Yogi Adityanath: 2022ની ચૂંટણી પહેલા જ થઈ ગઈ હતી CM યોગીને હટાવવાની તૈયારી! આ બુકમાં થયો મોટો ખુલાસો

લોકસભા ચૂંટણી 2024ના પરિણામોએ ભાજપને મોટો ઝટકો આપ્યો છે. દેશને સૌથી વધુ સાંસદો આપનાર ઉત્તર પ્રદેશમાં ભાજપનું પ્રદર્શન નિરાશાજનક હતું અને અહીં સમાજવાદી પાર્ટીએ સૌથી વધુ 37 બેઠકો જીતી છે.

ઉત્તર પ્રદેશમાં ભાજપના ખરાબ પ્રદર્શન બાદ યુપીના સીએમ યોગી આદિત્યનાથને લઈને ઘણી અટકળો ચાલી રહી છે. આ દરમિયાન યોગી આદિત્યનાથને લઈને મોટો દાવો કરવામાં આવ્યો છે.

ઈન્ડિયન એક્સપ્રેસ સાથે જોડાયેલા વરિષ્ઠ પત્રકાર શ્યામલાલ યાદવે તેમના પુસ્તક એટ ધ હાર્ટ ઓફ પાવરઃ ધ ચીફ મિનિસ્ટર્સ ઓફ ઉત્તર પ્રદેશ(At The Heart Of Power: The Chief Ministers of Uttar Pradesh)માં દાવો કર્યો છે કે 2022માં યોજાનારી યુપી વિધાનસભાની ચૂંટણીને કારણે મુખ્યમંત્રી યોગી આદિત્યનાથને હટાવવાની સંપૂર્ણ તૈયારીઓ પહેલાથી જ હતી.

શ્યામ લાલ યાદવે પોતાના પુસ્તકમાં લખ્યું છે કે એક સમયે એવું નક્કી હતું કે યોગી આદિત્યનાથને મુખ્યમંત્રી પદ પરથી હટાવવામાં આવશે. જોકે, બાદમાં પાર્ટીને સમજાયું કે જો તેમને યુપીમાંથી હટાવવામાં આવશે તો ભાજપને નુકસાન વેઠવું પડશે.

જો કે, આ પુસ્તકમાં તેમણે યોગી આદિત્યનાથને હટાવવાના તેમની કોશીશોનું કારણ નથી આપ્યું, પરંતુ એ નોંધવામાં આવ્યું છે કે યુપીના તત્કાલીન ડેપ્યુટી સીએમ કેશવ પ્રસાદ મૌર્ય સાથે તેમના મતભેદો વધી રહ્યા હતા.

તમને જણાવી દઈએ કે ભાજપને યુપીમાં માત્ર 33 લોકસભા સીટો પર જીત મળી છે. અગાઉ 2014 અને 2019માં ભાજપે શાનદાર પ્રદર્શન કર્યું હતું.

આ પહેલા અરવિંદ કેજરીવાલે સીએમ યોગીને લઈને નિવેદન આપ્યું હતું. તેમણે કહ્યું હતું કે ભાજપ સીએમ યોગી આદિત્યનાથને હટાવવાની તૈયારી કરી રહી છે.