Ravindra Jadeja 200 ODI Wickets:
ભારતીય ટીમના ઓલરાઉન્ડર ખેલાડી રવિન્દ્ર જાડેજાએ એશિયા કપ 2023માં બાંગ્લાદેશ સામેની મેચમાં પોતાની 200 ODI વિકેટ પૂરી કરવાની સિદ્ધિ હાંસલ કરી છે. આ મેચમાં જાડેજાએ શમીમ હુસૈનની વિકેટ લઈને આ સિદ્ધિ મેળવી હતી. હવે તે ODI ક્રિકેટમાં 200 વિકેટ પૂરી કરનાર ભારતનો પહેલો ડાબોડી સ્પિન બોલર પણ બની ગયો છે. આ સિવાય જાડેજા કપિલ દેવ પછીનો બીજો ભારતીય ખેલાડી છે જેણે ODIમાં 200 કે તેથી વધુ વિકેટ સાથે 2000થી વધુ રન બનાવવાનો રેકોર્ડ બનાવ્યો છે.
અનિલ કુંબલેએ સૌથી વધુ વિકેટ લીધી
વનડેમાં સૌથી વધુ વિકેટ લેનાર ભારતીય બોલર અનિલ કુંબલે છે. તેણે 269 ODIની 263 ઇનિંગ્સમાં 30.83ની એવરેજ અને 4.29ની ઇકોનોમી સાથે 334 વિકેટ લીધી હતી. આ યાદીમાં જવાગલ શ્રીનાથ બીજા સ્થાને (229 મેચ, 315), અજીત અગરકર ત્રીજા સ્થાને (191 મેચ, 288), ઝડપી બોલર ઝહીર ખાન ચોથા સ્થાને (194 મેચ, 269), સ્પિનર હરભજન સિંહ 5મા સ્થાન પર (234 મેચ, 265) અને છઠ્ઠા સ્થાને ભૂતપૂર્વ કેપ્ટન કપિલ દેવ (225 મેચ, 253) છે.
આ ખાસ રેકોર્ડ જાડેજાના નામે નોંધાયેલા છે
ટીમ ઈન્ડિયાના સ્ટાર ઓલરાઉન્ડર રવિંદ્ર જાડેજા ODI ક્રિકેટમાં સદી ફટકાર્યા વિના સૌથી વધુ રન બનાવનાર 8મો ખેલાડી છે. તે ભારતીયોમાં નંબર વન છે. ડાબોડી બોલર રવિંદ્ર જાડેજા (21) ODIમાં વિશ્વનો 13મો બોલર છે જેણે સ્ટમ્પ દ્વારા સૌથી વધુ વિકેટ લીધી છે. જાડેજા વનડેમાં એક કેલેન્ડર વર્ષમાં સૌથી વધુ વિકેટ લેનારો સંયુક્ત 12મો બોલર છે. તેણે આ રેકોર્ડ ગ્લેન મેકગ્રા, જુનૈદ ખાન અને વકાર યુનિસ સાથે શેર કર્યો છે.
ક્રિકેટર રવિંદ્ર જાડેજાએ વેસ્ટ ઈન્ડિઝ સામે સૌથી વધુ વનડે વિકેટ લીધી હતી. ODI ક્રિકેટમાં રવિંદ્ર જાડેજાનો સર્વશ્રેષ્ઠ રેકોર્ડ વેસ્ટ ઈન્ડિઝ ક્રિકેટ ટીમ સામે છે. આ ટીમ સામે તેણે 32 ODI મેચોમાં 29.88ની એવરેજ અને 4.90ના ઈકોનોમી રેટથી 44 વિકેટ ઝડપી છે. વેસ્ટ ઈન્ડિઝ સામે તેનું સર્વશ્રેષ્ઠ પ્રદર્શન 36 રનમાં 5 વિકેટ લેવાનું રહ્યું છે. જાડેજાનું વનડેમાં બીજું સારું પ્રદર્શન ઈંગ્લેન્ડ ક્રિકેટ ટીમ સામે છે. તેણે ઈંગ્લેન્ડ સામે 25 મેચમાં 38 વિકેટ લીધી છે.
આંતરરાષ્ટ્રીય ક્રિકેટમાં પ્રદર્શન
ટીમ ઈન્ડિયાના સ્ટાર ઓલરાઉન્ડર રવિંદ્ર જાડેજાએ 8 ફેબ્રુઆરી 2009ના રોજ કોલંબોમાં શ્રીલંકાની ક્રિકેટ ટીમ સામે તેનુ ODI ડેબ્યૂ કર્યું હતી. તેણે અત્યાર સુધીમાં 181 વનડેની 123 ઇનિંગ્સમાં 32.22ની એવરેજ અને 84.27ની સ્ટ્રાઇક રેટથી 2,578 રન બનાવ્યા છે. તેણે 67 ટેસ્ટની 128 ઇનિંગ્સમાં 275 વિકેટ લીધી છે અને 98 ઇનિંગ્સમાં 2,804 રન બનાવ્યા છે. તેણે 64 T20 આંતરરાષ્ટ્રીય મેચમાં 51 વિકેટ લીધી છે. તેણે આ ફોર્મેટમાં 457 રન પણ બનાવ્યા છે.