શું તમે પણ Bluetooth ચાલુ રાખો છો ? 1 ભૂલથી બેંક એકાઉન્ટ થઈ જશે ખાલી! સાવધાન

બ્લૂજેકિંગ અને બ્લૂબગિંગનો ખતરો: ભીડમાં ફોનનો કંટ્રોલ મેળવીને હેકર્સ ચોરી શકે છે OTP અને ડેટા.

શું તમે પણ કામ પત્યા પછી મોબાઈલનું બ્લૂટૂથ બંધ કરવાનું ભૂલી જાઓ છો? જો હા, તો સાવધાન થઈ જજો. આજકાલ સાયબર ક્રાઈમ (Cyber Crime) ની દુનિયામાં હેકર્સ બ્લૂટૂથના માધ્યમથી લોકોના બેંક એકાઉન્ટ સાફ કરી રહ્યા છે. ભીડભાડવાળી જગ્યાએ તમારું ઓપન બ્લૂટૂથ હેકર્સ માટે ખુલ્લું આમંત્રણ બની શકે છે. જાણો કેવી રીતે એક નાનકડી ભૂલ તમારી પ્રાઈવસી અને પૈસા બંને ડૂબાડી શકે છે.

આજના આધુનિક સમયમાં સ્માર્ટફોન અને વિવિધ ગેજેટ્સ આપણા જીવનનો અભિન્ન ભાગ બની ગયા છે. આપણે વારંવાર વાયરલેસ ઈયરબડ્સ (Wireless Earbuds), સ્માર્ટવોચ અથવા કારની ઓડિયો સિસ્ટમ સાથે ફોન કનેક્ટ કરવા માટે બ્લૂટૂથનો ઉપયોગ કરીએ છીએ. પરંતુ ખરી મુસીબત ત્યારે ઉભી થાય છે જ્યારે કામ પૂરું થયા પછી આપણે તેને બંધ કરવાનું ભૂલી જઈએ છીએ. સાયબર નિષ્ણાતોના મતે, આ એક નાનકડી લાગતી બેદરકારી તમારી ડેટા સિક્યુરિટી (Data Security) માટે ખૂબ મોટું જોખમ ઉભું કરી શકે છે.

સાયબર ગઠિયાઓ સામાન્ય રીતે રેલવે સ્ટેશન, મેટ્રો, બસ કે મોલ જેવી ભીડભાડવાળી જગ્યાઓ પર શિકારની શોધમાં સક્રિય હોય છે. તેઓ ખાસ પ્રકારના સોફ્ટવેર અને ડિવાઈસની મદદથી એવા સ્માર્ટફોન શોધે છે જેમનું બ્લૂટૂથ 'ઓન' અને 'ડિસ્કવરેબલ' હોય છે. એકવાર તમારો ફોન તેમના રડારમાં આવે, એટલે તેઓ તમને એક પેરિંગ રિક્વેસ્ટ (Pairing Request) મોકલે છે. ઘણીવાર ઉતાવળમાં કે ભૂલથી યુઝર આ રિક્વેસ્ટ સ્વીકારી લે છે અને બસ અહીંથી જ છેતરપિંડીની શરૂઆત થાય છે.

તમારા ફોનમાં ઘૂસણખોરી કરવા માટે હેકર્સ અલગ-અલગ પદ્ધતિઓ અપનાવે છે, જેને ટેકનિકલ ભાષામાં બ્લૂજેકિંગ (Bluejacking), બ્લૂસ્નાર્ફિંગ (Bluesnarfing) અને બ્લૂબગિંગ (Bluebugging) કહેવામાં આવે છે. એકવાર કનેક્શન બની જાય, પછી હેકર્સ તમારા અંગત મેસેજ, કોન્ટેક્ટ્સ અને ફોટા ચોરી શકે છે. આમાં સૌથી ખતરનાક બાબત એ છે કે તેઓ રિમોટલી તમારા ફોનનો સંપૂર્ણ કંટ્રોલ પણ લઈ શકે છે.

જ્યારે હેકર્સ તમારા ફોનને કંટ્રોલ કરે છે, ત્યારે તમારા ફોન પર આવતા બેંકના OTP અને ટ્રાન્ઝેક્શન એલર્ટ મેસેજ સીધા હેકર પાસે પહોંચી જાય છે. જ્યારે હેકર્સ પાસે તમારા ફોનના મેસેજ અને નોટિફિકેશનની એક્સેસ આવી જાય છે, ત્યારે બેંક એકાઉન્ટ ખાલી કરવામાં તેમને વાર લાગતી નથી. ઘણા કિસ્સાઓમાં પીડિતને ખબર પડે તે પહેલાં જ લાખો રૂપિયા ટ્રાન્સફર થઈ ગયા હોય છે અને ઓનલાઇન ફ્રોડ (Online Fraud) નો ભોગ બનનાર વ્યક્તિ હાથ ઘસતો રહી જાય છે.

આ પ્રકારના ડિજિટલ હુમલાથી બચવું જરાય મુશ્કેલ નથી, તેના માટે માત્ર થોડી સાવચેતી અને જાગૃતિ જરૂરી છે. જ્યારે બ્લૂટૂથનો ઉપયોગ ન હોય, ત્યારે તેને તાત્કાલિક બંધ (Turn Off) કરવાની આદત પાડવી જોઈએ. ખાસ કરીને જાહેર સ્થળોએ બ્લૂટૂથ ચાલુ રાખવાનું ટાળવું જોઈએ. આ ઉપરાંત, કોઈપણ અજાણ્યા ડિવાઈસની પેરિંગ રિક્વેસ્ટ ક્યારેય સ્વીકારવી નહીં.

તમારી સુરક્ષા વધારવા માટે ફોનના સેટિંગ્સમાં જઈને બ્લૂટૂથને હંમેશા 'Non-discoverable' અથવા 'Invisible' મોડમાં રાખવું જોઈએ, જેથી કોઈ અજાણી વ્યક્તિ તમારો ફોન સર્ચ ન કરી શકે. યાદ રાખો, ટેકનોલોજી સુવિધા માટે છે, પરંતુ તેનો બેદરકારીભર્યો ઉપયોગ આર્થિક નુકસાનનું કારણ બની શકે છે.