IND vs AUS U19 WC Final : ઓસ્ટ્રેલિયાએ ફાઇનલમાં ભારતને 79 રનથી હરાવ્યું
IND vs AUS U19 World Cup Final LIVE Score: ભારતીય ટીમને 2024 અંડર-19 વર્લ્ડ કપનો ખિતાબ જીતવા માટે પ્રબળ દાવેદાર માનવામાં આવે છે. ટીમ ઈન્ડિયા અત્યાર સુધી પાંચ વખત અંડર-19 વર્લ્ડ કપ જીતી ચૂકી છે.
ઓસ્ટ્રેલિયાએ અંડર 19 વર્લ્ડ કપ 2024નું ટાઇટલ કબજે કર્યું છે. તેણે ફાઇનલમાં ભારતને 79 રનથી હરાવ્યું હતું. ઓસ્ટ્રેલિયાએ 84 દિવસમાં બીજી વખત ભારતને ફાઇનલમાં હરાવ્યું છે. આ પહેલા ટીમ ઈન્ડિયાને વર્લ્ડ કપ 2023ની ફાઇનલમાં હારનો સામનો કરવો પડ્યો હતો. પ્રથમ બેટિંગ કરતા ઓસ્ટ્રેલિયાએ 50 ઓવરમાં 7 વિકેટ ગુમાવીને 253 રન બનાવ્યા હતા. જવાબમાં ભારતીય ટીમ 43.5 ઓવરમાં ઓલઆઉટ થઈ ગઈ હતી. ટીમે 174 રન બનાવ્યા હતા. જેથી 79 રનથી હાર મળી હતી.
ટીમ ઈન્ડિયાની છેલ્લી આશા પણ તૂટી ગઈ છે. મુરુગન અભિષેક શાનદાર ઇનિંગ રમીને આઉટ થયો હતો. તેણે 46 બોલનો સામનો કરીને 42 રન બનાવ્યા હતા. કેલમે અભિષેકને પેવેલિયનનો રસ્તો બતાવ્યો. હવે ભારતીય ટીમની છેલ્લી જોડી મેદાનમાં છે. સૌમી પાંડે બેટિંગ કરવા પહોંચ્યો છે. ટીમ ઈન્ડિયાએ 40.4 ઓવરમાં 168 રન બનાવી લીધા છે.
ટીમ ઈન્ડિયા માટે 37મી ઓવર ઘણી સારી રહી. આ ઓવરમાં તેણે 13 રન બનાવ્યા હતા. અભિષેકે સતત બે ચોગ્ગા ફટકાર્યા હતા. ઓસ્ટ્રેલિયાના બોલર એન્ડરસને પણ 3 વાઈડ બોલ ફેંક્યા હતા. ભારતે 37 ઓવરમાં 8 વિકેટ ગુમાવીને 149 રન બનાવ્યા હતા. અભિષેક 33 રન બનાવીને રમી રહ્યો છે. નમન તિવારી 2 રન બનાવીને ક્રિઝ પર છે.
ટીમ ઈન્ડિયાએ 33 ઓવરમાં 8 વિકેટ ગુમાવીને 127 રન બનાવી લીધા છે. મુરુગન અભિષેક 17 રન બનાવીને રમી રહ્યો છે. નમન તિવારી હજુ ખાતું ખોલાવી શક્યો નથી. ટીમ ઈન્ડિયાને જીતવા માટે હજુ 127 રનની જરૂર છે. તેની પાસે પૂરતી ઓવર બાકી છે. પરંતુ હાથમાં વિકેટ નથી. ઓસ્ટ્રેલિયાએ મેચ પર સંપૂર્ણ નિયંત્રણ મેળવી લીધું છે.
ટીમ ઈન્ડિયાના ફેન્સ માટે ખરાબ સમાચાર છે. આદર્શ સિંહ 77 બોલમાં 47 રનની સાહસિક ઇનિંગ રમીને આઉટ થયો છે. બિયર્ડમેને આદર્શને પેવેલિયનનો રસ્તો બતાવ્યો. રિયાને શાનદાર કેચ લીધો.
ટીમ ઈન્ડિયાની છઠ્ઠી વિકેટ પડી. અવિનાશ શૂન્ય પર આઉટ થયો હતો. રાફ મેકમિલને તેને પેવેલિયનનો રસ્તો બતાવ્યો. ભારતે 25.3 ઓવરમાં 91 રન બનાવ્યા છે. ટીમ ઈન્ડિયાને જીતવા માટે હજુ 163 રનની જરૂર છે. ભારતીય ટીમ પર કાંગારૂ બોલિંગનો સંપૂર્ણ દબદબો રહ્યો છે.
હવે કોઈક ચમત્કાર જ ટીમ ઈન્ડિયાને ખિતાબ અપાવી શકે છે. હાલ ટીમની હાલત ખરાબ છે. આદર્શ સિંહ 31 રન બનાવીને રમી રહ્યો છે. પ્રિયાંશુ 8 રન બનાવીને ક્રિઝ પર છે. ભારતે 24 ઓવર પછી 4 વિકેટ ગુમાવીને 88 રન બનાવ્યા છે.
ઓસ્ટ્રેલિયન ટીમ ભારતને ટાઈટલ જીતવાથી ઘણી દૂર લઈ ગઈ છે. ટીમ ઈન્ડિયાની ચોથી વિકેટ પડી છે. સચિન માત્ર 9 રન બનાવીને આઉટ થયો હતો. મેકમિલને તેને પેવેલિયનનો રસ્તો બતાવ્યો. ભારતે 20 ઓવર પછી 4 વિકેટ ગુમાવીને 74 રન બનાવ્યા હતા.
ટીમ ઈન્ડિયાની ત્રીજી વિકેટ પડી. કેપ્ટન ઉદય સહારન માત્ર 8 રન બનાવીને જતો રહ્યો હતો. ટીમ ઈન્ડિયાના ચાહકો ખૂબ જ નિરાશ છે. સ્ટેડિયમમાં ઓસ્ટ્રેલિયન ચાહકોનો જોશ હાઈ છે. ભારતે 16.5 ઓવરમાં 3 વિકેટ ગુમાવીને 55 રન બનાવી લીધા છે. આદર્શ સિંહ 18 રન બનાવીને રમી રહ્યો છે.
ટીમ ઈન્ડિયાએ 50 રનના આંકને સ્પર્શ કર્યો હતો. ભારતે 14 ઓવર પછી 2 વિકેટ ગુમાવીને 50 રન બનાવી લીધા છે. આદર્શ સિંહ 17 રન બનાવીને રમી રહ્યો છે. ઉદય 5 રન બનાવીને ક્રીઝ પર છે. ટીમ ઈન્ડિયાને જીતવા માટે 204 રનની જરૂર છે.
ભારતીય ટીમના સ્કોરબોર્ડની ગતિ ઘણી ધીમી છે. ટીમે 10 ઓવર પછી 1 વિકેટ ગુમાવીને 28 રન બનાવ્યા હતા. મુશીર 13 રન અને આદર્શ 10 રન સાથે રમી રહ્યો છે. આ બંને ખેલાડીઓએ એક-એક ફોર ફટકારી છે.
ટીમ ઈન્ડિયાના બેટ્સમેન અત્યારે સંઘર્ષ કરી રહ્યા હોય તેવું લાગી રહ્યું છે. ટીમ ઈન્ડિયાને 7મી અને 8મી ઓવરમાં માત્ર 1-1 રન જ મળ્યા હતા. ટીમ ઈન્ડિયાએ 8 ઓવર પછી 20 રન બનાવ્યા હતા. આદર્શ સિંહ 7 રન અને મુશીર ખાન 9 રન સાથે રમી રહ્યા છે.
ટીમ ઈન્ડિયાએ 5 ઓવરમાં 1 વિકેટ ગુમાવીને 10 રન બનાવ્યા હતા. આદર્શ સિંહ એક ફોરની મદદથી 5 રન બનાવીને રમી રહ્યો છે. મુશીર ખાને 11 બોલમાં 1 રન બનાવ્યો હતો. ઓસ્ટ્રેલિયન બોલરોએ અત્યાર સુધી મેચ પર સંપૂર્ણ નિયંત્રણ રાખ્યું છે. ટીમ ઈન્ડિયાને અહીંથી ઘણી મહેનત કરવાની જરૂર છે.
અંડર 19 વર્લ્ડ કપ 2024ની ફાઇનલમાં ઓસ્ટ્રેલિયાએ ભારતને જીતવા માટે 254 રનનો ટાર્ગેટ આપ્યો છે. ઓસ્ટ્રેલિયાએ 50 ઓવરમાં 7 વિકેટ ગુમાવીને 253 રન બનાવ્યા હતા. હરજસ સિંહે અડધી સદી ફટકારી હતી. તેણે 64 બોલનો સામનો કરીને 55 રન બનાવ્યા હતા. આ દરમિયાન તેણે 3 ફોર અને 3 સિક્સર ફટકારી હતી. કેપ્ટન હ્યુગે 48 રનની શાનદાર ઇનિંગ રમી હતી. હેરી ડિક્સને 42 રન બનાવ્યા હતા.
રાજ લિંબાણી ફરી એકવાર કરિશ્માઈ બોલિંગ કરતો જોવા મળ્યો હતો. તેણે એન્ડરસનને બહાર રસ્તો બતાવી દીધો છે. એન્ડરસન 13 રન બનાવીને આઉટ થયો હતો. રાજના ખાતામાં ત્રીજી વિકેટ પડી. ઓસ્ટ્રેલિયાની 7મી વિકેટ પડી. ટીમે 221 રન બનાવ્યા છે.
મુશીર ખાન રાફ મેકમિલનને આઉટ કર્યો. ઓસ્ટ્રેલિયાની છઠ્ઠી વિકેટ પડી. મેકમિલન માત્ર 2 રન બનાવીને આઉટ થયો હતો. તે મુશીરના બોલ પર કેચ આઉટ થયો હતો. ઓસ્ટ્રેલિયાની ટીમ બેક ફૂટ પર છે. તેણે 40 ઓવરમાં 6 વિકેટ ગુમાવીને 187 રન બનાવ્યા હતા. હવે ચાર્લી એન્ડરસન બેટિંગ કરવા આવ્યો છે. ઓલિવર બીજા છેડે હાજર છે.
ઓસ્ટ્રેલિયાએ 30 ઓવરમાં 3 વિકેટ ગુમાવીને 136 રન બનાવ્યા છે. હરજસ સિંહ 33 બોલમાં 20 રન બનાવીને રમી રહ્યો છે. રેયાન 17 રન બનાવીને ક્રિઝ પર છે. ભારતીય બોલરો વિકેટની શોધમાં છે. ટીમ ઈન્ડિયાએ હવે મુશીર ખાનને કમાન સોંપી છે.
નમન તિવારી કાંગારૂ ટીમ પર ભારે પડી રહ્યો છે. તેણે મેચમાં તેની બીજી વિકેટ લીધી. ઓસ્ટ્રેલિયાની ત્રીજી વિકેટ પડી. હેરી ડિક્સન 56 બોલમાં 42 રન બનાવીને પેવેલિયન પરત ફર્યો હતો. તેણે 3 ફોર અને 1 સિક્સ ફટકારી હતી. નમનની ઓવરના પાંચમા બોલ પર ડિક્સને શોટ રમ્યો હતો. બોલ સીધો મુરુગન પાસે ગયો. તેણે કોઈપણ ભૂલ વગર કેચ પકડી લીધો.
કેપ્ટન હ્યુજ વિબગન અને હેરી ડિક્સન વચ્ચે બીજી વિકેટ માટે અડધી સદીની ભાગીદારી થઈ ચુકી છે. 19 ઓવર પછી ઓસ્ટ્રેલિયાનો સ્કોર એક વિકેટે 81 રન છે. હ્યુજ વિબગન 43 રને અને હેરી ડિક્સન 31 રને રમી રહ્યા છે. બંને વચ્ચે 65 રનની ભાગીદારી થઈ ચુકી છે.
પહેલો પાવરપ્લે પૂરો થયો. 10 ઓવર પછી ઓસ્ટ્રેલિયાનો સ્કોર એક વિકેટે 45 રન છે. કેપ્ટન હ્યુજ 17 રને અને હેરી ડિક્સન 22 રને રમી રહ્યા છે. બંને વચ્ચે 29 રનની ભાગીદારી થઈ ચુકી છે.
6 ઓવરના અંતે ઓસ્ટ્રેલિયા અંડર-19નો સ્કોર 1 વિકેટના નુકસાન પર 33 રન છે. ડિક્સન 30 અને વેઈબ્ગન 11 રને રમતમાં છે. સેમ શૂન્યે રને રાજ લિંબાણીની ઓવરમાં બોલ્ડ થયો હતો.
ટોસ હાર્યા બાદ પ્રથમ બોલિંગ કરવા ઉતરેલી ભારતીય ટીમ તરફથી ફાઈનલમાં રાજ લિંબાણીએ પ્રથમ ઓવર ફેંકી હતી. તેણે 1 રન આપ્યો હતો. ચોથા બોલ પર એલબીડબલ્યુની અપીલ પણ થઈ હતી.
ફાઈનલમાં ભારતીય ટીમમાં કોઈ બદલાવ કરવામાં આવ્યો નથી. સેમી ફાઈનલ રમનારી ટીમને જ જાળવી રાખવામાં આવી છે.
અંડર-19 વર્લ્ડકપ ફાઈનલમાં ઓસ્ટ્રેલિયાએ ટોસ જીતીને બેટિંગનો ફેંસલો કર્યો છે. ભારત પ્રથમ બોલિંગ કરશે અને રન ચેઝ કરશે. સેમી ફાઈનલ મુકાબલો પણ ભારતે રન ચેઝ કરતા જીત્યો હતો.
અઅંડર-19 વર્લ્ડકપમાં આજે ભારત અને ઓસ્ટ્રેલિયાનો મુકાબલો છે. થોડીવારમાં ટોસ થશે. ભારત તેની સેમી ફાઈનલમાં રમાડેલી પ્લેઈંગ ઈલેવનમાં ફેરફાર કરે તેવી શક્યતા ઓછી છે.
અત્યાર સુધી અંડર-19 વર્લ્ડ કપના ઈતિહાસમાં ભારત અને ઓસ્ટ્રેલિયા ફાઇનલમાં બે વખત ટકરાયા છે. ટીમ ઈન્ડિયાએ બંને વખત જીત મેળવી છે. હવે બંને ટીમો વચ્ચે અંડર-19 વર્લ્ડ કપની ફાઈનલ ત્રીજી વખત રમાશે. આવી સ્થિતિમાં ટીમ ઈન્ડિયાનો હાથ ઉપર હોય તેવું લાગી રહ્યું છે.
ભારત અને ઓસ્ટ્રેલિયા વચ્ચેની અંડર-19 ફાઈનલ મેચ સ્ટાર સ્પોર્ટ્સ નેટવર્ક પર લાઈવ જોઈ શકશે. આ સિવાય ડિઝની પ્લસ હોટસ્ટાર પર લાઈવ સ્ટ્રીમિંગ જોઈ શકશો. હિન્દી અને અંગ્રેજી ઉપરાંત, તમે ડિઝની પ્લસ હોટસ્ટાર પર અન્ય ઘણી ભાષાઓમાં ટાઇટલ મેચનો આનંદ માણી શકશો. ભારત અને ઓસ્ટ્રેલિયા વચ્ચે ફાઈનલ ભારતીય સમય અનુસાર બપોરે 1.30 વાગ્યે શરૂ થશે.
ભારત અને ઓસ્ટ્રેલિયા વચ્ચે 12 મહિનામાં ત્રીજી વખત આઈસીસી ટ્રોફી માટે મુકાબલો થઈ રહ્યો છે. વર્લ્ડ ટેસ્ટ ચેમ્પિયનશીપ અને વર્લ્ડકપ 2023માં ભારતની સીનિયર ટીમે ઓસ્ટ્રેલિયા સામે હારનો સામનો કરવો પડ્યો હતો. અંડર-19 ટીમ હારનો સિલસિલો અટકાવશે કે નહીં તેના પર નજર રહેશે.
ભારતની અંડર-19 ટીમે 2012 અને 2018ની ફાઇનલમાં ઓસ્ટ્રેલિયાને હરાવ્યું હતું અને આ તબક્કાની ટાઇટલ મેચમાં પણ તે પ્રબળ દાવેદાર હશે. ભારતીય ટીમ વયજૂથ ટૂર્નામેન્ટમાં હંમેશા 'પાવરહાઉસ' રહી છે અને આ ટુર્નામેન્ટમાં નવમી વખત ફાઇનલમાં પહોંચવું તેનો પુરાવો છે. ભારતની અંડર-19 ટીમે 2016 થી તમામ ફાઇનલ રમી છે, 2018 અને 2022ની આવૃત્તિઓમાં ટાઇટલ જીત્યા હતા જ્યારે 2016 અને 2020માં હારનો સામનો કરવો પડ્યો હતો.
બ્રેકગ્રાઉન્ડ
IND vs AUS U19 Final Updates: આજે ભારતીય અંડર-19 ટીમ 2023 ODI વર્લ્ડ કપ ફાઇનલમાં મળેલી હારનો બદલો લેવાના ઇરાદા સાથે મેદાનમાં ઉતરશે. 2023ના વર્લ્ડ કપની જેમ 2024ના અંડર-19 વર્લ્ડ કપની ફાઈનલ મેચ ભારત અને ઓસ્ટ્રેલિયા વચ્ચે રમાવાની છે. આ ટાઈટલ મેચ બેનોનીના વિલોમૂર પાર્કમાં રમાશે. મેચ ભારતીય સમય અનુસાર બપોરે 1.30 વાગ્યે શરૂ થશે.
ભારતીય ટીમને 2024 અંડર-19 વર્લ્ડ કપનો ખિતાબ જીતવા માટે પ્રબળ દાવેદાર માનવામાં આવે છે. ટીમ ઈન્ડિયા અત્યાર સુધી પાંચ વખત અંડર-19 વર્લ્ડ કપ જીતી ચૂકી છે. બ્લુ બ્રિગેડે ફાઈનલમાં ઓસ્ટ્રેલિયાને બે વખત હરાવ્યું છે. ઓસ્ટ્રેલિયાની વાત કરીએ તો કાંગારૂ ટીમ ત્રણ વખત અંડર-19 વર્લ્ડ કપનો ખિતાબ જીતી ચૂકી છે.
કાંગારૂઓ સાથે હિસાબ સરભર કરવાનો સમય
ICC ટુર્નામેન્ટ્સ, ફાઈનલ અને ભારત અને ઓસ્ટ્રેલિયા...છેલ્લા એક વર્ષમાં ત્રીજી વખત બંને દેશો વચ્ચે ખિતાબની લડાઈ જોવા મળશે. ગયા વર્ષની શરૂઆતમાં વર્લ્ડ ટેસ્ટ ચેમ્પિયનશિપ અને ODI વર્લ્ડ કપની ફાઈનલ પણ ભારત અને ઓસ્ટ્રેલિયા વચ્ચે રમાઈ હતી. જો કે ઓસ્ટ્રેલિયાએ બંને વખત જીત મેળવી હતી, પરંતુ આ વખતના આંકડા અલગ જ વાર્તા કહી રહ્યા છે. જો આંકડાઓ પર વિશ્વાસ કરવામાં આવે તો યુવા ટીમ ઈન્ડિયા આ વખતે ઓસ્ટ્રેલિયા સામે હિસાબ સરભર કરવા ઉતરશે. ભારતની યુવા ટીમ પાસે રોહિત, શમી અને કોહલીનો બદલો લેવાની દરેક તક છે. ભારતીય ટીમ અંડર-19 વર્લ્ડ કપ 2024માં અત્યાર સુધી અજેય રહી છે. તેણે તેની તમામ મેચોમાં મજબૂત જીત નોંધાવી છે. સેમીફાઈનલમાં યુવા ટીમ ઈન્ડિયાએ દક્ષિણ આફ્રિકાના જડબામાંથી વિજય છીનવી લીધો હતો.
- - - - - - - - - Advertisement - - - - - - - - -