હવામાન વિભાગની લેટેસ્ટ આગાહીઃ આગામી 48 કલાકમાં આ રાજ્યોમાં ભારે વરસાદ તૂટી પડશે, દિલ્હી-NCRમાં વધશે હીટવેવ

દેશમાં હવામાનની પેટર્ન હાલમાં વિપરીત જોવા મળી રહી છે. ઉત્તર ભારતમાં જ્યાં ગરમીનો પ્રકોપ વધી રહ્યો છે, ત્યાં દક્ષિણ અને પૂર્વ ભારતના કેટલાક રાજ્યોમાં વરસાદી માહોલ છે.

India Weather: ભારતીય હવામાન વિભાગ (IMD) દ્વારા જાહેર કરવામાં આવેલા નવીનતમ અપડેટ અનુસાર, આગામી 48 કલાકમાં બિહાર, છત્તીસગઢ, પૂર્વ મધ્યપ્રદેશ, ઝારખંડ અને ઓડિશામાં ભારે વરસાદની સંભાવના છે. બીજી તરફ, દિલ્હી-એનસીઆર, ઉત્તર પ્રદેશ અને રાજસ્થાન જેવા રાજ્યોમાં ગરમીનું મોજું વધુ તીવ્ર બનશે.

હવામાન વિભાગના જણાવ્યા અનુસાર, 24 માર્ચની રાતથી પશ્ચિમ હિમાલય ક્ષેત્રમાં એક નવું વેસ્ટર્ન ડિસ્ટર્બન્સ સક્રિય થવાની શક્યતા છે. આને કારણે, જમ્મુ-કાશ્મીર, લદ્દાખ, ગિલગિટ-બાલ્ટિસ્તાન અને મુઝફ્ફરાબાદમાં 24 થી 28 માર્ચ દરમિયાન હળવોથી મધ્યમ વરસાદ પડી શકે છે. હિમાચલ પ્રદેશમાં 24 થી 27 માર્ચ અને ઉત્તરાખંડમાં 26 થી 27 માર્ચના રોજ ગાજવીજ સાથે હળવો અથવા મધ્યમ વરસાદની સંભાવના છે. એટલું જ નહીં, 26 માર્ચે જમ્મુ-કાશ્મીર-લદ્દાખ-ગિલગિટ-બાલ્ટિસ્તાન-મુઝફ્ફરાબાદમાં કેટલાક સ્થળોએ ભારે વરસાદ પણ પડી શકે છે.

દક્ષિણ ભારતમાં તામિલનાડુમાં હવામાન વિભાગે બે દિવસ સુધી હળવોથી મધ્યમ વરસાદની આગાહી કરી છે. ત્યારબાદ બે દિવસ હવામાન સૂકું રહેશે અને 27 માર્ચથી ફરી વરસાદ શરૂ થવાની સંભાવના છે. આ ઉપરાંત, તેલંગાણાના ઘણા જિલ્લાઓ માટે 24 માર્ચ સુધી તોફાન, કરા અને તેજ પવનને લઈને ઓરેન્જ અને યલો એલર્ટ પણ જાહેર કરવામાં આવ્યા છે.

બિહારમાં આગામી 48 કલાકમાં છપરા, ગોપાલગંજ, સિવાન, હાજીપુર અને મુઝફ્ફરપુરમાં ભારે વરસાદની સંભાવના છે. ઝારખંડની વાત કરીએ તો બોકારો, ચાઈબાસા, દુમકા, હજારીબાગ અને રાંચીમાં તોફાની સ્થિતિ સર્જાઈ શકે છે.

હાલમાં સક્રિય વેસ્ટર્ન ડિસ્ટર્બન્સના કારણે ઘણા રાજ્યોમાં વાદળોની અવરજવર જોવા મળી રહી છે, જેનાથી આકરી ગરમીમાં થોડી રાહત મળી છે. પરંતુ આગામી દિવસોમાં ઘણી જગ્યાએ ગરમીનો પ્રકોપ વધશે. હવામાન વિભાગના જણાવ્યા અનુસાર, આગામી 4-5 દિવસ દરમિયાન મધ્ય ભારત અને આંતરિક મહારાષ્ટ્રમાં મહત્તમ તાપમાનમાં 2-4 ડિગ્રી સેલ્સિયસનો વધારો થઈ શકે છે. ગુજરાતમાં પણ આગામી ત્રણ દિવસમાં તાપમાનમાં 2 થી 3 ડિગ્રીનો વધારો થવાની સંભાવના છે.

દિલ્હીમાં આગામી 3 દિવસ સુધી હવામાન સ્વચ્છ રહેશે અને આજે તાપમાન 35 ડિગ્રી સેલ્સિયસ રહેવાની શક્યતા છે. જો કે, 27, 28 અને 29 માર્ચે ભારે પવનને કારણે હવામાનમાં થોડો ફેરફાર જોવા મળી શકે છે. 27 માર્ચે તાપમાન 36 ડિગ્રી રહેશે, ત્યારબાદ આગામી બે દિવસ સુધી તાપમાન 34 ડિગ્રી રહેવાની સંભાવના છે.