Devdutt Padikkal test century: ભારત અને શ્રીલંકા વચ્ચે ગાલે (Galle) ઇન્ટરનેશનલ સ્ટેડિયમ ખાતે રમાઈ રહેલી પહેલી ટેસ્ટ મેચના પહેલા જ દિવસે યુવા બેટ્સમેન દેવદત્ત પડિકલે કમાલ કરી દીધી છે. શનિવાર, 15 ઓગસ્ટના રોજ મેચના પહેલા દિવસે ત્રીજા નંબરે બેટિંગ કરવા ઉતરેલા પડિકલે શાનદાર સદી ફટકારીને આખી દુનિયાનું ધ્યાન ખેંચ્યું છે. તમને જણાવી દઈએ કે, ટેસ્ટ ક્રિકેટમાં આ દેવદત્ત પડિકલની સૌથી પહેલી સદી છે અને આ સદી સાથે તેણે એક મોટો ઇતિહાસ પણ રચી દીધો છે.
સૌરવ ગાંગુલીની એલિટ ક્લબમાં એન્ટ્રી
ગેલના મેદાન પર પડિકલનું બેટ રીતસરનું ગર્જ્યું હતું. તેણે માત્ર 134 બોલનો સામનો કરીને પોતાની સદી પૂરી કરી લીધી, જેમાં 9 જોરદાર ચોગ્ગા અને 1 ગગનચુંબી છગ્ગો સામેલ હતો. આ શાનદાર ઇનિંગ્સ સાથે જ તેણે પૂર્વ ભારતીય કેપ્ટન સૌરવ ગાંગુલીની ખાસ ક્લબમાં એન્ટ્રી મારી લીધી છે.
વાત એમ છે કે, 21મી સદીમાં ભારતીય ટીમ માટે ટેસ્ટ મેચમાં ત્રીજા નંબરે બેટિંગ કરતા સદી ફટકારી હોય તેવો પડિકલ માત્ર બીજો ડાબોડી (લેફ્ટ હેન્ડેડ) બેટ્સમેન બની ગયો છે. આ પહેલા આ મહાન રેકોર્ડ માત્ર દાદા એટલે કે સૌરવ ગાંગુલીના નામે જ હતો. ગાંગુલીએ છેક 2002 ના વર્ષમાં દિલ્હી ખાતે ઝિમ્બાબ્વે સામે 136 રનની જબરદસ્ત ઇનિંગ રમી હતી.
ભારતની લાંબી રાહનો આવ્યો સુખદ અંત
ટેસ્ટ ક્રિકેટમાં ત્રીજા ક્રમ પર કોઈ ભારતીય બેટ્સમેને સદી ફટકારી હોય તેવી ઘટનાને ઘણો લાંબો સમય વીતી ગયો હતો. છેલ્લે સપ્ટેમ્બર 2024 માં ચેન્નાઈ ખાતે બાંગ્લાદેશ સામે શુભમન ગિલે આ ક્રમ પર સદી ફટકારી હતી.
ત્યારબાદ અત્યાર સુધીમાં ભારતે કુલ 19 ટેસ્ટ મેચો રમી અને આ નંબર 3 ની પોઝિશન પર 7 અલગ-અલગ બેટ્સમેનોને અજમાવવામાં આવ્યા. પરંતુ આ સમયગાળા દરમિયાન તમામ બેટ્સમેનોનું પ્રદર્શન ઘણું નિરાશાજનક રહ્યું હતું. આ 7 બેટ્સમેનોએ 35 ઇનિંગ્સમાં માત્ર 27.28 ની સાધારણ સરેરાશથી રન બનાવ્યા હતા અને ફક્ત 5 વખત જ તેઓ 50 કે તેથી વધુ રનનો આંકડો પાર કરી શક્યા હતા. આખરે, ગેલમાં પડિકલે શાનદાર સદી ફટકારીને નંબર 3 પર સદી માટેના ભારતના આ લાંબા ઈન્તઝારનો અંત લાવી દીધો છે.
આ પણ વાંચોઃ WTC 2025-27 ફાઇનલ: ટીમ ઈન્ડિયાએ ફાઇનલમાં પહોંચવા કેટલી મેચ જીતવી પડશે? જાણો ગણિત
દેવદત્ત પડિકલનું અત્યાર સુધીનું કરિયર
વાત કરીએ 26 વર્ષીય દેવદત્ત પડિકલની તો, તે હાલમાં પોતાના કરિયરની માત્ર ત્રીજી જ ટેસ્ટ મેચ રમી રહ્યો છે. આ પહેલા રમાયેલી બે ટેસ્ટ મેચમાં તેણે 30.00 ની એવરેજથી 90 રન બનાવ્યા હતા.
યાદ અપાવી દઈએ કે, પડિકલે માર્ચ 2024 માં ધર્મશાલા ખાતે ઇંગ્લેન્ડ સામે પોતાનું ટેસ્ટ ડેબ્યૂ કર્યું હતું અને પોતાની પહેલી જ ઇનિંગ્સમાં 65 રનની આકર્ષક રમત દેખાડી હતી. આ ઉપરાંત, પડિકલ ભારત માટે 2 T20 ઇન્ટરનેશનલ મેચો પણ રમી ચુક્યો છે, જેમાં તેણે 19.00 ની સરેરાશથી કુલ 38 રન નોંધાવ્યા છે.
આ પણ વાંચોઃ ભારત સામેની પહેલી ટેસ્ટ માટે શ્રીલંકાની ટીમ જાહેર, નિસાન્કા બહાર; જાણો કોણ બન્યું કેપ્ટન