર પરથી ઓફિશિયલ 'Ayushman App' ડાઉનલોડ કરો.

એપ ઓપન કરીને તમારો મોબાઈલ નંબર નાખો અને OTP દાખલ કરીને રજિસ્ટ્રેશન પૂરું કરો. હવે એપમાં તમારું રાજ્ય સિલેક્ટ કરીને આધાર નંબર, રેશનકાર્ડ અથવા ફેમિલી આઈડીની મદદથી તમારી વિગતો સર્ચ કરો. જો તમે પાત્ર હશો, તો આખા પરિવારનું લિસ્ટ સ્ક્રીન પર દેખાશે, જેમાં તમારા નામ પર ક્લિક કરીને આધાર બેઝ્ડ ઈ-કેવાયસી (e-KYC) પ્રોસેસ સરળતાથી પૂરી કરો.

એકવાર તમારી વિગતો મંજૂર થઈ જાય, એટલે તમે એપ કે પોર્ટલ પરથી તરત જ તમારું ડિજિટલ આયુષ્માન કાર્ડ ડાઉનલોડ કરી શકશો. જો લિસ્ટમાં તમારું નામ ન દેખાય તો નિરાશ થવાની જરૂર નથી, તમે તમારા નજીકના કોમન સર્વિસ સેન્ટર (CSC) અથવા પેનલ હોસ્પિટલના આયુષ્માન હેલ્પ ડેસ્કનો પણ સંપર્ક કરી શકો છો.

Continues below advertisement

આયુષ્માન કાર્ડ કાઢવા માટે હંમેશા માત્ર સરકારની ઓફિશિયલ 'રાષ્ટ્રીય આરોગ્ય સત્તામંડળ' એપનો જ ઉપયોગ કરવો હિતાવહ છે. આ કાર્ડ સંપૂર્ણપણે ફ્રીમાં નીકળે છે, તેથી કોઈપણ વ્યક્તિને તે કઢાવવા માટે પૈસા ચૂકવવા નહીં. છેલ્લે, ઓનલાઈન પ્રક્રિયામાં OTP વેરિફિકેશન ઝડપથી અને સરળતાથી થઈ શકે તે માટે તમારા આધાર કાર્ડ સાથે જોડાયેલો મોબાઈલ નંબર હંમેશા એક્ટિવ રાખવો અત્યંત જરૂરી છે.