ENG vs WI T20 World Cup 2024 Match Highlights: ઇગ્લેન્ડે સુપર-8 મેચમાં વેસ્ટ ઇન્ડિઝને 8 વિકેટથી હરાવ્યું હતું. ફિલિપ સોલ્ટે ઈગ્લેન્ડની જીતમાં મહત્વપૂર્ણ યોગદાન આપ્યું હતું. સોલ્ટે 47 બોલમાં 7 ચોગ્ગા અને 5 છગ્ગાની મદદથી અણનમ 87 રનની ઇનિંગ રમી હતી. ગ્રુપ સ્ટેજની ચારેય મેચ જીતનાર વેસ્ટ ઈન્ડિઝ ઈંગ્લેન્ડ સામે સારુ પ્રદર્શન કરી શક્યું નહીં. વેસ્ટ ઈન્ડિઝ અને ઈંગ્લેન્ડ વચ્ચે T20 વર્લ્ડ કપની 42મી મેચ સેન્ટ લુસિયાના ડેરેન સેમી નેશનલ ક્રિકેટ સ્ટેડિયમમાં રમાઈ હતી. ઈંગ્લેન્ડે મેચમાં એકતરફી જીત નોંધાવી હતી.
ઈંગ્લેન્ડે ટોસ જીતીને બોલિંગ કરવાનો નિર્ણય કર્યો જે તેમના માટે સફળ સાબિત થયો. પ્રથમ બેટિંગ કરવા આવેલી વેસ્ટ ઈન્ડિઝે 20 ઓવરમાં 4 વિકેટે 180 રન બનાવ્યા હતા. ટીમ માટે જોન્સન ચાર્લ્સે 34 બોલમાં 4 ચોગ્ગા અને 1 છગ્ગાની મદદથી 38 રનની સૌથી મોટી ઇનિંગ રમી હતી. ત્યારબાદ લક્ષ્યનો પીછો કરતા ઈંગ્લેન્ડે માત્ર 17.3માં જીત મેળવી હતી. લક્ષ્યનો પીછો કરતા ઈંગ્લેન્ડે મેચ પર નિયંત્રણ જાળવી રાખ્યું હતું અને એકતરફી જીત મેળવી હતી.
ઇંગ્લેન્ડની એકતરફી જીત
ફિલિપ સોલ્ટ અને કેપ્ટન જોસ બટલરે લક્ષ્યનો પીછો કરતા ઈંગ્લેન્ડને સારી શરૂઆત અપાવી હતી. બંનેએ પ્રથમ વિકેટ માટે 67 રન (46 બોલ)ની ભાગીદારી કરી હતી. 8મી ઓવરના ચોથા બોલ પર કેપ્ટન બટલરની વિકેટ સાથે આ ભાગીદારીનો અંત કર્યો હતો. રોસ્ટન ચેઝે બટલરને પેવેલિયન ભેગો કર્યો હતો. બટલરે 22 બોલમાં 2 ચોગ્ગાની મદદથી 25 રન બનાવ્યા હતા. ત્યારબાદ ટીમને 11મી ઓવરના પહેલા બોલ પર મોઈન અલીના રૂપમાં બીજો ઝટકો લાગ્યો હતો, જેને આન્દ્રે રસેલે આઉટ કર્યો હતો. મોઈને 10 બોલમાં 2 ચોગ્ગાની મદદથી 13 રન બનાવ્યા હતા.
આ પછી વેસ્ટ ઈન્ડિઝના બોલરો ઈંગ્લેન્ડની કોઈ વિકેટ લઈ શક્યા ન હતા. અહીંથી ફિલિપ સોલ્ટે જોની બેયરસ્ટો સાથે મળીને અણનમ 97 (44 બોલ)ની અતૂટ ભાગીદારી કરી અને ટીમને વિજય રેખા પાર પહોંચાડી હતી. સોલ્ટે 47 બોલમાં 7 ચોગ્ગા અને 5 છગ્ગાની મદદથી અણનમ 87 રન ફટકાર્યા હતા. આ સિવાય બેયરસ્ટોએ 26 બોલમાં 5 ચોગ્ગા અને 2 છગ્ગાની મદદથી અણનમ 48 રન બનાવ્યા હતા.