ઈઝરાયલે બનાવી નવી Arrow-4 ડિફેન્સ સિસ્ટમ, જાણો શું છે તેની તાકાત?

Arrow-4 Defence System: ઈઝરાયલે તેની એર ડિફેન્સ સિસ્ટમને વધુ મજબૂત બનાવી છે અને એરો-4 મિસાઈલ ડિફેન્સ સિસ્ટમ વિકસાવી છે.

પ્રતિકાત્મક તસવીર

Arrow-4 Defence System: ઈઝરાયલે તેની એર ડિફેન્સ સિસ્ટમને વધુ મજબૂત બનાવી છે અને એરો-4 મિસાઈલ ડિફેન્સ સિસ્ટમ વિકસાવી છે. ઈઝરાયલ એરોસ્પેસ ઇન્ડસ્ટ્રીઝ (IAI) ના વડા બોઝ લેવીએ પુષ્ટી કરી હતી કે આ અત્યાધુનિક સિસ્ટમ ટૂંક સમયમાં રાષ્ટ્રીય સુરક્ષા માળખાનો ભાગ બનશે. આ સિસ્ટમ અગાઉ વિકસિત એરો-૩ નું લેટેસ્ટ વર્ઝન છે, જે ટૂંકા અંતરે અત્યંત ચોકસાઈ સાથે દુશ્મન બેલિસ્ટિક મિસાઈલોને તોડી પાડવા માટે રચાયેલ છે.

એરો-4 સિસ્ટમની સૌથી ખાસ વાત તેની "શૂટ-લુક-શૂટ" કોન્સેપ્ટ છે. એટલે કે, જો મિસાઈલ પ્રથમ પ્રયાસમાં લક્ષ્યને સંપૂર્ણપણે નષ્ટ કરવામાં સક્ષમ ન હોય તો સિસ્ટમ તરત જ પરિસ્થિતિનું ફરીથી મૂલ્યાંકન કરી શકે છે અને ચોકસાઈ સાથે ફરીથી હુમલો કરી શકે છે. આ નવી સિસ્ટમ આધુનિક વોરહેડ ટેકનોલોજી અને અત્યંત સંવેદનશીલ સીકર સિસ્ટમનો ઉપયોગ કરે છે, જે તેને હાઇપરસોનિક ગતિએ આવતી વધુ અદ્યતન બેલિસ્ટિક મિસાઈલોને રોકવામાં સક્ષમ બનાવે છે.

તાજેતરમાં જ્યારે ઈરાને ઈઝરાયલ પર અદ્યતન બેલિસ્ટિક મિસાઈલો છોડી ત્યારે ઈઝરાયલ લગભગ 85 ટકા મિસાઈલોને અટકાવવામાં સફળ રહ્યું, પરંતુ હજુ પણ લગભગ 50 મિસાઈલો તેના ક્ષેત્રમાં પડી જેના કારણે ભારે નુકસાન થયું. આવી સ્થિતિમાં એરો-4 લાવવાનો હેતુ આ સુરક્ષા ખામીને સંપૂર્ણપણે દૂર કરવાનો છે જેથી ભવિષ્યમાં દુશ્મનની એક પણ મિસાઈલ જમીન પર ન પડી શકે.

IAI અનુસાર, એરો-4 ને ઈઝરાયલી સંરક્ષણ નેટવર્કમાં સંપૂર્ણ રીતે સામેલ કરવામાં બે વર્ષ લાગી શકે છે, પરંતુ સરકારે તેના ઝડપી એકીકરણ માટે સૂચનાઓ આપી છે. ઉપરાંત બીજી આગામી પેઢીની સિસ્ટમ એરો-5 પર પણ ઝડપથી કામ ચાલી રહ્યું છે, જે આગામી વર્ષોમાં એરો-3 ને બદલશે અને ઈઝરાયલની સુરક્ષાને વધુ અજેય બનાવશે.

એરો ડિફેન્સ સિરીઝ પહેલાથી જ વિશ્વની પ્રથમ સંપૂર્ણપણે કાર્યરત એન્ટિ-બેલિસ્ટિક મિસાઈલ સિસ્ટમ માનવામાં આવે છે. આમાં એરો-2 અને એરો-3 જેવી સિસ્ટમો સામેલ છે જે હવામાં જ 3 કિલોમીટર પ્રતિ સેકન્ડની ઝડપે આવતી મિસાઈલોને નષ્ટ કરી શકે છે. એરો-4 સામેલ થતા આ નેટવર્ક વધુ અસરકારક અને ખતરનાક બનશે.

આ પ્રોજેક્ટ 2021માં શરૂ થયો હતો, જ્યારે અમેરિકા અને ઇઝરાયલે સંયુક્ત રીતે તેના વિકાસની જાહેરાત કરી હતી. તે માત્ર ટેકનોલોજીકલ પ્રગતિનું પ્રતિક જ નથી પણ બંને દેશો વચ્ચે મજબૂત સંરક્ષણ ભાગીદારીનું પણ પ્રતિક છે. એરો-4 હવે ઇઝરાયલ માટે માત્ર એક સંરક્ષણ પ્રણાલી જ નહીં પરંતુ સુરક્ષા કવચ તરીકે ઉભરી આવશે, ખાસ કરીને એવા સમયે જ્યારે પશ્ચિમ એશિયામાં તણાવ ચરમસીમાએ છે.