UCC લાગુ થયા પછી, દરેકને આટલા મહિનામાં લગ્ન નોંધણી કરાવવી પડશે, જાણો સંપૂર્ણ પ્રક્રિયા

27મી જાન્યુઆરીથી UCCનો અમલ, 6 મહિનામાં નોંધણી કરાવવી પડશે, ઓનલાઇન પોર્ટલ શરૂ

27મી જાન્યુઆરી, ઉત્તરાખંડના ઇતિહાસમાં એક મહત્વપૂર્ણ દિવસ બની ગયો છે. આ દિવસે રાજ્યમાં યુનિફોર્મ સિવિલ કોડ (UCC)નો અમલ શરૂ થયો છે. આ સાથે જ લગ્ન, સંબંધો અને મિલકત સંબંધિત નિયમોમાં પણ પરિવર્તન આવ્યું છે.

અત્યાર સુધી ભારતમાં અલગ-અલગ ધર્મો માટે લગ્નના અલગ-અલગ કાયદાઓ હતા. પરંતુ UCCના અમલ બાદ તમામ ધર્મો એક જ કાયદા હેઠળ આવશે અને દરેક વ્યક્તિએ તેનું પાલન કરવું પડશે.

UCC લાગુ થવાથી બેવડા લગ્ન અને હલાલા જેવી પ્રથાઓ પર પ્રતિબંધ મુકાયો છે. એટલું જ નહીં, જે યુગલો લિવ-ઇન રિલેશનશિપમાં રહેવા માંગે છે, તેઓ માટે પણ રજીસ્ટ્રેશન કરાવવું ફરજિયાત રહેશે.

ઉત્તરાખંડમાં UCC લાગુ થયા બાદ તમામ લોકો માટે લગ્નની નોંધણી ફરજિયાત બની ગઈ છે.

UCC હેઠળ ઉત્તરાખંડમાં લગ્ન નોંધણી માટે 27 માર્ચ 2010ની કટ ઓફ ડેટ રાખવામાં આવી છે. એટલે કે, ત્યારથી અત્યાર સુધીમાં થયેલા તમામ લગ્નોની નોંધણી કરાવવી જરૂરી છે અને આ માટે 6 મહિનાનો સમય આપવામાં આવ્યો છે.

ઉત્તરાખંડ સરકારે આ માટે એક ઓનલાઇન પોર્ટલ શરૂ કર્યું છે. જે લોકો પોતાના લગ્નની નોંધણી કરાવવા માંગે છે, તેઓ સરકારના સત્તાવાર પોર્ટલ ucc.uk.gov.in પર નોંધણી કરાવી શકે છે.

નોંધણીની પ્રક્રિયા: સૌ પ્રથમ વેબસાઈટ પર જઈને એકાઉન્ટ બનાવવું પડશે. ત્યારબાદ જરૂરી દસ્તાવેજો સબમિટ કરવા પડશે. અને છેલ્લે ફી ભરવાની રહેશે. આ પ્રક્રિયા પૂર્ણ થયા બાદ રજીસ્ટ્રેશન થશે અને પ્રમાણપત્ર આપવામાં આવશે. આ વેબસાઈટ દ્વારા લિવ-ઈન રિલેશનશિપનું રજીસ્ટ્રેશન પણ કરી શકાય છે.