જેતપુર, ધોરાજી અને ઉપલેટામાં ગાજવીજ અને ભારે પવન સાથે તૂટી પડ્યો જોરદાર વરસાદ

જેતપુર, ધોરાજી અને ઉપલેટામાં ગાજવીજ અને ભારે પવન સાથે તૂટી પડ્યો જોરદાર વરસાદ

ઉપલેટામાં ધોધમાર વરસાદ

રાજકોટ : રાજકોટ જિલ્લામાં વરસાદી માહોલ જામ્યો છે. બપોર બાદ કાળા ડિબાંગ વાદળો વચ્ચે રાજકોટ જિલ્લાના જેતપુર, ધોરાજી અને ઉપલેટમાં ધોધમાર વરસાદ વરસ્યો છે. ત્રણેય તાલુકામાં ગાજવીજ સાથે ધોધમાર વરસાદ પડ્યો છે. હવામાન વિભાગે આજે રાજકોટ જિલ્લામાં વરસાદની આગાહી કરી હતી.

રાજકોટ જિલ્લાના ઉપલેટાના વાતાવરણમાં અચાનક પલટો આવ્યો હતો. ઉપલેટામાં ભારે પવન અને ગાજવીજ સાથે કમોસમી વરસાદ વરસ્યો છે.ઉપલેટાના કટલેરી બજાર, દ્વારકાધીશ સોસાયટી, ભાદર ચોક, વિક્રમ ચોક, સ્વામિનારાયણ સોસાયટી, જીરાપા પ્લોટ, કાદી વિસ્તાર સહિતમાં વરસાદ વરસ્યો છે.

ઉપલેટા ગ્રામ્ય વિસ્તાર ડુમિયાણી, વાડલા, સેવંત્રા, નવાપરા, કેરાળા, ખાખીજાળીયા, મોજીરા, ગઢાળા, ભાયાવદર સહિતના ગ્રામ્ય વિસ્તારોમાં પણ ભારે વરસાદ વરસ્યો છે.

ધોરાજી પંથકમાં પણ આજે વરસાદ વરસ્યો છે. ધોરાજીના વાતાવરણમા પલટો આવ્યો હતો. ધોરાજીમા વાવાઝોડા સાથે કમોસમી વરસાદ પડ્યો છે.

ધોરાજીના સ્ટેશન રોડ, ગેલેક્સી ચોક, જેતપુર રોડ, હોસ્પિટલ ચોક, અવેડા ચોક સહિતના વિસ્તાારોમાં વરસાદ પડ્યો હતો. ધોરાજી ગ્રામ્ય વિસ્તાર ગુંદાળા, ફરેણી, નાની પરબડી, મોટી પરબડી, ભોળા સહિતના ગ્રામ્ય વિસ્તારોમાં પણ વરસાદ પડ્યો છે.

રાજકોટ જિલ્લાના જેતપુરમાં પણ આજે વરસાદ વરસ્યો છે. જેતપુરમાં વહેલી સવારથી જ અસહ્ય ગરમી બાદ પવન સાથે વરસાદ વરસ્યો છે.

જેતપુરમાં જોરદાર પવન સાથે ધોધમાર વરસાદની એન્ટ્રી થઈ હતી. જેતપુર શહેરના તીનબત્તી ચોક, જૂનાગઢ રોડ, સ્ટેન્ડ ચોક, ફૂલવાડી, એમજી રોડ સહિતના વિસ્તારોમાં ધોધમાર વરસાદ વરસ્યો છે.