Supreme Court ની ચેતવણી! આ નકલી વેબસાઈટથી સતર્ક રહો નહીં તો ખાલી થઈ જશે બેંક એકાઉન્ટ

Supreme Court ની ચેતવણી! આ નકલી વેબસાઈટથી સતર્ક રહો નહીં તો ખાલી થઈ જશે બેંક એકાઉન્ટ

પ્રતિકાત્મક તસવીર

દેશમાં નકલી વેબસાઈટની મદદથી લોકોને છેતરવાનું કામ ખૂબ જ ઝડપથી થઈ રહ્યું છે. જેને ધ્યાનમાં રાખીને, તાજેતરમાં સુપ્રીમ કોર્ટે જાહેર નોટિસ જારી કરીને નાગરિકોને નકલી વેબસાઇટ્સથી સાવધાન રહેવાની સલાહ આપી છે.તમને જણાવી દઈએ કે આ વેબસાઈટને ઓફિશિયલ સાઈટ્સની જેમ બતાવવામાં આવે છે, પરંતુ તેનો હેતુ અંગત ડેટાની ચોરી કરીને સાયબર ક્રાઈમ કરવાનો છે. તમને વિગતવાર માહિતી જણાવીએ.

તમારી જાણકારી માટે તમને જણાવી દઈએ કે સાયબર ગુનેગારો સોશિયલ મીડિયા અથવા વોટ્સએપ દ્વારા નકલી વેબસાઈટ શેર કરી રહ્યા છે. તેમના URL જોવામાં આધિકારીક દેખાય છે, પરંતુ તમે તેના પર ક્લિક કરો કે તરત જ તમારી બેંક વિગતો અને વ્યક્તિગત ડેટા જેવી સંવેદનશીલ માહિતી ચોરાઈ શકે છે.

એટલું જ નહીં, સુપ્રીમ કોર્ટે લોકોને ખાસ સલાહ આપી છે કે તેઓ સુપ્રીમ કોર્ટના નામ પર આવતી કોઈપણ લિંક પર ક્લિક ન કરે. સુપ્રીમ કોર્ટે સ્પષ્ટ કર્યું છે કે તે ક્યારેય કોઈ વ્યક્તિ પાસેથી વ્યક્તિગત કે નાણાકીય માહિતી માંગતી નથી.

કોર્ટની સત્તાવાર વેબસાઇટ માત્ર www.sci.gov.in છે. કોઈપણ અન્ય વેબસાઈટ પર વિશ્વાસ કરવો તમારા માટે જોખમી સાબિત થઈ શકે છે. ગયા વર્ષે તત્કાલિન મુખ્ય ન્યાયાધીશ ડીવાય ચંદ્રચુડે પણ આવી જ ચેતવણી આપી હતી.

તેમણે કહ્યું હતું કે સુપ્રીમ કોર્ટના નામે ચાલતી નકલી વેબસાઇટ વકીલો, વાદી-પ્રતિવાદીઓ અને સામાન્ય નાગરિકોને નિશાન બનાવી શકે છે. ભારતમાં ઓનલાઈન છેતરપિંડીના વધી રહેલા કિસ્સાઓ વચ્ચે આ સલાહ ખૂબ જ મહત્વપૂર્ણ છે.

અજાણ્યા નંબરના મેસેજ કે ઈમેલ ખોલશો નહીં. કોઈપણ લિંક પર ક્લિક કરતા પહેલા તેની સત્યતા તપાસો. કોઈપણ ઓફર અથવા ડિસ્કાઉન્ટ દ્વારા લાલચમાં ન આવશો. સાયબર ગુનેગારોને અંગત માહિતી આપશો નહીં.

મોટાભાગની છેતરપિંડી લોકોની બેદરકારીને કારણે થાય છે. સાયબર ગુનેગારો લોકોના લોભ કે બેદરકારીનો ફાયદો ઉઠાવે છે. આવી સ્થિતિમાં, સાવચેત રહેવું એ તમારી ગોપનીયતા અને નાણાકીય સુરક્ષા જાળવવાનો શ્રેષ્ઠ માર્ગ છે.