શું દરિયાના પાણીથી આગ ઓલવી શકાય? અમેરિકા તેનો ઉપયોગ કેમ નથી કરતું?

આગ ઓલવવા દરિયાના પાણીનો ઉપયોગ થઈ શકે છે, પરંતુ તેનાથી સાધનો અને પર્યાવરણને નુકસાન થવાની સંભાવનાને કારણે તેનો ઉપયોગ ટાળવામાં આવે છે.

અમેરિકાના લોસ એન્જલસમાં લાગેલી ભયાનક આગ સતત વધી રહી છે અને હજારો એકર વિસ્તારને લપેટમાં લઈ ચૂકી છે.

આગ ઓલવવામાં પાણીની અછત એક મોટી સમસ્યા છે, ત્યારે એ સવાલ ઉઠે છે કે નજીકમાં પેસિફિક મહાસાગર હોવા છતાં તેનો ઉપયોગ કેમ નથી કરવામાં આવી રહ્યો? શું દરિયાના પાણીથી આગ ઓલવી શકાય? અને જો હા, તો અમેરિકા તેનો ઉપયોગ કેમ નથી કરી રહ્યું? ચાલો જાણીએ.

જવાબ છે - હા, સિદ્ધાંતિક રીતે દરિયાના પાણીથી આગ ઓલવી શકાય છે, પરંતુ તે લાગે તેટલું સરળ નથી. દરિયાના પાણીમાં રહેલા ક્ષારયુક્ત ઘટકો ફાયદા કરતાં વધુ નુકસાન કરી શકે છે. તેથી જ્યાં સુધી અત્યંત આવશ્યક ન હોય ત્યાં સુધી ફાયર વિભાગ તેનો ઉપયોગ ટાળે છે.

દરિયાના પાણીમાં રહેલું મીઠું કાટરોધક હોય છે, જે ફાયર પંપ, વોટર ડમ્પિંગ પ્લેન જેવા મહત્વપૂર્ણ સાધનોને નુકસાન પહોંચાડી શકે છે. Technology.org અનુસાર, મીઠું પાણીની ઠંડકની અસરને પણ ઘટાડી શકે છે, જેનાથી તે અગ્નિશામક તરીકે ઓછું અસરકારક સાબિત થઈ શકે છે અને અગ્નિશામકો માટે જોખમી પણ બની શકે છે.

આગ ઓલવવા માટે ખારા સમુદ્રના પાણીનો ઉપયોગ પર્યાવરણ માટે પણ ચિંતાનો વિષય છે. પાણીમાં રહેલું મીઠું જમીનમાં ભળીને તેને બંજર બનાવી શકે છે અથવા અન્ય જળાશયોમાં વહી શકે છે.

જેનાથી વનસ્પતિને નુકસાન થાય છે, કારણ કે મીઠું જમીનની ખારાશમાં વધારો કરે છે, જેનાથી છોડ માટે જમીનમાંથી પાણી અને પોષક તત્ત્વો મેળવવાનું મુશ્કેલ બની જાય છે. આ કારણોસર, નજીકમાં દરિયો હોવા છતાં, લોસ એન્જલસની આગ ઓલવવા માટે દરિયાના પાણીનો ઉપયોગ ટાળવામાં આવી રહ્યો છે.